Ads by Google Ads by Google

TU LUA O PO MA AO, VAEGA 2

Fagogo logo

E faatalofa atu I le mamalu o le atunuu I lenei taeao fou.  E ao pea na mua mea I Matautu Sa e pei o lea muagagana, e viia ia le agalelei ma le agaalofa o le Atua ia I tatou o Lana fanau agasala.  Na faagataina mai la tatou tala Ina ua maua e le alii leoleo suesue o Tavita Ioanetone ia se fasipepa I le fale o se tamaitai ua maliu, ma le igoa o Tepora Uatisone o tusia ai I luga.  Se’e maia i ou seetaga malu ae se’I toe soso’o atu le tatou tala.

**************************************

O le 9 I le taeao na soso’o ai, na tu ai Tavita I luma o le faitotoa o le fale a Tepora.  “Susu mai I totonu,” o le faafeiloa’I atu lea a Tepora.  “Pe iai se agasala a lenei aiga ua asia ai I matou e lau susuga, I le alii malu o le malo, I lenei taeao segisegi,” o le tala ata lava lenei a Tepora a’o ia taitaia atu ina Tavita I totonu o le potu malolo o le fale.

“E faamalie atu I le solivale ina mai o le maota,” o le faalalolalo atu lea a Tavita. “Ae ua ou o’o mai ona o le tamaitai o Rasela Salemana lea na maliu I le aso ananafi.”

“Ioe, ou te masani ia Rasela…talofae,” o le tala lea a Tepora.  “Ae ou te le malamalama pe aisea ua e o’o mai ai I lenei taeao.”

“Ou te fia iloa pe aisea na e iai I lona fale I le 9:00 talatu anapo,” o a Tavita lea.

Na faateia Tepora I le fesili a Tavita ma ia tuufesili I lona mafaufau, pe na faapefea ona iloa e lenei alii, sa iai o ia ile fale o Tepora I lea po.

“Ou te iloa o se mafuaaga e na o a’u e aoga iai,” o le tali faatopetope lea a Tepora.

Sa le’I iloa e Tepora le taimi na tula’I ese ai Tavita mai I lona nofoa.  Na faate’ia o ia ma taumafai e sola ese, ina ua ea ifo I luga, ua tu Tavita I ona luma tonu lava.  Na taumafai Tepora e valaau I ana auauna mo se lavea’I, ae na aapa atu Tavita ma tapuni le gutu o Tepora I lona lima ma uumau ona lima.

Na toe fesili Tavita ia Tepora, “E faapefea ona e masani ia Rasela?”  Ma ia tu’u ese lona lima mai I le gutu o Tepora.  Sa tali tau musumusu Tepora, “Na faato’a ma feiloai ma Rasela anapo.  Na ma asiasi iai ma uso o lo’u tina, e toalua, e matamata i lana polokalama, o le taumafai lea e talanoa I agaga o tagata maliliu.  E toalua nisi tagata na matou iai faatasi I lea po, ae ailoga e mafai ona o la fasiotia Rasela, ona e fai lava sina matutua o la’ua soifua.”

Na toe faamaamulu e Tavita ia le tamaitai o Tepora ma ia savali atu ma tu I le faamalama ma autilotilo I fafo.

Na toe fesili Tavita, “O a ni mea na tutupu I le polokalama a Rasela I lea po?”

Na lagona e Tepora le mou atu o lona fefe ma ia tali atu ia Tavita, “O mea masani lava I ituaiga polokalama faapenei.  Ta ta luga o le laulau, ma talatalanoa mai Rasela pei  o lo’o talanoa ma se agaga o se tagata maliu.  Sa ia tuuina mai ni fautuaga tau tupe mo si tama matua na matou iai I lea po.”

Na umi se taimi o tu Tavita ma tilotilo ia Tepora, e foliga mai o lo’o ia tau mafaufau leisi laasaga o lana suesuega.  “Sa iai se meat aua lava na gaoia mai I le po lea mai I le fale o Rasela,” o le tala lea a Tavita.  “O lea ou te taumafai e saili po o ai na aveina lenei mea taua.”

“E le o matou ni gaoi,” o le tali mai lea a Tepora, ma si ona siufofoga ua si’isi’I I luga.

Na toe tu Tavita ma sioa atu ia Tepora mo ni nai minute, ona ia faapea atu lea, “Na ou sau I lenei taeao ma lo’u manatu e taumafai e faafefe oe, ina ia e tuu mai le tusi lea ou te tau sailia.  Ae e iai lo’u lagona, e moni lau faamatalaga, e le o ia oe lenei tusi.”

“Aisea le mea e taua ai lea tusi,” o le fesili lea a Tepora.  “Ma aisea ua e manatu ai e matou te iloa le mea o iai lea tusi?”

“O outou na mulimuli lava ona iai ma Rasela, a’o soifua o ia,” o le tali mai lea a Tavita.

E FAIA PEA