VAEGA 56

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Ua o tatou tu’ua nei Tepora i le tulaga mafatia o iai, ina ua matapogia i le fale o le alii lomitusi, ae sei o tatou liliu atu ia Tavita po o a ana mea o fai ae o le la o lo o manaomia e Tepora se fesoasoani.

Ua amata ona alu ifo le la i lona nofoaga mau, ae maua atu le tama o le ata, o Tavita, o lo o nofonofo i le pogisa i totonu o le potu malolo o se fale.  Sa ia faalogoina le pa’o mai o le faitoto’a, ae sa le i migoi lava Tavita.

Na ia iloa atu le matala o le faitotoa ma ulufale mai i totonu le alii faigata o Iosefa.  Le alii lava lenei o Iosefa lea sa i o foi o le ofisa a le alii lomitusi lea ua tupu ai nei le faalavelave ia Tepora.

E le i o’o lelei mai i totonu o le potu malolo ia Iosefa, ae mau ai Tavita i le kola o le ofu ae velo aga’i i le sima o le potu.  Na ona pa’u lava i lalo o Iosefa i le fola o le fale, pei o le a le vave ona taumafai e tu i luga ae tamo’e agai i le faitotoa, ae toe kiki i lalo e Tavita ma tu lona vae i lona papatua ma faapea atu, “E te toe minoi loa, e faamavae loa ma le lalolagi”.

Na uma le toe minoi a Iosefa ae ua taoto faasasa’o loa ma tau to lana manava.  “O le a lau mea o fai i totonu o lo’u fale?” o le fesili lea a Iosefa ma le sela pei sa tamo’e i se melefoni.

“O lea ou te fia talanoa ia te oe e uiga i le maliu o Rasela ma Tina, ae maise o se tusi (diary) lea o lo o o’u tau sailia,” o le tali atu lea a Tavita ma toe o’omi lona vae lea o lo o tu i luga o le papatua a Iosefa.

“E faafefea ona oulua se mea e uiga i faalavelave na tupu i na mafine.  Ma ou te faafetai ua maliliu ona o le la mea na sa fai a’o feola, o le gaoi o tupe ma taufa’avalea tagata.  Ua sili ona e alu ‘ese atu ma lo’u fale, ae ou te le i valaau leoleo,” o a Iosefa lea.

Na ata Tavita ma faapea atu, “E fai sina faigata ona e valaau i leoleo pe afai e le mafai ona e toe tautala,” ma toe o’omi le papatua o Iosefa i lona vae.  Ae o le taimi lea ua oi Iosefa i le tiga o lona papatua.

O le taimi lea ua a’apa atu nei Tavita i se teutusi lapo’a ma fa’apa’u atu i luga o le fola o le fale, i tafatafa tonu lava o Iosefa ma faapea atu ia Tavita, “Ua uma ona ou fai atu ia te oe, e aua nei o’u toe vaai ia te oe i totonu o le a’ai lenei.  Mata o le a se lagona i tagata o le aiga o lou to’alua pe afai ae ou fa’aali atu ia i latou nai au mea pi’opi’o lea e tau nana?”

Na liliu le ulu o Iosefa ma tilotilo atu i le teutusi lea ua taatia tonu lava o lona ulu ma na vaaia e Tavita le liua o le pupula a Iosefa, i se pupula a se tagata pei ua mate’ia lana tupua.

“O fea na e aumaia ai le teutusi lea?” o le fesili lea a Iosefa.

“Oi na ou mauaina i totonu o le pusa toso o lau kesi,” o le tali atu lea a Tavita.

“Ou te le malamalama po o le a le uiga o lau mea lea e fai po o le a foi le mea na e te masalosalo na ou faia,” o le tala lea a Iosefa.  Ae peitai, na iloa lelei atu lava e Tavita le popolega o foliga a le alii lea o lo o taatia i luga o le foloa o le fale.

E FAIA PEA!