Pago Pago - AMERIKA SAMOA

Ina ua fa’afaigata mea ua tula’i mai e ao ina ave i ai le fa’amuamua a le tatou Malo ma ona ta’ita’i,  sa tusi ai Kovana Lemanu Peleti Mauga i le afioga le Palemia o Samoa e tolopoina le fonotaga a “Atoa o Samoa” ia faia ia Oketopa. 

O le fonotaga sa fa’atulaga mo le amataga o Setema 2022. Peita’i sa toe fa’ailoa e Lemanu i le Palemia o Samoa, Fiame Naomi Mataafa, o lo’o feagai le tatou Malo ma nisi o faalavelave fa’aolioli mai fa’anatura e ao lava ina mua’i taga’i toto’a i ai, ma ave i ai le fa’amuamua ona o lo’o lamatia ai le nofo filemu o agaga o le to’atele o tagatanuu lautele o Amerika Samoa ae maise i le Manu’atele.

Sa fa’ailoa atu i lenei tusi, “Ae ua ou manatu ina ia fa’atofa malie lau afioga ma le faigamalo, ona ua i ai ni tuaga ua tula’i mai ua le talafeagai ai so matou avanoa i aso ma le masina ua fuafuaina mo le tatou fono fa’avaomalo. Atonu ua le o toe po malae i la outou fa’afofoga i luga o fa’asalalauga i leitio ma nusipepa, i se tulaga ma’ale’ale o lo’o feagai nei ma le Motu o Manu’a, o lo’o nofo vaava’aia ona o le Maugamu o Vailuluu, e ono afua ai ni fa’alavelave e tulai mai i se taimi o i luma, ae le gata i lea, o nisi fo’i fuafuaga fa’alemalo ua tula’i mai i lenei itu, ua le ma’alofia lava.”

“Ou te fa’amalulu atu ai, ua le talafeauga le uto ma le maene, ua le fepi’ita’i fo’i le suaki ma le matagi, ona o fa’alavelave fa’anatura e tutupu i le tatou Siosiomaga. Ou te tatalo ma ou fa’aoloolo ma’au atu ai, pe tusa ai ma sau fa’atofala’iga, ua manatu lenei itu i le Faigamalo a Amerika Samoa, pe tuu atu le tatou fonotaga i le masina o Oketopa Aso 13-14, 2022 ae tusa lea o le 14-15, 2022 i la outou Kalena faitau aso. O se lagona lena ua lafo atu i lau afioga ma le Malo o Samoa pe afai e tusa so outou finagalo.”

I le fa’atau siusiuga o le tusi sa toe folasia aloa’ia ai mataupu uma sa talanoaina i le fonotaga ia Iuni lea na talimalo ai Amerika Samoa. 

SOiFUA MALOLOINA

Sa taufai fa’amalo ma fa’afetaia e sui sa fa’atasia gaoioiga uma sa fa’atautaia fa’aleuso  i le vaitau na lofia ai le Atu Samoa atoa i le fa’ama’i o le Covid-19. Ua iloga ona sologa lelei le tulaga so’ona afaina o malo e lua i le fa’ama’i ma ua fa’aititia lava i latou na maumau le soifua ona o le Covid-19, ona sa maua le galulue fa’atasi mo le fa’amoemoe e tasi, ia le so’ona afaina le mamalu lautele o malo e lua, Samoa ma Amerika Samoa, i le fa’ama’i ina ia ulufia ai i tatou uma.

Ua latou malilie fa’atasi e afua ona maumau le soifua o e uma ua maliliu i le fa’ama’i Covid-19, ona o le tele o gasegase tumau ua mua’i maua tumau ai sui ua maumau le soifua. Ua fautuaina atili le mamalu o le au usufono ma e galulue i Matagaluega o le Soifua Maloloina i le Atoa Samoa, ia matua fa’alauiloa, tima’i ma lapataia tagata lautele ina ia fuafua tatau le so’ona tausami i mea’ai e a’afia ai le soifua i nei gasegase tumau.

Ua fautuaina matagaluega o malo na lua, ia matua fa’aaoga tatau ala e feso’ota’i  ai ina ia tima’ia ma lapata’ia le mamalu lautele o Atoa Samoa, ia tausami i mea’ai paleni ma ia fa’atautaia fa’amalositino pe afai e le o lava le fa’agaoioia o le tino i galuega fa’atino i aiga i aso ta’itasi. Ua fa’afetaia fo’i le feso’ota’i lelei a Atoa Samoa i le vaitau na pesia ai fo’i le Atu Samoa i le Misela, ae ua fa’amalosia lava le galulue fa’atasi pea a’o faimalaga atu i le lumana’i.

TAMAOAIGA TAUSI

MO Fefa’ataua’iga: Ona o le fa’amoemoega tonu lava o le tamaoaiga tausi o so’o se malo e pa’u tonu lea i fefaataua’iga ma e mana’omia lava ona lelei fela’ua’iga, galuega fa’atino i luga o Uafu ma Malaeva’alele ina ia vave kilia ae fa’aoo oloa i luga o fata o faleoloa mo fefa’ataua’iga, o lea ua tofu malilie ai sui o malo Samoa na lua, ia fa’apu’upu’uina atili le kiliaina o oloa mai luga o uafu, ma e tatau ai ona faia se a’oa’oga fa’apitoa mo sui uma e faigaluega i nei matata i le va o Samoa na Lua, ina ia vave ma sa’o lelei. Ua tuuina mai fo’i e Amerika Samoa se talosaga ina ia latou toe aiaia lava le totogi o le Lady Naomi ma le Fotu o Samoa lea e tatau ona totogia mo ana malaga togipau pe a moomia lea tulaga e Amerika Samoa.

Peita’i ua moomia mai e Samoa se sootaga mautu lelei e mafai ai ona talanoa sa’o mai Samoa Ministry of Transportation i le matagaluega o Uafu ma Malaeva’alele i Amerika Samoa nei ina ia fa’afaigofie atili lava galuega tau fela’ua’iga ma fefa’ataua’iga i le va o Samoa na Lua.

Mo Tagata Maimoa Mai Fafo -Turisi: Ua malilie itu e lua e tatau ona fesoota’i fa’asalalauga fa’alaua’itele e fa’atosina mai ai le tele o Turisi e fia maimoaina le Atu Samoa i taimi uma. E aoga tele le sootaga o le E-Commerce mo le Atoa Samoa.

Mo Aufaigaluega - tupe maua mai ai: O le vaega lea o le talanoaga sa latou feutaga’i ai i tulaga o tagata faigaluega mai Samoa mo Amerika Samoa, ma o le a fa’ateleina ai le tupe lafo atu i Samoa mai o latou aiga ua faigaluega iinei. Ua fa’aauau pea lava ona fa’ailoa mai e Samoa, o lo’o moomia pea ona maua avanoa faigaluega mo latou tagata lautele mai Samoa, ae maise lava ua mae’a a’otauina i tomau fa’apitoa e aoga tele i le fausia o se malo mautu e ala i galuega e fa’atino i le fausaga o alatele, faletetele ma pisinisi fo’i. Ua fa’ailoa e Amerika Samoa le moomia lava ona fa’amalosia o tulafono uma ua mae’a fa’ata’atitia mai e le Malo Tele i tulaga o oloa gaosi ma fefaataua’iga i le va o Malo e lua.

A’OGA

Ua fa’ailoa mai e Samoa, o lo’o ua mafai ona maua ni avanoa lelei e mafai ai ona fa’aulu atu nisi o fanau a Amerika Samoa i A’oga Maualuluga i Samoa, ae maise lava i le NUS ma le OUM lea e aoaoina fa’apitoa ai nisi e fia avea ma Foma’i poo tausima’i.  Ua le gata i lea ae ua i ai fo’i le vaega o le NUS ua a’oa’o patino ai fanau e fiafia e avea ma Ali’iva’a i so’o se ituaiga o va’a folau, vaa lau pasese, va’a oloa  ma va’a fagota.

Ua fa’ailoa atu fo’i e Amerika Samoa ua mafai ona fa’aaogaina faia’oga mai Samoa, ma ua mafai ona talosaga mai e ulufale mai i le Pemita mo Tagata Faigaluega i Amerika Samoa.

FA’AMAUMAUGA & FESOOTA’IGA TAU TEKONOLOSI

O le Hawaiki Cable a Amerika Samoa ua matua aoga ma lava le malosi’aga e mafai ai ona fa’aleleia tumau le sootaga taifa’ilagi mo nei ituaiga o pisinisi fa’atautaia i le va o Samoa na lua ma isi atunuu uma lava i le lalolagi tele. O le sootaga fo’i lea e feso’ota’i sa’o lava ma Amerika. Ua mae’a silafia lelei e Samoa na lua lea tulaga i sootaga tau tafa’ilagi e ala atu i le Hawaiki Cable ua fa’aaogaina nei e Amerika Samoa.

FEMALAGAIGA

O le mana’oga fa’apitoa a Samoa, o le faigata o lo’o i ai nei mo sui e fia malaga mai i Amerika Samoa ona o le fa’aaogaina lea o le TalofaPass, ae maise lava i latou e fia malaga mai i le Pemita mo Fa’alavelave ma aumalaga mai Samoa e fa’aaogaina ai le Pemita 14 Aso. Na talanoaina fo’i le toe fa’afo’ia atu o e nofosala iinei ma o le fa’ai’uga fo’i mai le fa’amasinoga e tatau ona toe fa’afo’i i le mae’a ai o le latou taimi na tulia i le falepuipui i Amerika Samoa. Ua faailoa mai e sui mai Samoa, “E le o i ai se afaina i lea tulaga, e talia lava e i matou o matou tagata ua toe fa’afo’ia atu, ina ua mae’a ona tulia fa’asalaga iinei.”

FA’ATO’AGA MA FAIGAFAIVA

Ua malilie fa’atasi Samoa e lua o le poutu lava o so’o se malo o latou fa’aeleeleaga ma faigafaiva, o alamanuia nei sa toina mai e le Atua Soifua mo le atunuu, ia galueaina le eleele ma ia fagotaina le gataifale. Ia matua fa’aititia lava le faiga fa’asolitulafono i fela’ua’iga o fua o fa’aeleeleaga i le va o Samoa na lua.

Ia usita’ia tulafono o oloa fefa’ataua’iga o fua o faato’aga ma le fua o faigafaiva.

I le taimi nei ua matauina le fa’amoemoe tele o atunuu e lua i oloa mai gaosia mai fafo mo le tausiga o le mamalu lautele o le atunuu, ae ua fa’amatagataga le va’ai i le sao o fa’aeleeleaga ma faigafaiva e mafai ai ona tausia le fofoga taumafa o le atunuu ae maise lava i Amerika Samoa nei.

Ua faailoa fo’i le tulaga le lava o le laufanua i Amerika Samoa e agava’a mo fa’ato’aga e totoina ma fua mai i fua lelei. Ua iloga ai e fa’amoemoe tele le tatou malo i fua o fa’aeleeleaga mai Samoa ae maise i taimi fa’aletonu o le soifuaga fa’anatura e lamatia ai le olaola mautu lelei o fa’ato’aga. Ua talanoaina fo’i aiaiga tatau o pepa fa’atumu mo aiaiga o fefa’ataua’iga o fua o fa’aeleeleaga ma faigafaiva.

Ua fa’ailoa mai fo’i le tele o suesuega fa’asaeanisi ua faia i mataiai a le atunuu o fua o fa’aeleelaga, ma ua gaosia ai oloa e mafai ona fefa’ataua’i i le va o Malo e lua, ae maise fo’i o le mafai ai ona fa’aaogaina tatau e le Malo o Amerika Samoa le SROS lea e faia ai nei suesuega, mo a latou fo’i suesuega e fia fa’atautaia aua oloa e auina atu i fafo i maketi e pei o Amerika.

TAU & FESUIAIGA FA’AFUASE’I O LE TAU

Ua matauina e tutusa lava Atoa Samoa i tulaga o fesuia’iga fa’afuase’ia o le Tau pe a oo ina tula’i mai. Ua a’afia ai le gataifale ma ua faapena fo’i i laufanua ona o matagi malolosi, peau sousou maualuluga, ma le tulaga o timuga ma le so’ona malosi o le vevela o ave o le la.

Ua a’afia le gataifale i le so’ona vevela o le suasami ma ua suia ai le nofolemu o meaola uma o ofaga ai. Ua a’afia le ‘amu fa’apea ma isi uma a’afiaga fo’i o le so’ona toulu o timuga mamafa ma ua so’ona tatafe ai fo’i le suavai ma tafea ai le tele o le eleele e fa’amautu atu i le sami, ua avea ma se isi fo’i fa’aletonu tumau i le ola lelei ai o meaola uma i le gataifale.

Ua tatau ona nofouta Atoa Samoa i nei fa’aletonu fa’anatura ona o suiga o le tau o i ai nei. Ua manatu le Atoa Samoa ia matua galulue malo e lua e fa’aleleia le Gataifale ma ia tima’ia le mamalu lautele o le atunuu i ala e mafai ai ona fa’aauau pea le fa’aleleia o le Gataifale tusa poo le a lava mea e alia’i mai ona o le fesuia’iga fa’afuasei o le tau i le atuvasa.

TUPE & TEUGATUPE & FALETUPE:

Mai le tele o tausaga, e le o faigofie i le aufaipisinisi a Samoa ona faia atu fefaatauaiga mai Amerika Samoa ona o tulaga o faletupe ma teugatupe. Ua maua foi se avanoa o faletupe mo fefa’ataua’iga i le malo o Amerika Samoa nei, pe afai o le a malilie i ai Atoa Samoa. O lo ua mafai ona fa’atautaia Western Unions mai Samoa iinei, ae faigata ona faia teugatupe. Ua fa’ailoa mai fo’i e sui mai Samoa, ina ia manatu Amerika Samoa e faia latou teugatupe teu mau i Samoa ona o lo ua vavalalata ma e faigofie fo’i ona tala mai ma fa’aaoga i ni poloketi aoga.

VA FEALOA’I FA’AVAOMALO

Fa’ailoa mai e Samoa e tatau ia Amerika Samoa ona auai i soo se fa’alapotopotoga lava e fa’atula’ia fa’avaomalo a le atuvasa o lo’o tatou so’otaga vavalalata i ai. E aoga lea i le aotelega o mataupu ogaoga i le Atuvasa aua e tutu fa’atasi malo fa’aatumotu ina ia maua le aotelega o se fa’ai’uga lelei mai malo tetele o le lalolagi.

E mautinoa e i ai lava mea lelei e mafai na fa’aosofia mai le auai i le tele o fa’alapotopotoga fa’aatumotu o le Atuvasa. E mafia ai ona gaua’i malo tetele o le lalolagi e fa’alogo i o tatou fa’afitauli o feagai ai ma i tatou i taimi uma. E mafai fo’i ona fa’ailoa ai le tutu fa’atasi o le Usoga,  Atoa Samoa i mea e manuia fa’atasi ai o latou tagata lautele. O le isi lava mataupu e aoga tele i ai le tutu fa’atasi o tulaga o a’afiaga o atumotu i suiga o le tau o lo ua tele mea e a’afia mai ai.

ISI MATAUPU

Mo le Fa’asao le Aganuu: Ua fa’afofogaina le tulaga ua i ai le taumafaiga e taofi mau le Gagana Samoa ma ua fa’ailoa mai ua i ai nei le Komisi o le Gaga Samoa i le malo tuto’atasi. Ua fa’ailoa mai e le tamaitai Palemia o Samoa, e mata’i le tulaga ua i ai nei le Gagana Samoa i Niu Sila, ua matua fa’amalosia lava lea komisi le fa’aaogaina o le gagana Samoa e alo uma o Samoa o lo’o tutupu a’e i Aotearoa. Ia avea lea ma se fa’ataita’iga lelei mo tatou Komisi i Samoa ma Amerika Samoa.

Mo FANUA MO SAMOA MALILIEGA & FA’AAOGAINA: Ua fesiligia nei e Amerika Samoa se fa’aaogaina o le eleele sa foaia atu e le faigamalo a Amerika Samoa mo Samoa i Tafuna, poo le a se mea o fuafua le Malo o Samoa e fa’aaoga i ai.  E tatau i le Malo o Samoa ona mua’i fa’ailoa mai a latou fuafuaga o le a faatula’ia i lea eleele ao le’i fa’aauau ona fa’aaogaina i le lumana’i.

Ua tatau foi ia Amerika Samoa ona faia lea fo’i tulaga i le eleele ua fesuia’i mo i latou i Samoa.