VAEGA 55

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

****************************

Na gata le tatou fagogo i le vaiaso ua mavae i le taimi o lo o talatalanoa ai Tepora ma le lomitusi o lo o manao e lomia ana tusitusiga, ae tuitui atu loa le faitotoa e le failautusi a le lomitusi ma faailoa atu le taunuu atu o Iosefa ma o lo o fia talanoa i le lomitusi.

Manatua foi o Iosefa lea sa taumafai malosi lava e taufaaleaga ia le igoa o Tepora ae ua uma ona fai iai Tavita i le alii lea, afai ae faalogo i se tala e tasi o taufaaleaga ai le igoa o Tepora, o le a iloa e Iosefa lona iuga.

Ua savali ese atu nei le alii lomitusi mai totonu o le potu lea o lo o iai Tepora.  Ua tu atu nei i luga Tepora mai lona nofoa ma fealualu’i solo i totonu o le potu ma taumafaufau le mafuaaga u ausu mai ai Iosefa e vaai le alii lomitusi.

A o savalivali solo Tepora i totonu o le potu, na faate’ia o ia, ina ua tau atu lana vaai i se ata o tautau i luga ifo o le laulau a le alii lomitusi.  O lea ata, o iai se tamaitai lalelei o lo o ofu sona ofu talaloa, ma se veli o i luga o lona ulu.  Ae peitai, e ui i le aulelei o lenei tamaitai, na vaaia e Tepora le faanoanoa o ona foliga.

Na soso atu Tepora ma tilotilo toto’a i le ata, ma ia iloa atu ai se pine o pipi’i i le ofu o le mafine lea e i totonu o le ata, i luga tonu o lona fatafata.  Na toe manatua e Tepora le faamatalaga a Tavita e uiga i le tino maliu o Rasela, lea na pipi’i i luga o le fatafata o lona ofu ia se pine, e tali tutusa ma le pine lea o lo o i totonu o le ata o lo o tilotilo ai nei Tepora.  Na vaaia foi e Tepora le lanu auro o le ulu o le teine o lo o i le ata, ma ona matua le faamatalaga a Tavita, e lanu auro le lauulu o Rasela.

Na lagona e Tepora le afu malulu i lona tino ma ia liliu atu loa o le a sola ese mai i totonu o le potu ae toe savali mai i totonu le alii lomitusi ma fesili mai ia te ia, pe o iai se mea ua tupu.

E tali atu lava Tepora, “E leai” ma faatopetope atu lana savali i le faitotoa ma tatala loa le faitotoa.  Ae peitai o le taimi lea, ua amata ona lagona e Tepora le le mautonu o lana savali, ua pei o i luga o se va’a ae ua matua’i sou lava le vasa.  Sa taumafai Tepora e a’apa atu i le faitotoa e tatala, ae ona matapogia loa.

Na lagona e Tepora le tago o le tagata ua si’i o ia i luga.  Na taumafai Tepora e valaau mo se fesoasoani, ae peitai, sa leai se leo sa ia faalogoina.  Ma e le i uma lava, ae faatumulia le vaai a Tepora i le pogisa.

E FAIA PEA!