VAEGA 5

E faatalofa atu I le mamalu o le tatou au faitau nusipepa I lenei taeao fou.  Faamoemoe sa outou alafai mai I fanuga lelei I lenei taeao toto’a, taeao manuia.  Ma e iai se faamoemoega o lo o faamalieina loto ma finagalo e tusa ai ma lenei vaega o le auaunaga a Le Lali, e auala atu I le tatou fagogo.  Ae saga’I mai loa, o le a toe soso’o atu le tatou tala.

Na gata le tatou tala I le talanoaga a le tamaitai o Tepora ma nai ona Aunties I le maliu o Rasela ma lo latou aafiaga pe afai e iloa e tagata na latou iai I le fale o Rasela I le po na maliu ai o ia.

*********************************

O le afiafi lava lea, ina ua faia malologa o le po.  Na miti ai Tepora.  O se miti ua masani ona ia miti ai.  O se miti e I’u I lona nofo tata a’e I luga ma le sisina o lona afu malulu.

Fai mai lenei miti, o lo’o ia tamo’e saoasaoa e pei o lo’o tuliloa o ia e se agaga leaga.  O le mamafa o lona sakete toso loloa ma le faamalu laititi na tautau I lona lima, na faafaigata ai ona saoasaoa lana tamo’e.  Ua amata ona sosolo ifo le fefe I lona loto, aua ua ia iloa, ua tauau lava ina le toe iai sona malosi e tamo’e ai.

O le taimi lea na lagona ai e Tepora se faamatalaga mai ona tua e faapea, “Ua tatau na e leai”.  O se leo pau ma le oolo I le faalogo a Tepora, na maniti atoa ai lona tino ma tauau ai ina sulu atu I luma I lana tamo’e.  Sa fefe le tamaitai e tilotilo mai I tua po o ai, po o le a fo’I, o tuliloaina o ia.

Na o le pau le mea sa ia iloa mai I lona faasi’usi’u mata mai I tua, o lo’o u’u e le tagata lea o lo’o tuliloaina o ia, se pelu ma’ai.  “Ua tatau ona e leai,” o le toe valaau atu lea a le o lo’o tuliloaina Tepora.

Ua amata ona latalata mai le tagata lea I ona tua.  O iina na iloa ai e Tepora, o se fafine o lo’o tuliloaina o ia.  “A e leai, ona ia toe foi mai lea ia te a’u,” o le alaga lea a le mafine lea, mai I tua.  Ua lagona e Tepora le mamafa tu o lona sakete ma ua foliga mai ua ta’ai I ona tapu vae…

 Ma faate’ia ai loa I luga Tepora mai I lana miti sa fai, ae ua taele I le sisina lona afu malulu…e pei ona masani ai I taimi uma e fai ai lana miti lava lea e tasi.  Atonu ua toe amata miti taufaafefe nei a Tepora, ona o le mea ua tupu ia Rasela.  O manatu ia ua o’o ia Tepora.

Na tula’I ese mai Tepora mai lona moega ma aga’I atu I le potu o le fale lea e fai ma ona ofisa.  Ina ua faalogoina le toe ta ta lelei o lona fatu, na aapa atu Tepora I le peni ma le pepa I luga o lana laulau ma amata ona tusitusi.

O le mea lea a Tepora e fai I taimi uma lava e lagona ai le atuatuvale po o le faapopoleina o lona mafaufau, o le tusi o ana tala.  E le’I umi ae tu’u loa I lalo le peni a Tepora ma ia tago atu ua u’u mai laupepa sa ia tusia ma amata ona ia faitau upu sa ia tusia.

E FAIA PEA