TU LUA O PO MA AO
VAEGA 2
E faatalofa atu I le mamalu o le atunu’u I lenei taeao fou. E viia pea le alofa ma le agalelei o le Silisili Ese ona o lana pule faasoifua ua taitaia mai ai lo outou soifua laulelei I lenei taeao segisegi. Ae alo maia mo le sosooina o le tatou FAGOGO I lenei aso.
****************************************
Na pei e feosofi le vaega lea o lo’o saofafai I luga o le laulau, ina faalogoina le patia pa ta solo mai o mea I totonu o le fale. Manatua o lea e nonofo faataali’o I le laulau I totonu o le umukuka ia Tavita, Tepora ma isi e to’afa, faatasi ai ma le tamaitai faataulaitu pepelo lenei o Tina, ae o lo’o pogisa atoa le fale, sei vagana ai le tamai moli matagi lea o lo’o ola I le ogatotonu o le laulau.
“Aua le faapopoleina se tasi,” o le leo malu lea a le tamaitai o Tina. “Ua na’o ni agaga o lo’o taumafai e faailoa mai lo latou auai mai. O le igoa o lenei agaga, o Senefa, ma o ia sa avea ma se faifeau I Aikupito a’o soifua o ia. Ma o le a ou taumafai ona fesoasoani e fa’ailoa atu se feau taua o lo’o ia taumafai e ta’u mai”.
Na ona uma lava o le tala a Tina, amata ona tete atoa lona tino pei o se tagata ua maua I se ma’I lili. Ae o le taimi lea, ua le emo mata o Tavita mai ia Tina ma ana taga o lo’o faia.
A’o fa’aauau pea le tafiti solo o Tina, ae o le taimi lea ua lue ma le laulau ma amata ona masi’I a’e I luga, e pei o lo’o si’I I luga e ni tagata.
O le faateia o I latou na iai I lea taimi, na mafua ai ona aveese o latou lima ma luga o le laulau. “Aua le aveesea outou lima ma luga o le laulau,” o le toe leotele mai lea o le faatonuga a Tina.
Na vaaia le toe sau I lalo o le laulau ma toe tu lelei I luga o le foloa o le umukuka. Ae ua amata fo’I ona mou malie atu le tete o le tino o le tamaitai o Tina.
Ae tete’I tagata uma I le ‘Aue’ a se tasi o I latou sa I le laulau ma faasino lona lima aga’I I luga o le fa’alo o le fale. Ua tau fai autilo uma tagata I luga o le faalo o le fale ma latou vaaia ai se tino o se tagata, ae faapena le vave ona toe mou ese atu.
Ae o le taimi lea na toe vaaia ai le alu ane o se lima o se tagata I tafatafa tonu lava o Tina ma toe nimo aga’I ilalo o le laulau.
Na faalogoina le pa’o o totonu o le potu ma ni logo tata.
Na faapea mai Tina, “O lo’o ua iai se feau taua o nai tina ia e toalua o I totonu o le potu.” Ma ia tilotilo sa’o atu lava I nai mafine e toalua, e ese mai ia Tepora, lea e faatasi I luga o le laulau. “O se feau taua mai I sa luau o mamae na maliu I se taimi lata mai,”
“Auoi, ai o se loomatua o Tisema,” o le tali mai lea a se tasi o fafine.
“O lo’o momoli mai ona alofaaga,” o a Tina lea. “Ua fai mai o ia, e mafai ona ia tu’uina atu ia te oulua se fautuaga saogalemu e tusa ai ma le tausiga o a oulua tupe. Ua faapea mai o ia, o le a oulua feiloai ma se alii I se taimi lata mai. O le a ia ofoina atu se avanoa taua e inivesi ai a oulua tupe. Ia oulua talia lea avanoa.”
“O ai le igoa o lea alii?” o le fesili tauanau atu lea a se tasi o mafine.
“E le mafai ona ou ta’u atu,” o le tali mai lea a Tina. “Ae o le a ia iloa oulua aua o le a ia ta’u atu le igoa o si a oulua uo lea ua maliu”.
“Oka, faafetai lava,” o le musumusu mai lea o nai fafine nei.
Na faateia le aofia na potopoto I le toe masagi I luga o le laulau ma faateteleina le pa’o solo mai o totonu o le fale.
“Ua seisi agaga ua faatasi mai, ma o lo’o iai se feau taua o lo’o ia fia tu’uina mai mo Tepora,” o le tala lea a Tina.
E FAIA PEA!