Pago Pago - AMERIKA SAMOA

O se tulafono taufaaofi a le Faigamalo na fa’aulu i le Maota Maualuga i le Aso Gafua - ma ua fa’amoemoe e fa’aulu i luma o le Maota o Sui i se taimi o le vaiaso nei - o lo o taumafai ai e toe fa’aleleia le tulafono a Amerika Samoa i le mataupu o le “pesticide, ina ia mulimulita’i i tulafono ma ta’iala a le feterale.

O le tulafono taufaaofi o lo o fuafua e tu’u atu le pule e fa’atino ma fa’amalosia ai le Tulafono o le “pesticide” a Amerika Samoa o le 1979 mai le Matagaluega o Fa’atoaga i le Ofisa o Puipuiga o le Si’osi’omaga a Amerika Samoa (AS-EPA).

E lē gata i lea, ina ia fa'amaonia se feagaiga malilie fa’atasi sainia aso11 Tesema, 1985 ma poloa'iga e lua na tu'uina atu i le 1985 ma le 1987. Ma e aofia ai le tu'uina atu o le pule e fai ai tulafono i le AS-EPA.

O le faatomuaga o le tulafono taufaaofi o loʻo taʻua ai e faʻavae le Tulafono o Pesticide i le lotoifale i tulafono a le feterale ma tulafono faatonutonu, lea na toe teuteu i le 1980.

Talu mai lena taimi, "o le tele o atinaʻe i suiga o le tau, o le faasaienisi o loʻo paʻi i le puipuiga o le siosiomaga, ma upu e fesoʻotaʻi ma nei mea na tutupu i le fa sefulu tausaga talu ai.”

E tusa ai ma le tulafono taufaaofi a le faigamalo, o teuteuga ua fuafuaina i le tulafono o loʻo i ai nei o le "faʻamanino ma faʻamalosia aʻoaʻoga mo pesticide ma faiga faʻamalosia, ma isi, mo le tausisia o tulafono a le feterale e faʻatumauina le teritori i le tausisia o tulafono a le feterale ma tulafono faatonutonu.

O le tulafono taufaaofi o le a faʻaleleia atili ai le pulega ma le tautua a le AS-EPA.

MALOLOGA A LE FONO

O le Aso Gafua fo’i na fa’amaonia ai e senatoa le I’ugafono Malilie Fa’atasi a le Senate mo le malologa aloaia i le ogatotonu o le Fono e amata i le tapunia o pisinisi i le aso 6 Fepuari ma toe usuia i le aso 13 Mati.

O se i’ugafono tutusa a le maota o sui mo le malologa aloa’ia ua fa’amoemoe e fa’amaonia e faipule i le vaiaso nei.

I le taimi o le malologa, o le a malaga atu ai sui o le Fono Faitulafono- o i latou ia o sui o komiti litaea a Fono - i le fono  o le Teugatupe o le Litaea a le malo e faia i Las Vegas ia Fepuari 15 ma Fepuari 16.

I totonu o le Maota Maualuga, o afioga i Senatoa uma e to’a 18 o lo o avea ma totino o le komiti a le litaea, o lo o ta’ita’ia e le afioga i le senatoa ia Soliai Tuipine Fuimaono, ae i totonu o le Maota o Sui e to’aiva sui o le Komiti o Pisinisi/Atia’e o le Tamaoaiga/Litaea o lo o ta’ita’ifono ai le afioga i le ali’i faipule ia Samuel Ioka Ale Meleisea.

O lo’o fa’atupeina lenei malaga e le Teugatupe o le Litaea.