VAEGA 54

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

“O le faamatalaga i le tagata lea ou te sailia, e fai sina lapo’a, e fai lana ava, ma e savali faasetusetu foi,” o le tala lea a Tavita i le toeaina o Filipe.

Na ata Filipe, “Ioe, na ma feiloai ma le tagata lena.  Ae na faatonuina nisi o la’u aufaigaluega e fai sina suesuega i le talaaga o lea tagata.  Ma sa iai foi seisi o a’u tama na mulimuli ai i le alii lea, seia o’o lava i lona fale.  Ma o iina na iloa ai le pepelo o le setusetu a le alii lea, ma lana ava pepelo.”

“Na fai mai e a lau tama? O ai le tagata lea?” o le fesili atu lea a Tavita.

“E te manatua le alii lea na fesoasoani i leoleo i le fa’aaliga a Tina lea na fai i ni nai aso e le’i leva atu?  Ia o le tagata lava lena,” o le tali mai lea a Filipe.

A’o faia le talanoaga a Filipe ma Tavita, ae o le taimi lea o lo o asiasi atu ai Tepora,  i le pule o se fale lomitusi lea o lo o fa’aalia lona fia lomia o le tusi a Tepora.  

“O lo’u toalua e fiafia e faitau au tusi,” o le tala lea a le alii lomitusi.  “A’o le’i maliu o ia, sa masani foi ona fai ana fa’aaliga e pei o Tina ma Rasela, e talanoa ai i agaga o tagata ua maliliu.”

“Na faafefea ona maliu si ou toalua?” o le fesili atu lea a Tepora.

“O le taeao na soso’o ma le ma faaipoipoga, a’o savalivali o ia i le paka e le mamao ma lo ma fale.  Na osofaia ai o ia e se tagata.  Ma talu lava ona maliu o ia, sa ou taumafai malosi e faafesootai pe talanoa ma lona agaga,” o le tali mai lea a lenei alii.

“O le fale lea, o le fale a lo’u toalua ma ua faafaigata ona ou alu ese ai ona ou te talitonu lava, a toe foi mai lona agaga, e toe foi mai lava i totonu o le fale lenei,” o le fa’aauau lea o le faamatalaga a le alii lomitusi.

“Ma o le mafuaaga foi lea ua ou galue malosi ai lava e lagolago i latou o lo o fai a latou fa’aaliga, e feso’ota’i ai ma tagata ua maliliu.  O lo’u faamoemoe maualuga, o le a mafai ona maua se tasi e mafai ona ma toe feso’ota’i ai ma si o’u to’alua.”

“Ioe, ua toe lava lau fesoasoani ma lau lagolago i le faalapotopotoga o tagata e fiafia e feso’otai ma tagata ua maliliu,” o le tali atu lea a Tepora.

Na luelue le ulu o le alii lomitusi ma faapea mai, “O mea uma ua ou faia, na ou faia ma lo’u faamoemoega autu, ia toe maua se ma fesootaiga ma si a’u manamea ua maliu.  Ae paga lea, e o’o mai lava i le taimi nei, ou te le i maua lava se tagata e mafai ona maua ai se ma fesootaiga ma si o’u toalua.”

“O le a tonu le mafuaaga na e valaaulia ai a’u i lou maota i lenei taeao?” o le fesili atu lea a Tepora.

“Ioe, ou te manao e lolomi e le matou kamupani lau tusi fou.  Ou te iloa o lena ua iai le lomitusi ua e filifilia, ae ua ou saunia e faaluaina le tupe na ofoina atu e lau kamupani,” o le tali mai lea a lenei alii.

I le taimi atoa lava a o faia le talanoaga a le alii lomitusi ma Tepora, sa ofoina atu ai e le alii lomitusi ia e ipu ti mo Tepora.  O le taimi lea na lagona ai le tuitui atu o le faitotoa o le potu o lo o talanoa ai Tepora ma le alii lomitusi.

Na ulufale atu se alii ma faapea atu i le lomitusi, “O lea ua taunuu mai Iosefa mo le lua faatalanoaga.”

Na faateia Tepora ina ua toe faalogo i le igoa o Iosefa.  Manatua, o Iosefa lea na taumafai e tau faaleagaina si mafine o Tepora.

“Oi, ua vave mai le alii o Iosefa.  Ia lea o le a ou alu atu,”  o le tala lea a le alii lomitusi ma tulai i luga.  “E mafai ona se’i tu’u mai na o sina minute, faamolemole lava.”

O le taimi lea ua lagona ai e Tepora, ua tau le lelei lana faalogo.

E FAIA PEA!