TU LUA O PO MA AO
VAEGA 57
E faatalofa atu i si o tatou aiga i lenei taeao fou. Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama. E faafetai atu foi ia te outou o lo o lagolagoina lenei auaunaga i vaiaso taitasi.
Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.
*************************
Na gata mai le tatou Fagogo i le vaiaso ua mavae, ina ua faateia le alii o Iosefa, i lona toe fo’i atu i lona fale, o la e faatalitali mai ai ia Tavita. E le i iai lava se avanoa na tu’uina iai e Tavita e fai mai se tala a Iosefa, ae patatu i lalo Iosefa, ua fa o faasaga i le foloa o le fale, ae tu ai le vae o Tavita i lona papatua.
Ua fa’alala atu iai e Tavita ia le pepa lea sa la maua mai ma Tepora, mai i ni tagata matutua lea sa faavaleaina e le tamaloa faiava ma lona vae e alu faasa’esa’e, ae gaoi mai a latou tupe.
“Na ou fai atu lelei lava ia te oe, ia aua ne’i o’u toe vaai ia te oe i so o se mea e latalata ia Tepora,” o le tala lea a Tavita. “Ae lea ua ou iloa nei, o lau susuga lea e faia le mea valea lea o le taufa’avalea o tama ma tina matutua o le nu’u, ae ave latou tupe.”
“E leai lava seisi o toe popole atu ia Tepora,” o le tali faali’i mai lea a Iosefa. “Ma leisi mea, e le mafai ona e faamaonia o a’u e ana pep ana.”
Ua ataata le alii o Tavita ma faapea atu ia Iosefa, “E te silafia lelei lava, e le o a’u o se tagata e so’ona fa’alele ni faaupuga.”
Ua tau le manava le alii o Iosefa ma fesili atu ia Tavita, “O le a le uiga o lau faamatalaga?”
“Ou te iloa e te le o masani lelei ia te a’u. E leai se tulimanu o lenei a’ai, e le o’o iai lo’u malamalama ma e leai se tagata o lenei a’ai, e le masani ia te a’u,” o le tali atu lea a Tavita.
“O le a le mea e te mana’o iai?” o le fesili atu lea a Iosefa, ina ua na ia toe manatunatu lelei i le faamatalaga a Tavita.
Ua tu’u ese nei le vae o Tavita mai i le papatua o Iosefa ma o le taimi lava lena, na tu a’e ai loa i luga Iosefa, ma savali atu i le saofa’i i luga o le nofoa, ma faasaga mai ia Tavita.
Na fa’ate’ia Iosefa ina ua piki i luga e Tavita se tusi ma fa’aali atu ia te ia. E tuai le puna mai o Iosefa e se’i atu le tusi mai lima o Tavita, ae tau ai le tusi I ona foliga, ma toe pa’u atu aga’i i tua i luga o le nofoa.
Ua oi Iosefa ma u’u ona foliga i le tiga i le taina e Tavita, i le tusi lea sa ia mauaina i lalo o le moega a Iosefa. O le tusi lea po o le ‘diary’ lea, ua leva ona saili e Tepora ma Tavita.
“Ou te fia iloa, po o fea na e maua ai le tusi lenei. Aua na ou fiu e su’e le fale o Rasela, i le po na maliu ai, ae ou te le i mauaina,” o le tala lea a Tavita. Ma savali atu lava i le mea o saofai mai ai Iosefa. Ae o le taimi lea ia Iosefa, ua na o le faamimigi agai tua i luga o le nofoa, i lona fefe ia Tavita.
E FAIA PEA.