TU LUA O PO MA AO
VAEGA 6
Na gata le tatou tala I le taimi ua te’I ta ta a’e ai I luga si tamaitai o Tepora mai I lana miti lea na tuliloa ai o ia e se fafine ma se pelu ma’ai. Ma na ona tu a’e lava o Tepora mai I le moega ma aga’I sa’o atu lava I lona ofisa ma tago I lana peni ma amata loa ona tusitusi I luga o se laupepa.
Ae alo mai loa mo le sosooga o le tatou tala.
Ai o le te’a lava o le ta ta vale o le fatu o Tepora mai I lana miti, na ia tu’u ai loa I lalo lana peni ae ia tago atu ma u’u mai le laupepa sa ia tusitusi ai ma faitau. Ma sa faate’ia lona mafaufau ina ua ia faitau atu, o faamatalaga uma lava e faamatala ai foliga, uiga ma laei o le alii o Tavita Ioanetone.
Ua na o le nofo nei o Tepora ma mafaufau toto’a po o le a le uiga o lenei mea.
O le lua o aso na soso’o ai, na auai atu ai Tepora I se faatasiga tele I se tasi o fale mataaga. O lenei faatasiga e mo I latou ia e fiafia e suesue ma faatino lenei gaioiga o le taumafai e faafesootai agaga o tagata ua maliliu.
A’o nofonofo Tepora I lona nofoa e faatalitali le taimi e amata ai lenei polokalama, sa ia faalogologo I talanoaga a isi o loo I ona tafatafa ma na’o le pau lava le mataupu o lo’o loteina e ona tuaoi, o le tala o lo’o sosolo nei I le maliu faafuasei o Rasela.
E le’I umi ona faatali Tepora ae pe loa moli o le fale mataaga, o le a amatalia le polokalama, ae o le taimi lea na saofa’I ane ai se tagata I ona tafatafa ma faapea atu, “Malo le soifua, Tepora”. Na tepa ifo Tepora ma faateia o ia ina ua vaai atu o Tavita lea ua nofo atu I ona autafa.
“O le a lau mea o fai iinei?” o le fesili tau le leoa lea a Tepora.
“O le mea lava e tasi ua e sau ai,” o le tali lea a Tavita. E fai lava le tala a Tavita ma tilotilo I le pito I luma o le fale mataaga, I le mea o mumu ai le moli e tasi, lea o lo’o tu mai ai le tamaitai o Tina, lea na fai mai Tepora, sa fai ma fili o Rasela a’o soifua o ia.
Na toe liliu Tavita ia Tepora ma fesili atu, “Ae aisea a e sau ai? E te fiafia I nei ituaiga polokalama? Na ou faapea e le o oe se tagata e fiafia I mea valea faapenei”.
Na lagona e Tepora le tolotolo ifo I luga o le afi I lona loto I upu a Tavita, ae peitai, sa ia faapea atu iai, “Ua ou sau e fai a’u foi suesuega ona ou te iloa, a le manuia au sailiga, e I’u na e toe lilium ai ia matou ma nai uso o lo’u tina ma tu’ua’I I matou I le maliu o Rasela”.
Na le gagana Tavita ae ua na ona sioa ia Tepora. Ae o le taimi lea na faalauiloa mai ai e le taitai o le polokalama, o le a tuuina atu le avanoa ia Tina mo lana gaioiga. Na toe faasaga I luma Tavita.
Na aga’I atu Tina I le ogatotonu o le fale, I le pito I luma ma ia tu I tafatafa o se laulau. Sa uuina I lona lima se laupapa ua mae’a ona ta ina I le foliga o se fatu o le tagata. I luga o lea laupapa sa pipii ai se pepa ma se peni. Na saofai le tamaitai o Tina I se nofoa I tafatafa o le laulau ma ia faataatia le laupapa I luga o le laulau.
Ua sa o tagata uma, ua leai se leo o toe lagona, po o se mea e toe ga se I totonu o le fale mataaga.
E FAIA PEA