Ads by Google Ads by Google

Tu'ua le malo, le afioga le Tama a le Malo, Aumoeualogo Te'o J. Fuavai Jr.


[ata: foa'i]

Na tu'ua le Malo e le afioga le Tama a le Malo Aumoeualogo Te'o J. Fuavai Jr. ia Iuni 12, 2019 i Seattle, Washington State lea e aumau ai le to'atele o lana fanau, ma e faia ai fo'i nisi o ana talavai.

Ua lagia fo'i le tatou atunu'u i le ao pogisa, aua o se tasi o tama o le atunu'u sa iloga lana tautua. E afua mai le faigamalo a Kovana Uifaatali Peter Coleman se'ia o'o mai ia Kovana Tauese Pita Sunia, sa iloga ona tula'i mai i tofiga eseese i le faigamalo, e aofia ai ma le avea ma Komesina o Leoleo mo le Matagaluega o le Puipuiga o le Saogalemu Lautele.

Sa ia nofoia fo'i le nofoa o le avea ma Senatoa o lona itumalo i le Maota Maualuga o le Fono Faitulafono i le tele o tausaga. E le gata i lea, o ia lava o le faipisinisi ua lauiloa ai i Amerika Samoa, ona o lona faleoloa o lo'o feagai lea ma le fofoga taumafa o le atunu'u o lo'o faigaluega i le Kamupani I'a a le Star Kist ma le Samoa Packing i Atu'u.

Na tutulu le afioga le Faipule i le Konekeresi, Aumua Amata, ina ua fa'ao'o atu le tala fa'anoanoa ia te ia e le fanau ma aiga, aua o ia e tusa o se tama lava ia te ia.

Sa ia fa'apea ai, "Mai lou olaga talavou, sa ou va'aia lenei Tama e pei o se atali'i moni ia te ia. E le faigofie lagona, aua ua o'oo'o le tui o le oti, ma ua tiga alofa le sui fa'atauva'a, ona o le tele o taimi iloga o le ola taumafai i nei tiute, sa le misia lana fautua, ma lana tu'ualalo i taimi amata mai o le taumafaiga, sa le'i faigofie. Kolumane sa ia sainia lona tusi pasi fa'au'u mai a'oga maualuga i le tausaga 1959. A'o talavou mai le afioga Aumoeualogo Te'o, e matele ina auau ona manatu i le vasega o talavou, e fa'amanatu ai fo'i ia Kovana Kolumane taimi o le malosi fa'ataule'ale'a Samoa i faiva o fa'agatama, seia o'o lava i olaga fa'atama Samoa moni i so'o se faiva i lo tatou atunu'u pele nei.”

Peita'i ina ua tu'ua le malo e Kovana Uifa'atali Kolumane i Honolulu, na malaga fa'apitoa atu le afioga le Komesina o Leoleo ia Te’o ma le aumalaga o Leoleo “ina ia latou fa'afeao i le va'a o lana afioga le Kovana ua moe malolo. O le aumalaga lea na aofia ai ma le afioga Kovana Tauese Pita Sunia. O se taualoa sili ona taua ia i matou uma le fanau ma si o matou tina.”

I le tusi o le talaaga o le Fono Faitulafono, sa tusia e le tofa le Toto ia Fofo I.F. Sunia i le 1998, e fa’amanatuina ai le 50-tausaga talu ona fa’avae the Fono Faitulafono, o lo’o fa’ailoa ai sa amata galue Te’o i le malo o Amerika Samoa i le tausaga e 1956 i le ASG General Supply. Sa galue foi i le Ofisa o Tuite, fa’atasi ai ma lona tofiga o le ta’ita’i i lea ofisa o le malo. Sa tofia foi o ia i le Maota o Sui ma e lua tausaga sa avea ai ma Fofoga Fetalai.

I le tausaga e 1980 tu’ua ai e Te’o le Fono ae avea ma Komesina o Leoleo i le faigamalo a le afioga Uifa’atali Peter Coleman. Ina ua tula’i mai le faigamalo, a Kovana A.P. Lutali sa toe tofia foi e Komesina o Leoleo. I le amataga o le faigamalo a Kovana Tauese P.S. Sunia i le 1997, sa fa’aauau ai pea Te’o i lea tofiga.

I le va o tausaga o le tautua a Te’o i le Maota o Sui ma le Komesina o Leoleo, sa avea ai o ia ma Fa’atonusili o le Matagaluega o Galuega Lautele a le malo mai le 1989 i le 1992. Sa avea sa pulesili o le Faletalimalo a le Rainmaker Hotel mai le 1991 i le 1992.

O Te’o o se tasi o tamali’i o le atunu’u sa lalamua mai le amataga e lagolagoina le palotaina o le kovana o Amerika Samoa, ae le toe filifilia mai e le Matagaluega o le Initeria, e pei ona i ai i tausaga ua mavae. Sa fa’auluina foi se iugafono e talosagaina ai le Initeria ina ia fa’atagaina le palotaina o le kovana.

E maliu o Aumoeualogo o lo’o avea ma faufautua fa’apitoa i le Peresitene o le Senate, Gaoteote Tofau Palaie.

I nisi o ana tautua e aofia ai le avea ma peresitene o le Iuni Lakapi a Amerika Samoa, taitai fono o le Pati Repaplikana a Amerika Samoa. I le 1997 was tofia ai e avea ma taitai fono o le Puleaga a Samoa Pago Pago. E tele tausaga o lo’o galue i tofiga fa’ataitai i le Ekalesia Katoliko i Alao.