VAEGA 17

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ia ae saga’i mai loa o le a toe fa’aauauina atu le tatou Fagogo i le tama o Tavita ma le tamaitai o Tepora, ma le tau sailiga o le tagata na fasiotia Rasela ma le faataulaitu pepelo o Tina.

********************

Na gata le tatou Fagogo i le vaiaso ua mavae, ina ua ulufale atu Tepora i le potu o talatalanoa ai le Taitai Leoleo ma le alii o Tavita, ae faapea loa le faamatalaga a Tavita, e iai lona talitonuga, ua mafua uma nei mea e tutupu, e aofia ai ma le fasiotia o Rasela ma Tina, ona o tupe.

Ua saofai ifo le tamaitai o Tepora i lona nofoa, ae o le taimi lea ua lologo taliga o le Taitai Leoleo i le faamatalaga a Tavita.

Sa fa’aauau le faamatalaga a Tavita e faapea, i fa’aaliga faataulaitu e Rasela ma Tina, e tasi lava le mea o lo o ia maitauina e tutusa lelei ai.  O le valaauina lea e mafine ia e toalua o le agaga o se tagata ua maliu e talanoa mai pe uunai le tagata o lona aiga lea na auai i le li’o i po ia e fai ai talanoaga a tagata ua feoti ma tagata feola, e inivesi a latou tupe i se teugatupe a se faalapotopotoga.

Na ta’ua e Tavita, o le po sa faia ai faiga taulaitu a Rasela, sa iai se agaga o se tagata maliu na fai mai i lona toalua sa auai i le faaaliga i lea po, o le a iai se tagata o le a faafesoota’i atu o ia e tusa ai ma se faalapotopotoga inivesi, ma sa uunaia e le agaga o lea tagata maliu ia lona toalua, e alu e ave se tupe e inivesi pe tau ai i lea teugatupe.

Ma sa fa’aalia e Tavita, sa faapena foi le mea na tupu i le po lea sa la auai atu ai ma Tepora i le fale o Tina.  Na fa’atalanoa mai foi e Tina se tagata maliu ma ia uunaia se tasi o i latou lea na auai i le fa’aaliga i lena po, a fai atu se tagata ia te ia, e avatu sana tupe e teu i se teugatupe…ona ave lea iai.

O le manatu lea a Tavita, o le sootaga lea o fa’aaliga faataulaitu a Rasela ma fa’aaliga faataulaitu a Tina, ma i sona talitonuga, o le mafuaaga lea ua fasiotia ai i la’ua. 

Na fai sina umi o le taimi o nofo le Taitai Leoleo ma faataupupula ia Tavita, ina ua uma le faamatalaga a Tavita.  Ua le mautonu le Taitai Leoleo aua manatua foi, na maua i luga o tino maliu o Rasela ma Tina ia uati o lo o iloa ai le taimi na fasiotia ai la’ua, ae o le igoa na i luga o nei uati, o le igoa o le alii o Tavita.

E FAIA PEA!