VAEGA 11

E faatalofa atu I le mamalu o le atunuu I lenei taeao fou.  E ao pea na mua mea I Matautu Sa e pei o lea muagagana, e viia ia le agalelei ma le agaalofa o le Atua ia I tatou o Lana fanau agasala.  Ua mafai ona tatou alafa’I mai I lenei taeao I fanuga lelei, ae viia ai pea Lona suafa paia.  Ia ae Se’e maia i ou seetaga malu ae se’I toe soso’o atu le tatou tala.

**************************************

Na gata le tatou tala I le vaiaso ua tuanai, I le sauniuni atu o Tavita ma Tepora e o I le fale o le tamaitai faataulaitu o Tina.

O le afa tonu lava o le valu I le po ae tutu loa Tavita ma Tepora I luma o le fale o Tina.  Sa faaulufale atu I la’ua e le teufale a Tina.  A’o savali atu I totonu Tavita, sa faasolo lana vaai I totonu o le fale ma ia musumusu atu ia Tepora, “E foliga mai e fiafia le tamaitai o Tina I le pogisa”.  Ona e pogisa atoa lava le fale, se’I vagana ai le potu malolo lea e la te aga’I atu iai, o lo’o mu ai le moli.

Ina ua latou taunu’u I totonu o le potu malolo, na vaaia e Tavita ma Tepora, o lo’o iai ma nisi tagata o lo’o saofafai mai I luga o nofoa.  Na faapea atu le teufale, “susu atu I lua ava na”.  Ma toe liliu o le a alu ese atu.  O le pasi atu o le teufale I luma o Tavita, na ea a’e ai I luga le ulu o Tavita ma faataupupula atu I le teufale, ma ia manatu ifo lava ia te ia e faapea, “E iai le mea na ou faalogoina ai le leo lea.  Atoa ai ma le manogi o lana fagu sausau.”  Sa fa’aauau pea ona tilotilo atu Tavita I le savali ese atu o le teufale, ae faapea ifo Tavita,”E iai le mea na ou vaai muamua ai I le fafine lea”.

Ua toe liliu atu Tavita ma la savali atu ma Tepora I totonu o le potu malolo, I le mea o nonofo mai ai ni tagata se toafa.  A’o la nonofo ifo I o la nofoa, na vaaia e Tavita le sioa mai o se tasi o alii na I totonu o le potu malolo, ia Tepora.

E le’I umi ae toe fo’I mai le tausifale ma faapea mai, “Faamolemole ia outou susu uma mai I le umukuka”.

A’o agai atu le laina I le umukuka, na le’I malolo mata o Tavita I le fetilofa’I solo I so’o se vaega o le fale.

Ua saofafai uma faalapotopoto I luga o se laulau I totonu o le potu ‘ai ia I latou uma.  Ua tape uma moli o le potu, ae toe ai na’o se moli matagi o lo’o mumu I le ogatotonu o le laulau. 

“Susu mai, Tala mai aao,” o le faafeiloai atu lea a le tamaitai o Tina.  Na liliu uma tagata I le mea o sau ai le leo o Tina, I le faitotoa.  Ua ia savali agai mai I le laulau ma nofo I lalo.

“Faamolemole, ia tuu uma outou aao I luga o le laulau,” o le faatonuga lea a Tina.  “Faamolemole, aua lava ne’I toe minoi seisi pe aveese outou aao mai I luga o le laulau, seia mae’a lelei le tatou polokalama”.

E le’I uma lelei atu le faatonuga a Tina, ae faate’ia tagata uma I le lagonaina o le pa’o solo mai o totonu o le fale.

E FAIA PEA