Ads by Google Ads by Google

O le a le tulaga o a’oga i le taimi nei?


[ata: foa'i]

Pago Pago, AMERIKA SAMOA - 

 

O le a tonu le tulaga o i ai a’oga a le fanau i le taimi nei? O se fa’afesili e le o faigofie ona talia sa’o mai a’oga ta’itasi, e oo lava ile A’oga Maualuga a Fagaitua sa tele fa’alauiloaga o le latou polokalama fa’asolo ua aofia ai ma le fa’alauiloaga i matua, ua le o fa’atautaia atoatoa nei lea fo’I taumafaiga ona o tulaga o so’otaga fa’ainiteneti ma ua leai lava ni masini e fa’aaoga e matua ma fanau mo le so’otaga lea.

 

“I le taimi nei, o loo matua sioki lava faia’oga, e le o mafai fo’i ona atoatoa le fa’atautaiga o le polokalama na fa’atula’ia ma fa’alauiloa i matua, ona e le o maua e matua ni mea faigaluega na manatu o le a vave ona lisia atu mo le fa’aaogaina e fanau a’oga,” o se fa’amatalaga lea a nisi o faiaoga.

 

I le taimi nei, i le fanau o lo’o ua a’oga i le Nuuuli VocTech High, ua le toe fa’ava’ava’ai i mea o lo’o sioki ai le tautuaina o fanau i le a’oga, ae ia fa’ataunuu le a’oga mo fanau i nai aso ua fa’atulaga mai e faia ai vasega. Ua ta’i lua aso pe tolu aso o le vaiaso o faia a’oga ma faia’oga, ae o isi aso ua faia mai meaa’oga a le fanau i aiga e fa’aaoga ai le sootaga tafailagi. O lona uiga ua ititi atoa avanoa mo fanau ma faia’oga e feso’ota’i ai i le potu aoga. E mautinoa o le mea lea o i ai uma fo’i i isi a’goa maualuluga. Ae o le fesili, aisea la ua amata vave ai ae le faia pea vasega se’ia mae’a lenei tausaga pe tua ma ni a le fa’ama’I pe oo mai pe leai ona fa’ato’a taumafia lea e fa’atino le fuafuaga lea ua taumafai nei? Ona e le’i oo mai lava le Coronavirus, o lo’o mautaga i tatou e aoao fanau. O le suiga e mana’omia ai mea faigaluega faatasi ma le sootaga a le Initeneti.

 

Ua le fa’atali sui tofia o le atunuu i se tali mai e fa’anofo filemu ai i latou ae ua faia le latou galuega asiasi i a’oga o lo’o aga’i i ai latou fanau i o latou itumalo, ma ua va’aia ai le tulaga, leai o ni kesi ma nofoa mo nisi o le fanau a’oga A’o le mea fo’i e ofo ai, o lea ua a’o’oga tamaiti i isi aso ae malolo i isi aso.

 

Afai fo’i e le o lava faia’oga, ae a lea ua le atoatoa vasega i aso uma, aisea ua le fa’atulaga ai nisi faia’oga e avea isi vasega? O le oka fo’i o Kesi ma Nofoa mo lenei tausaga, ua fa’ato’a taua’aoina, ma ua le gafatia ona fa’ao’o mai i le taimi e a’e tonu ai a’oga. O le a’oga tulaga muamua a Tafuna, fa’apea ma Tafuna High, lea ua fa’ailoa mai, ua avane ni laulau ma nofoa o lisia e le matagaluega e fa’aaoga, ae ua galo ai fo’i le a’oga sili ona to’aele a Pavaiai. O iina lea sa maua atu e latou sui tofia i le fono faitulafono, o loo nonofo mai fanau i le foloa ma tusi api.

 

O lo ua molimauina mai e nisi o matua, e leai ma ni vasega o fa’atautaia mai le fale e oo atu i le potu a’oga i aso nei e nonofo ai fanau i le fale. Ua na’o meaa’oga ua aumaia i fanau o lo’o fa’aaoga i ai ma le aso atoa lea ua misia ai vasega i potu a’oga.

 

Ua fa’ailoa mai fo’i e le o lelei pe o lo’o pe fo’i le Initeneti i a’oga ta’itasi i le tele o taimi, o lena tautua e fa’amoemoe i le vaega o alii ma tamaitai o lo’o faigaluega o nisi o le tekonolosi fou i le Erate a le Matagaluega o a’oga.

 

Ua i ai rauta i totonu o a’oga e feso’ota’i ai potu uma o lo’o fa’atautaia ai vasega ma le Ofisa autu lea e fa’atula’ia ai lea auaunaga. E tatau ona ola lelei lea tulaga ina ia mafai ona faia vasega e fa’aaoga ai le Initeneti i potu a’oga uma. Afai e le’i mautu ona fa’aola uma fa’apea potu a’oga, o lona uiga e le’o mautinoa fo’i e mafai ona fa’atautaia vasega sootaga a faia’oga ma latou fanau a’oga i taimi uma, ae maise i aso e nonofo ai i aiga.

 

Ua matauina e matua, e tuua le potu aoga e le faia’oga, ae alu i le ofisa lea e i ai le sootaga o le Initeneti e fa’aaoga ina ia fa’atulaga mai ai lesona a lana vasega. O lona uiga e le’i mafai ona fa’aaoga atoatoa sootaga sa tatau ona fa’aaogaina e faia’oga i le taimi nei ua fetogia’i ai vasega a le fanau a’oga.

 

O le mea ua fa’ailoa nei, ua mafai ona faia fa’atasiga tetele o sauniga lotu, ma kemupeni tetele i le atunuu, ae ua le mafai ona faia a’oga se’ia oo i le taimi e tatau ai ona taofia loa inau a ulufale mai le Coronavirus i le atunuu.

 

I le talanoa mai a nisi o faia’oga mai a’oga maualuluga, ua latou le manatu ina ia fa’aumiumi ona faia fa’apea a’oga a le fanau. Ua iloga mai ua i ai fanau ua le mafai ona faia meaa’oga aua e leai ni mea e fa’aaoga e i latou i o latou aiga. Ua fa’aaoga telefoni ma ua fa’ateteleina tupe e fa’aalu e matua e fa’atau ai data mo le sootaga, ae ua itiiti tele lea mea faigaluega mo le fa’afaigofie ai o meaa’oga a le fanau.

 

“Ua leai ni meaa’oga a le fanau o feso’ota’i ai ma lona faia’oga i le aso lea e malolo mai ai i le a’oga. Ua fa’atulaga mai Homework e tele mo le fanau e fai, a o atu la i vasega, ona fa’ato’a faia lea o fesili. O lea ua fa’amoemoe tele le aoga i le taimi nei i le faia e le tamaititi o lana homework i luga o le Initeneti, a motusia lea so’otaga, ua leai se aoga a le fanau,” o le molimau lea mai se tasi o matua na pulunaunau ia ona iloa fesoota’I ma faia’oga o lana tama i luga o nei laina, ia le misia fo’i le aoaoina lelei o lana tama e ala i lenei faiga fou.

 

Ua matauina e le o fiafia le to’atele o faia’oga i nei suiga, e lei lava fo’i le taimi o le matagaluega ma le vasega o faia’oga e fa’aaupegaina i latou i mea uma e mafai ai ona latou faia le galuega a’oa’o o le fanau i potu a’oga e fa’aaoga ai masini o le talutalufou, lea e le’i oo mai se oka. “O nei mea uma ua fa’ailoa i matua, e maua masini e fa’aaoga ae lisia atu i aiga. O tablets, chrome books ma Ipads, peita’i e le’i o’o le malosi o lea fesoasoani i le tauofoga o se Kamupani e fa’amatuu atu i ai le galuega o le oka mai o nei mea faigaluega aoga tele i a’oga  a le fanau a le atunuu.”

 

“I le taimi nei e le o mafai lava ona fa’atino se mea ae leai ni auupega o le taua lea. O lo ua mamao i luma le faiga o le fa’alauiloaga, ae ua le mafai ona fa’atino, ma i lo’u lava iloa o se faia’oga, e tatau ona toe fa’afo’i a’oga i le potu a’oga, se’i lava tapena mai le matagaluega e faia a’oga a le fanau e fa’aaoga ai mea faigaluega nei e le’i oo mai.A faaletonu lagona o le faia’oga e fa’atuataia lana vasega, e sili atu ona le mautonu le fanau o lo’o ia aoaoina,” o se tala lea a se tasi o faia’oga toa na fa’ailoa mai lona lagona, ae ua le manatu e fa’ailoa lona igoa, ona o tulaga le ma’alofia e oo mai ai.

 

O nei mea uma ua fa’ailoa, peita’i ua fa’ailoa manino e le Fa’atonu o Aoga, e matua leai lava se pule a’oga e to’atasi na fa’ailoa atu ni fa’afitauli o feagai ai ma latou faia’oga, poo i latou fo’i, i le fa’atautaiga o latou aoga i a’oga ua pulea ma va’aia fa’apitoa e i latou. O le fonotaga lea ma pule a’oga sa fa’ataunuu i le aso Faraile ua te’a.