VAEGA 51

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

****************************

Na gata mai le tatou Fagogo i le vaiaso ua mavae ina ua faamatala e le teine faigaluega a Tina, o Mafa, ia Tavita ma Tepora le mafuaaga ua ia masalomia ai le fasitia e Tina o Rasela, ona o lona ofu taugata lea sa maua e Mafa i totonu o se potu nana i le fale o Tina.  Ma sa faamatala e Mafa, sa le i gata ina sa pepelo atu Tina ia te ia, fai mai na ia foa’i le ofu i tagata matitiva, ae sa ia mautaina i totonu o le fale o Tina, e foliga mai sa le i moe Tina i lona fale i le po na fasiotia ai Rasela.

Ma le vaega mulimuli na ta’ua e Mafa na faamautu ai ona masalosaloga i le mea na faia e Tina, o le mauaina lea e Mafa o le ofu taugata a Tina, o lo o pisia uma i le toto o se tagata.

Na fa’aauau le faamatalaga a Mafa ia Tavita ma Tepora i lona faaalia o lona fefe tele ina ua na mauaina le ofu a Tina ma le tulaga na iai.  Sa ta’ua e Mafa e faapea, sa ia tago toe tu’u le ofu i totonu o pusa tu a Tina ma faafoliga mai e na te le i vaai i se mea e tasi.  Ma o lo o iai sona talitonuga, afai e le i maua e leoleo, o lo o iai lava le ofu i totonu o le potu nana lea.

A o faataupupula atu Tavita ia Mafa, sa ia fesili atu e faapea, “Sa e ta’u mai, na e sola ese mai lou fale i le taeao na maua ai le tino maliu o Tina, ona o lou fefe i leoleo aemaise o le tagata na fasiotia Tina.”

“Ioe,” o le tali faanoanoa lea a Mafa.  “Na ou fefe ina ne’i faapea leoleo o a’u sa fasiotia Tina ona sa ma tau upu e uiga i lo’u totogi ma na lagona e le tuaoi a Tina le ma tauga upu.  Sa ou fefe foi ina ne’i foi mai le uo tama a Tina ma masalomia a’u, e faapea, o lea ou te iloa se mea e uiga i le la pisinisi ma Tina.”

“O le a lena pisinisi?” o le fesili a Tavita.  “O faatatau lau tala i faiga taufa’asese a Tina lea e gaoi ai tupe a tagata matutua?”

Na te’i le tamaitai o Mafa.  “Na faafefea ona e iloa?” o lana fesili lea. “Ou te masalosalo, o le mafuaaga lena na misa ai ma lana uo tama.  Na ou masalosalo lava, e iai le mea o lo o maua mai ai tupe a Tina ma o lo o tago foi ave tupe i lana uo tama.  Na ou fai ia Tina, ona o lea out e fesoasoani ia te ia, e tata foi ona maua sa’u vaega o le polofiti ae tago faafefe a’u.”

“Na ou fai ia Tina a ia faate’aina a’u mai i la’u galuega, o le a ou faamatalaina lana mea o lo o fai, i leoleo.  O le ma tauga upu lena sa fai leotele, lea out e iloa na lagona mai e o’u tuaoi,” o le tala lea a Mafa.

“Ua toe lava o ni nai fesili, ona ou tu’uina atu lea o se tupe e mafai ona alu ai e te lafi lilo, seia maua le tagata na fasiotia Tina,” o le tala lea a Tavita ia Mafa.

“O le a le mea o lo o e fia iloa?” o le fesili lea a Mafa.

“O le a sou iloa, i le mafuaaga na toe tago ai lava le uo tama a Tina, i le fasioti Tina?” o le fesili atu lea a Tavita.

“Ua leva ona ou mafaufau i le mea lena,” o le tali mai lea a Mafa.  “Atonu ua mafua ona ua na iloa, na fasioti e Tina ia Rasela ma atonu na fefe ina ne’i liliu atu Tina ia te ia?  Pe atonu na fefe ina ne’i ta’u e Tina i leoleo lana vaega i a la mea o lo o fai, o le taufaasese o tagata matutua ae gaoi a latou tupe?  E pei ona ou fai atu, o le uo tama a Tina, o se tagata amio lilo tele.”

E FAIA PEA.