VAEGA 38

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

****************************

Na gata mai le tatou fagogo ananafi, ina ua toe toso atu e Tavita ia Tepora i totonu o le fale e la te sisiva.  Ae manatua o lea e taumafai Tepora e sosola ese mai le fale lea o lo o faia ai le siva, ona o le alii o Iosefa lea e i totonu o le fale.  O Iosefa, ua malamalama atoa i le tala’aga o le olaga o Tepora, aemaise ai le igoa moni o Tepora.

E sisiva lava la ia Tepora ma Tavita, ae ua tau fai sioa uma atu iai tagata.  Manatua o le alii o Tavita, o lo o manana’o uma tamaitai o le nu’u e faa uo atu iai, ae o lea ua fa’aalia le filifilia e Tavita o Tepora.  Ae o Tepora, o lo o manatu tagata o le nu’u, o se tina ua maliu lana tane.  Ae o le mea moni, o Tepora, e le i faia muamua se to’alua.

Na faate’ia Tepora ina ua i’u le la siva, ae tutu tonu lava o Iosefa.  “Malo le soifua Iosefa,” o le faafeiloai atu lea a Tavita ia Iosefa.  Ae o le taimi lea, ua na o le pupula o Tepora i le foloa o le fale.  Sa le i iloa atu e Tepora foliga te’i o Iosefa e pei ua va’ai i se aitu.  

“Tavita, o le a le mea na tupu i lou mata? Na lua feto’ai ma se faitoto’a?” o le fesili mai lea a Iosefa.  “E leai, o nai faalavelave laity foi,” o le tali atu lea a Tavita.  “Tepora, o le susuga lea ia Iosefa,” e fai lava le tala a Tavita ma ia u’unai atu Tepora ma faatu tonu lava i luma o Iosefa.

Na ea lemu a’e lava i luga le ulu o Tepora ma taumafai e ata atu ia Iosefa.  “Malo le soifua i lau susuga,” o le faafeiloai atu lea a Tepora.  Na vaaia e Tepora le le mautonu o Iosefa.  Na i’u lava ina faapea mai Iosefa, “Malo le soifua Tepora.”  Na faapea atu loa Tavita, “Faamalie atu, o lea e valaau mai si o’u tuafafine,” ma toso atu lava Tepora ma la aga’i atu i le faitotoa o le fale lea e agai i le potu o iai uso o tina a Tepora.

“O le a le uiga o lau mea lea na fai?” o le fesili lea a Tepora ina ua la o’o atu i fafo o le potu.  “E lelei lava le faafeto’ai o le fili nai lo le faatali e osofaia oe,” o le tali mai lea a Tavita.  “Matua’i tele au oe tulafono,” o le tali atu lea a Tepora.

Ina ua taunu’u le savaliga a le toalua lea i luma o le faitotoa o le potu lea o lo o iai uso o le tina a Tepora, na faapea atu loa Tavita, “Alu e aumai uso o lou tina, se’i o’u alu atu i’i i la’u feau vave lava lea,” ma savali ese atu.

Ua savali atu nei Tepora i totonu o le potu o lo o iai uso o lona tina, ae ua liliu Tavita ma agai atu i le potu tusi o le fale.  E ulufale atu Tavita, ua leva na faatali mai le alii o Iosefa ia te ia.  “O e iloa le tamaitai lea na lua sisiva?” ole fesili lea a Iosefa.  “Se’i e ta’u mai,” o le tali mai lea a Tavita.

“O le mea muamua e tatau ona e iloa, e le o lona igoa mo’i ia Tepora,” o le tala lea a Iosefa.  “Oi, ae faafefa ona e iloa e le o sona igoa moni ia Tepora?” o le tali atu lea a Tavita.

“Ou te iloa o lona igoa moni o Fetu ma atonu ua ia suia lona igoa, e nana ai le mea sa tupu ia te ia ma lona aiga,” o le tala lea a Iosefa.

E FAIA PEA!