Pago Pago - AMERIKA SAMOA

E ui ina e le’i maua e leoleo ia le susuga ia James Mose i le aso na tupu ai se faalavelave, ae peitai, ua molia pea o ia i le Fa’ao’olima, Faatupu vevesi i totonu o lona aiga ma le le usitaia o se fa’atonuga a le faamasinoga.

E tusa ai ma faamaumauga a le malo, o le po o Oketopa 27, 2024 na valaau atu ai se alii i le Ofisa a Leoleo i Fagatogo ma ripotia atu ai le sauaina o ia e lona tausoga, le susuga lea ia Mose, i totonu o le latou fale.

Ina ua taunu’u leoleo i le nofoaga na tupu ai le faalavelave, ua sola ‘ese ia Mose, ae o lo’o nofonofo mai i luma o le fale ia lona tausoga lea na a’afia ma ona valaau i le ofisa a leoleo.

Sa faamatalaina e le alii na a’afia e faapea, e mae’a mai sana ta’elega i lea afiafi, o lo’o nofo atu ia Mose i totonu o le latou potu malolo.  Ae ua mae’a ona iai se faatonuga mai i le faamasinoga, ua fa’asaina ai Mose ona toe tu vae i totonu o le latou fale lea.

Ma ina ua faatonuina e le na a’afia ia Mose e alu i fafo, sa tali mai Mose e leai sana feau.  Ina ua fa’ailoa atu iai e le na a’afia, o lea o le a alu e ta’u Mose i le la tama matua (grandfather), sa faapea loa ona u’u mai e le ua molia ia se paipa uga ma sasa ai vae o le na a’afia.

Sa tamo’e loa le na a’afia agai i fafo o le fale ma toe valaau mai i le na molia, e alu ‘ese ma  le fale.  Ae na tamo’e le na molia agai i le faitotoa pito i tua o le fale ma taumafai e tatala, ae ua mae’a ona loka mai e le na a’afia.  O lea na talepe ai e le ua molia ia le faitoto’a ma oso i fafo ma ia togiina le na a’afia i le paipa uga sa ia u’uina.

Na ta’ua e le na a’afia le fa’aaogaina foi e le ua molia, ia ma’a e tau’ai ai o ia lea na tau i le taavale a lo la tama matua, a na fa’ailoa atu foi e le ua molia ia te ia, o le a ia gaoia uma meatotino taua mai totonu o le fale.

Sa ta’ua foi le palauvale ma fa’aumu o le ua molia.  Ae ina ua va’aia e  le ua molia le agai atu o leoleo, sa faapea loa ona sola ‘ese o ia.

O moliaga o Mose, na aofia ai le Fa’ao’olima i lona tulaga e tolu faapea ma le Faatupu vevesi i totonu o le aiga, o ni solitulafono tau i sauaga i totonu o le aiga ma o se vaega ‘C’ o soligatulafono mama.  

O fa’asalaga o nei moliaga, e aofia ai le ta’i sefululima aso i le falepuipui, po o se sala tupe i le va o le $150 ma le $300, po o fa’asalaga uma e lua.

Ua molia foi Mose i lona le usitaia o se faaiuga mai i le faamasinoga, o se vaega ‘A’ o solitulafono mama, e mafai ona faafalepuipui ai i le tausaga atoa, po o se sala tupe e $1,000 po o faasalaga uma e lua.

E $5,000 se vaegatupe na faatulagaina e mafai ona tatalaina ai le ua molia, e faatalitali ai lona faamasinoga.