Ads by Google Ads by Google

Tu’u avanoa le Faamasinoga i alii pagota e to’alua na sosola i tua mai le Toese


[ata: SN]
ausage@samoanews.com

Pago Pago, AMERIKA SAMOA

 

Ua manatu le afioga i le Faamasino  Sili ia Michael Kruse e tu’u avanoa le Faamasinoga Maualuga i alii pagota e to’alua ia ua faamaonia moliaga o le sosola i tua mai l e Toese i Tafuna i le tausaga na te’a nei, e ala i le faaiuga e tuli faatasi ai le la faasalaga e 5 tausaga ma faasalaga faa falepuipui o loo tuliina i le taimi nei i totonu o le falepuipui.

 

O le vaiaso nei na tutula’i ai ali’i pagota ia e to’alua i luma o le Fa’amasinoga Maualuga mo le tuuina atu o la tali ioe i moliaga e pei ona tu’uaia ai i laua. I le mae’a ai ona talia e le Fa’amasinoga Maualuga o tali ioe a ali’i pagota ia e to’alua, na sauni ai loa le Faamasinoga mo le tuuina mai o lana faaiuga e tusa ai o lenei mataupu, e aunoa ma le tau toe faatali i se isi taimi e tusa ai o auala e faatino ai galuega a le Fa’amasinoga.

 

O le susuga a Lepou, poo Vatoi Chin Sam e pei ona iloa ai fo’i o ia, 27 tausaga e matua, o lo o tuli sana faasalaga faa falepuipui e 25 tausaga le umi, e mafua mai i solitulafono mamafa na ta’usala ai o ia e le Faamasinoga i tausaga ua mavae, e aofia ai moliaga o le talepe fale, faomea, gaoi, faaoolima, atoa ai ma le faalua ona sola i tua mai le falepuipui. 

 

Na molia e le malo le susuga a Lepou i le moliaga o le sola ese mai le toese ao taofia faapagota ai o ia, o se solitulafono mamafa o le vaega D, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala fo’i i faasalaga uma ia e lua.

 

Ae i lalo o le maliliega na sainia e Lepou ma le malo, lea fo’i na talia e le Fa’amasinoga Maualuga i le vaiaso na te’a nei, na malie ai le ua molia e tali ioe i le moliaga o le sola i tua mai le toese ao taofia faapagota ai o ia mo le tuliina o lona faasalaga. 

 

I le tali ioe ai o Lepou i le moliaga e pei ona ta’usala ai o ia e le Fa’amasinoga, na ia ta’utino ai e faapea, i se taimi o le aso 19 o Oketo[a, 2019 na sola ese ai mai le toese i Tafuna e aunoa ma se faatanaga faaletulafono poo se poloaiga foi i le faamasinoga. 

 

Na taua atili e le ua molia e faapea, i le aso e pei ona taua, na ia tuua ai le lotoa ma le sela a le Toese i Tafuna na taofia ai o ia, ae aga’i atu i fafo o le lotoa ma aga’i atu ai lava i lona aiga e aunoa ma se mafua’aga tatau. 

 

E faapena foi i le mataupu faasaga i le alii pagota ia Joseph Iakopo, 30 tausaga le matua, lea o loo tuli sona faasalaga faa falepuipui e 16 tausaga le umi, e mafua mai ina ua ta’usala o ia e le Faamasinoga Maualuga i moliaga mamafa e aofia ai le talepe fale ma le gaoi, atoa ai ma le faaleagaina o meatotino a isi tagata.

 

Na ulua’i tu’uaia e le malo le susuga a Iakopo i le moliaga mamafa o le sola i tua mai le Toese i Tafuna ao taofia faapagota ai o ia, ae i lalo o le maliliega na sainia e le ua molia ma le malo, lea fo’i na talia e le Fa’amasinoga Maualuga i le vaiaso na te’a nei, na ia tali ioe ai i le moliaga mamafa o le sola ese mai le Toese i Tafuna e aunoa ma se mafua’aga tatau. 

 

I le tali ioe ai o Iakopo i le moliaga e pei ona ta’usala ai o ia, sa ia ta’utino ai e faapea, i se taimi o le aso 21 o Tesema, 2019, na ia sola ese ai mai le Toese i Tafuna ao tuli ai lana faasalaga faa falepuipui ona o ni solitulafono mamafa a ta’usala ai o ia e le Fa’amasinoga. 

 

Sa ia ta’utino atili e faapea, i le aso e pei ona taua, na ia tuua ai le Toese i Tafuna ma le faamoemoe e agai atu i se isi nofoaga e aunoa ma se faatonuga faaletulafono poo se poloaiga mai le Fa’amasinoga. Sa ia taua atili e faapea, o se tasi o tuutuuga o lana faasalaga na tuuina atu e le Fa’amasinoga Maualuga i le aso na lau ai lona faasalaga, e le mafai ona ia tuua le Toese i Tafuna i soo se taimi, se’i vagana se mafua’aga tatau e pei o le auina atu i le Falema’i, poo se poloaiga fo’i mai le Fa’amasinoga.

 

Ao le i tuuina atu le faaiuga a le Fa’amasinoga faasaga ia Lepou ma Iakopo, na talosaga le la loia fautua ia Ryan Anderson mo se faasalaga mama. Na taua e Anderson, e i ai mea sa tutupu i le lotoifale o le Toese na mafua ai ona faatino e i laua ei leei solitualfono. E ui e le o se alofaga lea mai le faatinoina o le solitulafono, ae i lona talitonuga, ua a’oa’oina e i laua nei se lesona taua mai le mea sese sa laua faia.

 

E le gata fo’i i lea, ua silia i le 2 tausaga talu ona tuana’i le taimi na faatino ai le solitulafono, ma ua ese fo’i le siosiomaga ua i ai le Toese i le taimi nei ma le tulaga sa i ai i le 2 tausaga talu ai. Na talosaga Anderson i le Fa’amasinoga mo se faasalaga mama mo Lepou ma Iakopo. Ae afai e maatu le faamasinoga e tuli se faasalaga faa falepuipui, na talosaga Anderson ina ia faamama se faasalaga mo i laua.

 

Na lagolago le loia a le malo i le faafinauga a le loia mo le itu tete’e. Na taua e le tamaitai loia ia Kristine Soule le i ai o le talitonuga ua salamo i laua nei mai le solitulafono  sa laua faia, ma ua la lagona fo’i le leaga o le solitulafono sa la faatinoina.

 

I le mae’a ai o se malologa puupuu a le Faamasinoga, na poloaina ai loa e le afioga i le Faamasino Sili le faasala o i laua uma e to’alua i le ta’i 5 tausaga i le falepuipui. O lea faasalaga o le a tuli faatasi ma la faasalaga faa falepuipui o loo tuli i le taimi nei. Lona uiga, e le toe i ai se isi taimi e toe faaopoopo i le la faasalaga o loo tuli i le taimi nei, ae laa faitau atu ai le la ta’i 5 tausaga lea ua faasala ai i laua i le mataupu fou lenei.

 

O le faasalaga faa falepuipui a Lepou o loo tuli i le taimi nei, na mafua mai i le faalavelave lea na tula’i mai i le 2010 ina ua sosola i tua ma nisi o alii pagota ma latou osofaia le Leoleo po o le Faletupe o le ANZ Bank i Tafuna, e ala i le fasi faamo’amo’a o ia e fa’aaoga ai se tamai naifi.

 

E 20 tausaga i le Toese na faasala ai o ia e le Faamasinoga ina ua faamaonia moliaga faasaga ia te ia. A o tuli ai lana faasalaga i le Toese i Tafuna, na sola i tua Lepou i le 2018 ma faasala ai loa o ia e le Faamasinoga Maualuga i se faasalaga faa falepuipui e 5 tausaga. O lea faasalaga faa falepuipui faatoa tuli pe a mae’a ona tuli lana faasalaga faa falepuipui e 20 tausaga. Lona uiga, ua 25 tausaga le umi lea ua faasala ai o ia. 

 

Ae o le mataupu fou e pei ona toe ta’usala ai Lepou, na tula’i mai i le 2019 ina ua latou sosola i tua ma nisi ali’i pagota i le masia o Oketopa 2019. O ali’i pagota na latou sosola i tua e aofia ai Thomas Siaumau ma lona uso o Elliott Siaumau Jr, faapea ai ma le ali’i o Poe Tinae.

 

Mo le susuga a Iakopo, o lana faasalaga faa falepuipui e 16 tausaga o loo tuliina nei, na mafua mai ia ua ta’usala o ia e le Fa’amasinoga Maualuga i le mataupu lea na latou osofaia ai ma nisi ali’i ni faleoloa ma fale o aiga i totonu o le 4 masina ae ave faagaoi le tele o meatotino ma tupe.

 

E 13 osofaiga tau talepe fale na aafia ai Iakopo, lea e aofia ai le osofaia ma fao faamalosi meatotino mai totonu o faleoloa. 

 

O se tasi o nofoaga na osofa’i e Iakopo o le maota o se ali’i Faifeau, lea na gaoia mai ai le silia i le $2,000, faapea ai ma le tele o oloa mai isi nofoaga eseese e tusa male $3,000 le tau aofa’i pe a faatupe.