Ads by Google Ads by Google

TU LUA O PO MA AO


[ata: SN]

VAEGA 35

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

************************

Na gata mai le tatou fagogo i le vaiaso ua mavae, i le auai atu o Tepora ma Tavita i se pati sa faia i le latou nu’u, ae i le ogatotonu o le pati, na savali ese atu ai Tavita mai le mea o lo o faia ai le pati, e agai atu i se vaega o le fale o iai se potu e leai nisi o i totonu.

Na ona ulufale lava o Tavita, faapea atu lana tala, “O lea na ou maua lau feau.” 

Ae o le taimi lea o lo o pogisa atoa le potu.

Na tu le tagata lea sa i totonu o le potu ma liliu mai i le mea o tu atu ai Tavita.  Na maitauina e Tavita le gatete o le tino o le alii lea e i totonu o le potu, e pei e iai se mea o popole tele ai.

“E faamalie atu i le faalavelave atu ia te oe, o lo o fai lau pati,” o le tala lea a lea alii.

“Aua e te popole iai,” o le tali mai lea a Tavita.  “E iai se mafuaaga o lou talosagaina o lenei feiloaiga?”

“Ioe, o ni faamatalaga e faatatau ia Tepora, sa ou maua i a’u suesuega,” o le tali mai lea a lenei alii.  “Sa mafai ona ou o’o i le nu’u e malaga mai ai Tepora ma uso o lona tina ma ua iloa foi le mafuaaga na o latou o ese ai ma lea nu’u.  Le mafuaaga lea o lo o tusia i totonu o le ‘diary’ lea o loo oulua sueina.”

“Ia se’i ta’u maia,” o le tala lea a Tavita ma savali atu i totonu o le potu ma nofo loa i lalo o se nofoa.

“E foliga mai o le faalavelave lea na ta’uleagaina ai le igoa o Tepora, na mafua ona o le alii lea o Iosefa.  Ma o lo o iai lona igoa i le lisi o tagata maualuluga ia na valaaulia i le pati lea o lo o faia,” o le faamatalaga lea a le alii o lo o talanoa ma Tavita.

Na fa’ate’ia Tavit ma ia tu a’e i luga ma faanatinati atu i le faitotoa ma faapea, “Sei o’u alu e saili Tepora,” ma tatala le faitotoa ma savali ese atu.

Ae o le taimi lea, o lo o taumafai ai Tepora e savali ese faatopetope mai i se faalapotopotoga o tagata, o lo o faia se latou talanoaga.

E faataalise atu lava Tepora ma ia mafaufau, “E le i iloa mai a’u.”

Na savali sa’o atu lava Tepora i se faitotoa o le fale ma ulufafo atu loa.  Ua tu Tepora ma tau to lona sela.  Ua na iloa atu se nofoa i fafo o le fale ma ia savali atu loa ua saofa’i ai i lalo.

Na faapea ifo Tepora, e le i iloa mai o ia e Iosefa ma ua suia foi lona igoa ia Tepora, e le iloa e Iosefa se tagata e igoa ia Tepora.  O uso o lona tina lea na latou o mai, o la e ta’a’alo pele i totonu o leisi potu, ma e tatau ona ia alu e logo la’ua o lea e iai Iosefa i totonu o le fale, ae e le i feiloai ma Iosefa.

Ua tau mafaufau Tepora i se auala e faailoa atu ai i ona ‘Aunties’ le alii o Iosefa lea e i totonu o le pati, e aunoa ma le iloa mai e Iosefa.  Ma se auala e mafai ai ona o latou tu’ua le pati, e aunoa ma le iloa e se tagata.

E FAIA PEA!