VAEGA 63

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina

*************************

Na gata mai le tatou Fagogo i le vaiaso ua mavae, i le taimi o lo o fai ai tuliga a Tepora ma le alii lomitusi i totonu o le fale o le alii lomitusi, lea o lo o taumafai e fasioti Tepora ona ua leaga le ulu, ona o lo o manao le alii lomitusi e tago Tepora e fafagu mai le agaga o lona toalua lea ua maliu.  O lona toalua lea na tago fasioti i le po o le la faaipoipoga ina ua na mateia le tupua a lona toalua fou, o lo o alu lava le ulu i lana manamea tuai.

A o tamo’e solo Tepora e saili se faitotoa i totonu o le fale a le alii lomitusi e sulufai ai, ae faate’ia o ia i le matala mai o se faitotoa ma toso atu o ia e se tagata i totonu o le potu.  Sa le mafai ona e’e Tepora mo se fesoasoani, ona o lo o mau le u’u a le tagata lea i lona gutu ina ia aua nei pisa.

E tepa ifo i luga Tepora, o Tavita lea o lo o u’uina o ia.  Sa faia mai taga a Tavita ia Tepora ina ia aua ne’i pisa.  Ma sa luelue atu le ulu o Tepora.  Na toe gego mai Tavita, e nofo i totonu o le potu, ae o le taimi lea ua tatala lemu ai e Tavita ia le faitotoa ma tolotolo mai i fafo.

Na lagona e Tepora le faa pa solo e le alii lomitusi o lana fana ma tauvalaau lona igoa.  Ae o le gatete o le tino o Tepora, sa na o le faatu lava i totonu ole potu pogisa lea na tuua ai o ia e Tavita ma faatopetope ana tatalo.  E le i umi lava ae faalogoina e Tepora le leo o Tavita o valaau atu i le lomitusi, “Tu’u i lalo le fana!”  Ae faalogoina loa e Tepora le toe pa o le fana.

Ua e’e Tepora ona o lona mantu ua fana e le alii lomitusi ia Tavita.  Ua oso mai fafo o le potu, ua le toe popole i sona saogalemu.  Ae e tamo’e mai Tepora, o lo o tu Tavita, ae o lo o taoto atu le alii lomitusi.  “Ou te le i fai atu e te faatali mai i totonu o le potu?” o le ote mai lea a Tavita.  Ae o le taimi lea ua tamo’e atu Tepora ma fusi mai lona ua.  Ma na faapena ai lava ona o la tutu ina ua taunuu atu leoleo.

O le aoauli o le aso na soso’o ai, sa faatasitasi atu ai Tavita, Tepora, o le alii o Iosefa, o uso o le tina o Tepora ma le teufale a le tamaitai o Tina, i le ofisa o leoleo mo le toe faamaninoina uma o mea sa tutupu.

E nofo fua lava Tavita ae o lo o le manofo lona mafaufau, pe ana faapea e fai sina tuai atu i le fale lomitusi, semanu e tupu se faalavelaev ia Tepora. 

“O lona uiga sa faauo atu le alii lomituis ia Rasela ma Tina, o le mafuaaga lena ua maliliu uma ai la’ua?” o le fesili lea a le taitai leoleo.

“Ioe, na ou masalosalo lava ona o pepa ia sa ma mauaina ma Tepora mai i nai loomatutua ma toeaiina lea sa ia lomia, lea na mafai ai fa’aaoga e Iosefa e gaoi mai ai a latou tupe,” o le tali atu lea a Tavita.  Ae o le taimi lea ua na o le lili vale o Iosefa.

“Sa fa’aaoga e le alii lomitusi ia Rasela ma Tina e fai a la fa’aaliga tau fa’avalea lea e faatalanoa ai agaga o tagata o aiga ua maliliu a nai loomatutua ma nai toeaiina.”

E FAIA PEA!