VAEGA 39

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina

************************

Na gata mai le tatou Fagogo i le vaiaso ua tuanai, ina ua faafesaga’i ia Tavita ma le alii o Iosefa, mai le nu’u sa ola mai ai Tepora ma ua fa’ailoa atu nei e Iosefa ia Tavita le igoa moni o Tepora.  Manatua, o Iosefa, ua malamalama lelei i le tala’aga o Tepora, ia po o Fetu foi, aua o lona igoa moni lea.  O lo o malamalama lelei Iosefa i le mafuaaga na sosola ese mai ai Tepora/Fetu mai le latou aai, ma uso o lona tina, ae sulufa’i mai i le nu’u lea o lo o faamautu ai nei.

Ina ua fa’ailoa atu e le alii o Iosefa ia Tavita le igoa moni o Tepora/Fetu, na ia iloa le le suia o foliga o Tavita, e fa’ailoa mai ai pe ita pe leai.

“Atonu o le a faamatalaina mai le mafuaaga o lo o nana ai e Tepora lona igoa moni?” o le fesili atu lea a Tavita, a’o fa’aauau pea ona faataupupula atu ia Iosefa.

“O le a ou le auiliiliina le mafuaaga o lona tu’ua o le matou nu’u ma uso o lona tina,” o le tali mai lea a Iosefa.  “Ae ou te faapea atu, e le o se tagata faamoni le tamaitai lea.”

“Oi, e moni?” o le tala lea a Tavita.

“Ua matua’i faate’ia lava lo’u tagata i lenei afiafi ina ua ou iloa ua sui lona igoa ma e foliga mai o lo o olala lelei i totonu o le tou nu’u.  E sa’o lava, o se tamaitai atamai tele,” o le tala lea a Iosefa.

“O se tamaitai atamai tele,” o le tali atu lea a Tavita.

“Ae paga lea, o se tamaitai ua salalau tala i ona uiga…,” e le uma lelei mai le faamatalaga a Iosefa, ae matala faafuase’i mai le faitotoa o le potu lea o lo o la iai ma Tavita.

Ua tau fai tilotilo uma nei alii i le faitotoa ma o la va’aia le tu mai ai o Tepora/Fetu, ua mumu uma ona foliga i le ita.

“Tepora,” o le tala a Tavita ma savali atu aga’i le mea o tu mai ai Tepora.  Ae na savali sa’o mai lava Tepora ma tu i luma o Iosefa.

“E a, ua uma ona e faamatalaina au pepelo ia Tavita?” o le fesili lea a Tepora ia Iosefa ma lona ita tele.

Sa le’i tali Iosefa ia Tepora ae ua ia tilotilo atu ia Tavita ma faapea atu iai, “O le uiga lea o la’u tala.  E le o se tamaitai e pulea le amio.”

Ua savali atu Tavita i le mea o tu ai Tepora ma faapea atu iai, “Sau e nofo i lalo.”

Ae sa le’i amanaia e Tepora le tala a Tavita ma ia toe liliu atu ia Iosefa.

E FAIA PEA.