VAEGA 16

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia toso mai loa lou fala ma fa’auau loa lau faitau i le soso’oga o le tatou Fagogo.

********************

Ua tilotilo atu nei Tepora ma le le mautonu o ona manatu, ia Tavita, ona o le faamatalaga a le taitai leoleo lea ua fai mai, i le igoa o Tavita lea o lo’o tusia i luga o uati e lua ia sa maua i luga o fatafata o fafine e toalua ia ua fasiotia e le tagata.

Ae o le taimi lea ua na o le sioa mai o Tavita ia Tepora, po o le a lana taga o le a fai.

Ua oso atu Tavita ma u’u le lima o Tepora ma faapea atu I le taitai leoleo, “O lea o le a ou alu e momoli Tepora i lona fale.  E mafai ona maua a’u i le telefoni pe afai e iai nisi fesili mo a’u”.

Ua pei se tagata o te’i valevale ifo, le savali tau sulusulu atu o Tepora a’o savali Tavita ma toso lona lima.

Ua la nonofo i totonu o le taavale, ona faapea atu lea o Tavita, “Ou te le i fasiota fafine la.”

Na tali Tepora, “Ou te talitonu ia te oe.  Na maua se avanoa e te tilotilo ai i totonu o le fale a Tina pe na iai lana ‘diary’?’

“Ioe, sa mafai ona ou sueina le fale, ae e leai se ‘diary’ na maua ai,” o le tali lea a Tavita. “Ae e iai so’u talitonuga, ua ta latalata i le mauaina o le tagata fasioti tagata, fua i lona tago tusi lo’u igoa i luga o uati ia sa maua i luga o tino maliu o fafine ia.”

“Aisea ua e manatu ai faapena?” o le fesili lea a Tepora.  “Ae o ai foi na tusia tusi ia na kiliva mai i le taeao ananei ae Saini ai le igoa o Tina?”

“Ou te le o mautinoa, ae e foliga mai, na mana’o le tagata lea na aumai ai tusi ia, e ta te iai i le fale o Tina i le taimi o iai leoleo,” o le tali lea a Tavita.

“Ae aisea?” o le fesili a Tepora ma faanunumi lona muaulu a’o tau mafaufau i se tali o nei mau fesili.

E foliga mai, ua leai lava se tali e mafai ona manino ai le mata o le vai, ae ua na ona atili ai na nenefu le mataupu.

Ua aga’i atu nei le taavale a le to’alua, ma o la mafaufauga ua numi faasoloatoa I le tele o fesili ua tula’I mai e uiga i le maliu faafuasei o Tina ma uati e lua ia na maua, o tusia ai le igoa o Tavita.  Aua e foliga mai e iloa e le fasioti tagata le mea lea e tau su’e e Tavita ma Tepora.

Ua tu le taavale i luma o le fale o Tepora, ua oso i lalo le tamaitai ae ua aga’i atu Tavita i lona fale mo se malologa.

O le aso na soso’o ai, na usupo ai lava Tepora I le fale o Tavita ona o lona naunau lava ina ia saili tali i fesili o lo o fenumia’i ai lona mafaufau.  Ae peitai, e taunuu atu Tepora, ua leva na alu TAvita I le ofisa o leoleo.  O lea na faataalise atu ai Tepora i le fale o leoleo e talanoa ma Tavita ma le taitai leoleo.

E ulu atu loa Tepora i totonu o le potu o iai Tavita ma le taitai leoleo, ae faapea loa le tala a Tavita, “E iai lava lo’u talitonuga, o le mafuaaga o nei faalavelave e lua, ua mafua ona o tupe.”

E FAIA PEA!