VAEGA 26

E faatalofa atu i le mamalu o le tatou au faitau nusipepa i lenei taeao fou.  Faamoemoe sa outou alafai mai i fanuga lelei i lenei taeao toto’a, taeao manuia.  Ma e iai se faamoemoega o lo o faamalieina loto ma finagalo e tusa ai ma lenei vaega o le auaunaga a Le Lali, e auala atu i le tatou fagogo.  

Ae se’ese’e mai loa i ou seetaga malu, mo le sosooina o le tatou Fagogo.

***************************

Ua tau me’ia Tepora i le faasolo o le pupula a Iosefa i le mea o nonofo mai ai le au maimoa.  Na vaaia e Tepora le liua o le lanu o ‘i’oimata a le alii o Iosefa.

“O le toatama’i,” o le tala musumusu lea a Iosefa.  “O le tagata fasioti tagata, o lo o faatumulia i le ita.  O lea ua ou iloa atu o ia i totonu o le potu o Rasela, a’o ia fasiotia Rasela.  Ae e le o se taimi muamua lea ua faia ai lea tulaga.”

Sa faamuta faafuasei le talanoa a Iosefa.  Na pei e sipaka le au maimoa.

Ua tau le mautonu le alii leoleo o J.J. ma ia faapea atu, “E mafai ona e ta’u mai pe aisea o toatamai ai le fasioti tagata ia Rasela?”

“E foliga mai o lo o talitonu o ia, sa faaseseina o ia e Rasela,” o le tali mai lea a Iosefa.

Na lagona e Tepora le minoi a Tavita i ona tafatafa.

“Na faafefea ona faaseseina e Rasela ia le tagata lea na fasiotia o ia?” o le tuli tatao mai lea a le alii leoleo.

“Ona sa faatalitonuina e Rasela ma Tina ia le fasioti tagata, e la te mafai ona talanoa atu i agaga o tagata maliliu,” o le tali mai lea a Iosefa.

Ua aapa atu le alii leoleo i le peni ma le fasi pepa sa i luga o le laulau.  “E mafai ona e ta’u mai mea tonu lava na pelogia ai le tagata fasioti tagata e nei mafine?” o le fesili atu lea a le alii leoleo.

Na fai sina umi o nofo Iosefa.

“I le taimi na faia ai fa’aaliga faataulaitu a nei mafine, sa ia fesiligia ni fesili e na o agaga o tagata maliliu e latou te iloaina,” o le tali lea a Iosefa.  “Ae peitai, na sese ni tali na tu’u atu e mafine nei.  O iina na iloa ai e le fasioti tagata, e pepelo mea a le au tamaitai lea o lo o fai.  Ma o le mafuaaga lea na ia fasiotia ai i la’ua.  O le faasalaga o tagata pepelo.”

“O lona uiga, na auai le tagata fasioti tagata i fa’aaliga uma a Rasela ma Tina?” o le fesili atu lea a le alii leoleo.

“E foliga mai na iai le fasioti tagata i fa’aaliga uma a nei mafine, lea sa fai i o la fale,” o le tali lea a Iosefa.

Ua lagona e Tepora le faamalo o Tavita.  E foliga mai e tutusa uma lagona a Tavita ma le alii leoleo, e tusa ai ma le faamatalaga mulimuli a Iosefa.  

“O fa’aaliga ia e te tautala ai, o ni fa’aaliga lata mai nei?” o le fesili lea a le alii leoleo.  “E mafai ona e tu’uina mai ni aso o ia fa’aaliga?”

“E le mafai,” o le tali faafuasei lea a Iosefa ma vaaia le faavaivai o lona tino.  Ua aapa atu lona lima taumatau ma mili lona muaulu.  “E na o le pau lena o se mea e mafai ona ou tu’uina atu i lenei aso.  E faamalie atu I lau susuga i le malu o le malo, ae ua lagona lava le vaivai o le tino.”

“Leai, e faafetai atu lava i lau susuga, ua tele se mea aoga ua maua i lenei faatalanoaga,” o le tali mai lea a le alii leoleo ma tula’i loa i luga.  “Afai e moni lau faamatalaga, o le fasioti tagata, sa auai i fa’aaliga uma ia sa faia i le fale o Rasela ma Tepora.”

“O le matua’I pepelo lava o le alii le la,” o le tala lea a Tavita, a’o ia faataupupula atu i le talanoaga a Iosefa ma le alii leoleo i le pito i luma o le potu.

E FAIA PEA!