E faatalofa atu I le mamalu o le tatou aufaitau nusipepa I lenei taeao fou, taeao manuia, taeao toto’a.  Faamalo le onosa’I, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia toso mai loa lou fala ma fa’auau loa lau faitau I le soso’oga o le tatou Fagogo.

*******************************************

Na gata le tatou tala ina ua faailoa atu e Tavita ia Tepora, o ia ma uso o lona tina, o tagata mulimuli lava lea na talanoa ma le tamaitai o Rasela lea ua maliu.

Ina ua tuua e Tavita le fale a Tepora, na ia aga’I sa’o lava I lona fale mo sana malologa.  Ina ua ia ulufale atu I totonu o lona fale sa aga’I sa’o lava Tavita I le potu malolo, I le mea o nofo mai ai le alii o Eneli Sikoti.  “E te le’I maua le tusi?” o le fesili lea a Eneli.

“E leai, ou te taunuu atu ua maliu Rasela,” o le tali lea a Tavita.  “E iai so’u talitonuga, o le tagata na fasiotia Rasela, o ia foi lea ua alu ma le tusi.  Ua alu anapo ma le taeao ananei o fai a’u suesuega.”

“Afai e sa’o lau tala, o lona uiga, toeititi ona ta faalogo atu I se tala mai I le tagata na gaoia le tusi,” o a Eneli lea.

“E leai, ou te le faatalitali, o lea o le a ou saili po o ai na fasiotia Rasela ma gaoia le tusi,” o le tali mai lea a Tavita.

“O le a lau fuafuaga o iai?” o le fesili lea a Eneli.

“O lea ou te mafaufau I lau uo fo’I lea o Tomasi, lea sa masani ona fai ana suesuega I mataupu e faatatau I tagata ua feoti,” o le tali lea a Tavita.

Na soisoi Eneli, “Ou te le malamalama I tagata ua maualuluga a latou aoaoga ae fiafia e suesue e uiga I tagata ua I tuugamau”.

“E mafai ona e talatalanoa ia Tomasi pe faapefea na masani ia Rasela (le tamaitai ua maliu),” o le fesli atu lea a Tavita ia Eneli.

Na vave ona mou ese foliga toeaina o Eneli ae ua pei o se alii talavou le susulu o ona mata I le talosaga a Tavita, ona o lea ua tuuina atu se vaega o le suesuega ia te ia.

E toe tau fai atu le tala a Eneli ae o la faalogoina loa le pa’o o le faitoto’a I luma, ma ulufale mai le tamaitai o Iulia, le tuafafine a Tavita.  Na tula’I Tavita ma faafeiloai lona tuafafine ma ia faapea atu ia Eneli, “Ia lea ua sau Iulia e fai lua tala, ae se’I o’u alu e fai sa’u moe se tasi.  Ma aua ne’I galo ona e talanoa ia Tomasi,” ma savali atu aga’I I lona potu moe.

I totonu o lona potu moe, sa taumafai Tavita e moe ae ua alu lava lona mafaufau i le tamaitai o Tepora ma le la talanoaga.  O Tepora, ua maliu lona toalua ma o se mafine e fiafia e tusi tala, ua fai sina tele o ana tusi ua uma ona lomia.  Na agai le mafaufau o Tavita I le fale a Tepora, e le o se fale o se tagata mau’oa.  Ua fiu lava la Tavita e toso ese ona mafaufauga mai ia Tepora, ae se’I fai sana malologa, ae peitai, na moe lava lenei alii o lo  tu mai pea foliga o Tepora I ona luma.

E FAIA PEA