Ads by Google Ads by Google

Tu’u avanoa le Fa’amasinoga i se Tina mai Samoa ta’usala i le gaoi


[ata: SN]
ausage@samoanews.com

Pago Pago, AMERIKA SAMOA

 

Ua tu’u avanoa le Faamasinoga Maualuga i se Tina mai Samoa ua ta’usala i lona le usitaia o tulafono a le malo o Amerika Samoa e pei ona aafia ai i se vaega o ali’i na latou ave faagaoi uaea kopa (copper wire) a le Pulega o le Eletise ma le Suavai (ASPA), e ala i le faanofovaavaaia o ia mo le 5 tausaga, e aunoa ma le poloaina o ia e tuua le atunu’u ae toe fo’i atu i Samoa.

 

E tele masina na faagasolo taualumaga o le mataupu a le Tina talavou ia Theresa Samata-Ala, ona o le naunau o le Fa’amasinoga Maualuga e galulue faatasi ma Loia e saili se auala e faaleleia ai pepa nofomau a le ua molia, ina ia taofia ai le toe faafo’iina atu o ia i Samoa, ae maua ai le avanoa e toe sosoo ai le la aiga ma lona to’alua ma le la fanau e to’a 6.

 

Ae o le mautu ai o galuega a le Ofisa o Femalagaaiga e ala i le talia o le talosaga e toe faafou ai pepa nofomau a Samata-Ala, na manatu ai loe le afioga i le ali’i Fa’amasino Sili lagolago ia Fiti Sunia e tuuina atu loa le faaiuga a le Fa’amasinoga faasaga ia Samata-Ala i le amataga o le vaiaso nei.

 

Talu mai lava le taimi na pu’e faapagota ai le ua molia e Leoleo ma molia i lenei mataupu, na taofia pea o ia i le Toese i Tafuna ona o tulaga faaletonu i ona pepa nofomau. E 430 aso na taofia ai le ua molia i le Toese i Tafuna ae tuuina atu loa lona faasalaga e le Fa’amasinoga Maualuga i le vaiaso nei.

 

E tasi le moliaga na molia ai e le malo le ua molia, le moliaga o le gaoi, o le vaega C lea o solitulafono mamafa, lea e faasala ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000, poo le faasala foi i le isi faasalaga tupe lea e oo atu lona maualuga i le $20,000, poo le fuafua lea i le tau o mea na ave faagaoi.

 

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga Maualuga i le masina o Mati o le tausaga nei, na tali ioe ai le ua molia i le moliaga mamafa o le gaoi.

 

I le tali ioe ai o le ua molia i le moliaga e pei ona ta’usala ai o ia, sa ia ta’utino ai e fa’apea, i le va o le masina o Ianuari ma Fepuari o le tausaga na te’a nei 2020, na ia fesoasoani ai i nisi tagata i se gaoiga e ave faagaoi uaea o le kopa ma le faamoemoe e ave e faatau ae maua mai ai fualaau faasaina mo i latou.

 

Na ta’utino atili le ua molia e faapea, o lona faatinoina o lea gaioiga, ua atagia mai ai loa faia o se solitulafono mamafa i Amerika Samoa. Ua atagia mai ai fo’i lona le manatu mamafa i tulafono a le malo o Amerika Samoa.

 

Na tolopo mai i le masina o Me le lauina o le faasalaga a le ua molia, ona o se talosaga mai lana loia fautua ia Ryan Anderson na talia e le Fa’amasinoga, ina ia tuuina atu sina taimi e galulue ai ma le Ofisa o Femalagaaiga e saili se auala e faaleleia ai pepa nofomau a le ua molia. 

 

O le ua molia, o se tagatanu’u o Samoa, ae faaipoipo atu o ia i se ali’i, o se tagatanu’u o Amerika Samoa. O lea ali’i, e pei ona taua e le loia a le malo ia Kristine Soule, na faatoa magalo mai i tua mai le Toese i Tafuna i le masina o Mati o le tausaga nei, i le mae’a ai lea o le tuliina o lana faasalaga faa falepuipui, ina ua ta’usala o ia e le Fa’amasinoga i le umia faasolitulafono o fualaau faasaina.

 

A o faagasolo mai pea taualumaga o lenei mataupu, na finau pea le loia a le ua molia i le Fa’amasinoga mo se avanoa e tatala ai i tua le ua molia, ina ia maua ai le avanoa e alu ai i le Ofisa o Femalagaaiga e faafou ona pepa nofomau ma pu’e lona ID, peita’i na faamanino e le Fa’amasinoga, e le mafai ona faia e le Faamasinoga se gaioiga e soli ai tulafono a le malo faapea ai ma tulafono tau Femalagaaiga.

 

O tulafono tau Femalagaaiga, o loo manino mai ai le le tatau lea ona tatala i tua se tagata o loo taofia faapagota i le Toese e aunoa ma ni pepa nofomau. Na faamanino atili e le Faamasinoga i le loia a le ua molia e faapea, faatoa mafai lava ona tatala le ua molia i tua pe afai e faamaonia ua i ai sona ID ma ua faafou fo’i ona pepa nofomau.

 

Ina ua toe valaau le mataupu a le ua molia i luma o le Fa’amasinoga i le vaiaso nei, na atagia mai ai se talosaga a le ali’i loia fautua ina ia tatala loa lea ua molia i tua ma faasala o ia i se faasalaga faanofovaavaaia e aunoa ma le toe tuuina atu i ai o se isi taimi na te tuliina i le Toese, ona o lea ua mae’a ona faafou ona pepa nofomau ma ua i ai fo’i lona ID fou.

 

Na saili e le Faamasinoga faamaumauga ma faamaonia ai, o le ID fou a le ua molia e mae’a le aoga i le masina o Iuni o le tausaga fou 2022.

 

Ina ua maua lona avanoa mai le Fa’amasinoga, na faatoese ai le ua molia e tusa ai o lana solitulafono, ma ia talosagaina ai se isi avanoa mo ia e toe fo’i atu ai i tua e tausi lana fanau ma toe faaleleia lona aiga ua aafia ma faaletonu ona o lana solitulafono.

 

Na taua e le ua molia lona salamo e tusa ai o masina e tele na taofia ai o ia i le Toese, ma ua ia aoaoina mai ai fo’i se lesona aoga mo lona olaga i le lumana’i. 

 

Na talosaga le alii loia fautua ia Anderson i le Faamasinoga mo se faasalaga mama e aofia ai le faanofovaavaaia e aunoa ma le toe tuliina o se isi taimi i le Toese i Tafuna. Na faailoa e Anderson i le Fa’amasinoga e faapea, ua salamo le ua molia e tusa ai o lana solitulafono, ma ua sauni fo’i o ia e toe fo’i atu i lona aiga. 

 

Na lagolago e le loia a le malo le talosaga a le itu tete’e mo se faasalaga nofovaavaaia. Na faailoa foi e le itu a le malo i le Faamasinoga, sa i ai se solitulafono na ta’usala ai le ua molia i luma o le Faamasinoga Faaitumalo i ni tausaga ua mavae, ae o lana ulua’i solitulafono mamafa lea i luma o le Faamasinoga Maualuga.

Pau le talosaga a le loia mo le malo, ina faatonu le ua molia e totogi le tupe e $150 mo le tau o uaea kopa na ave faagaoi.

 

Saunoa le afioga i le ali’i Fa’amasino Sili lagolago ia Sunia e faapea, o le ua molia, na aafia i ni gaioiga a nisi tagata, ina ua latou aga’i atu ma tipi faagaoi mai uaea kopa mai luga o pou telefoni ae ave ua faatau atu ma le faamoemoe e maua mai ai tupe e faatau ai fualaau faasaina. O le ua molia, o ia lea o le ave ta’avale o le ta’avale na fa’aaoga e la’u ai uaea kopa gaoi mai nofoaga eseese i le itu i sisifo o le atunu’u.

 

O ia o se Tina talavou e to’a 6 lana fanau, e faaipoipo atu foi o ia i se tagatau’u o Amerika Samoa. Pau le itu na faailoa e le Fa’amasinoga, na ta’usala muamua fo’i le ua molia i le moliaga mama o le gaoi i luma o le Fa’amasinoga Faaitumalo, ma nofovaavaaia ai o ia mole 2 tausaga.

 

O lana nofovaavaaia ma mae’a i le masina o Iuni o le 2019, tusa lea o le tausaga atoa ae faatoa pu’e faapagota loa o ia ma molia i le mataupu fou e pei ona ta’usala ai e le Fa’amasinoga Maualuga.

 

E 7 tausaga i le Toese ma le salatupe e $2,000 ua faasala ai le ua molia. Ua faamalumalu le tuliina o le faasalaga faa falepuipui, ae ua nofo vaavaaia ai o ia mole 5 tausaga i lalo o tuutuuga e ao ona ia usitaia. 

 

O le a ia tuliina masina e 20 i le Toese i Tafuna e aunoa ma le tatalaina o ia i tua. O le a lava aso e 430 na te tuliia, lea laa aofia ai aso ua mae’a ona ia tuliina, ae o le paleni e totoe ai o le a faamalumalu lona tuliina.

 

Talu ai le tulaga e pei ona taua e le Ripoti a le Ofisa Faanofovaavaaia e faapea, o uaea kopa na ave faagaoi na faatau atu ma le faamoemoe e maua ai tupe e faatau ai fualaau faasaina, ua manatu ai le Faamasinoga e poloaina le ua molia, e le tatau ona ia tagofia le ‘ava malosi poo ni fualaau faasaina. 

 

Ua poloaina foi le totogiina o le salatupe e $2,000 i totonu o le tausaga muamua o le nofovaavaaia.

 

Na faailoa manino e le Fa’amasinoga ia Samata-Ala, o le taimi lava na te le usitaia ai tuutuuga o lana nofovaavaaia, o le a le toe i ai loa se isi avanoa mo ia, ae laa poloaina loa o ia e tuli le paleni o lana faasalaga faanofovaavaaia ua faamalumalu. A mae’a ona tuli lea faasalaga, ona poloaina loa lea o ia e tuua le atunuu ma aumau ai i fafo atu mo le taimi atoa o lana nofovaavaaia.