Pago Pago - AMERIKA SAMOA

E 27 tausaga le matua o se ali’i mai Samoa ua taofia nei i le Toese i Tafuna ina ua mae’a ona pu’e faapagota e Leoleo i le masina na te’a nei, ona o tu’uaiga i lona faia o gaioiga mataga i se tama’ita’i e 15 tausaga le matua e aofia ai ma lona faamalosi o ia i faiga faafeusuaiga.

I le taimi na pu’e faapagota ai e Leoleo le alii ua molia, na maua i ai pepa iila e 2 i le taga o lona ofu o lo o i ai vaega o le laau faasaina o le mariuana. 

Ina ua fesiligia e Leoleo le alii ua molia, susuga a James Taulago e tusa ai o tu’uaiga faasaga ia te ia, na taua ai e le ua molia e faapea, o le la mafutaga ma le tamaitai o loo aafia ua silia i le 8 masina ma ua lagona fo’i lona alofa i le tamaitai.

Ina ua fesiligia e Leoleo le alii o Taulaga e tusa ai o fualaau faasaina na maua ia te ia, na ta’utino ai le ua molia, o pepa iila mariuana na faatau mai i se tasi o ana uo ma le faamoemoe e fa’aaoga mo ia lava.

E pei ona taua e le malo i le latou tagi e fa’apea, o lenei mataupu na tofu atu i le Ofisa o Leoleo i Tafuna, ina ua aga’i atu se Tama ma sona afafine i le vaveao o le aso 14 o Oketopa, 2021 ma faila sa laua tagi faasaga ia Taulago, i lona faia o uiga mataga i le tama’ita’i na a’afia.

O le Tama ma lona afafine na aga’i i le Ofisa o Leoleo, o le tama’ita’i lea na aafia ma lona Tama.

Na taua e le Tama i Leoleo e fa’apea, ua leva ona i ai masalosaloga i lona aiga e uiga i lenei mataupu peita’i sa taumafai lava e saili ni faamaoniga. Ae o le vaveao o le aso e pei ona taua, na ia maua ai lona afafine na alu ese ma le latou fale i le po, atoa ai ma lana telefoni na maua i ai a laua fetusiaiga ma le alii ua molia.

Na manino i suesuega a Leoleo, o fetusiaiga i luga o le Facebook i le va o le ua molia ma le tama’ita’i o loo aafia, na atagia mai ai i le aiga o le tama’ita’i na a’afia, o fai si leva o fesootai i laua nei, ma e foliga mai fo’i o loo aafia i laua nei i se mafutaga faaleulugali’i.

O le mae’a ai ona fesiligia o le Tama e tusa ai o lenei mataupu, na fesiligia ai loa e Leoleo le tama’ita’i na aafia e uiga i tu’uaiga faasaga i le ali’i ua molia. Na taua e le tama’it’ai na a’afia i Leoleo e fa’apea, o le faaiuga lava o le masina o Fepuari o le tausaga lenei na amata ai ona la masani ma James [Taulago] ina ua faamasani atu ia te ia e auala atu i se isi alii o le latou autalavou aemaise ai taaloga volipolo a le nu’u. Talu mai lea taimi, na amata mai ai lava iina le la mafutaga ma James.

Na taua e le tama’ita’i na aafia le alu atu o Taulago ma faatalanoa o ia i le taimi muamua lava, ma fesili atu pe mafai ona fai se le mafutaga faaleuo. Na amata mai ai lava i le taimi lea ona la masani, ma faaauau ai pea lava ona la fetaui i le taimi o taaloga volipolo i le afiafi ma faamasani pea le isi i le tasi.

Na aga’i atu le la mafutaga i le fa’aaoga lea o telefoni ma fesootaiga i luga o le Facebook la te talanoa ai i isi taimi e ese mai i taimi o taaloga volipolo, seia oo lava ina masani atili le isi i le tasi.

Na taua e le tama’ita’i na aafia le masina o Mati na fai atu ai Taulago ia te ia e alu atu i lona fale (Taulago) i le po la te eva ma tafafao ai. Sa ia alu i le po i le fale o Taulago ma o iina lea na tula’i mai ai loa le ulua’i faalavelave e pei ona faamalosi ai o ia e Taulago la te feusua’i ae le’i mana’o i ai.

Na taua e le tama’ita’i na aafia e faapea, o le ulua’i taimi lea ua fai ai sana uo tama, ae o le ulua’i taimi fo’i lea ua aafia ai o ia i tulaga tau feusuaiga. Sa lagona le tiga o lona tino peita’i ua leai se mea e mafai ona o lea ua mae’a ona tupu le faalavelave ia te ia.

Talu mai lava le taimi lea, sa fa’aauau ai pea le mafutaga faaleulugalii i le va o Taulago ma le tamaitai na aafia. E pei ona taua e le na aafia, e silia i le fa’a 10 ona la faiaiga ma Taulago, ma o nisi taimi, e oo atu lava i le 10 minute le umi e faatino ai e Taulago uiga mataga nei ia te ia, ae pe faa 2 i le fa’a 3 i le aso ona la feiloa’i ma la faiaiga.

O nisi fo’i o taimi e pei ona taua e le tama’ita’i na aafia, e faatino ai e Taulago isi uiga mataga ia te ia e aunoa ma sona malamalama i ai.

O le aso lava lea na pu’e faapagota ai e Leoleo ia Taulago ma auina atu loa i le Ofisa i Tafuna mo le faatalatalanoaina o lenei mataupu. Ina ua fesiligia e Leoleo le ua molia, sa ia ioeina ai faamatalaga uma e uiga ia te ia ma le tamaitai na aafia, atoa ai ma lona faatoese i Leoleo e tusa ai o lana solitulafono.

Na tete’e Taulago i tu’uaiga e faapea sa ia faamalosia le tamaitai na aafia i le taimi o le ulua’i feusuaiga. O lana faamatalaga i Leoleo, sa malie lava i ai le tamaitai e ui sa ia iloa lelei e laititi le tamaitai i lalo o le tulafono.

Sa ia ioeina fo’i lona fa’aaoga o lana telefoni faapea ai ma fesootaiga i luga o le Facebook la te feiloa’i ma talanoa ai ma le tamaitai na aafia, ina ia mafai ai ona maua se avanoa la te talanoa ma faamasani atili ai.

Na ioe fo’i le ua molia, o ia na tauanauina le tama’ita’i na aafia e alu atu i lona fale i le po muamua lava na tula’i mai ai le faalavelave, atoa ai ma isi fo’i po seia oo lava i le po lea na maua ai loa e le aiga o le tama’ita’i le alu ese mai o le tama’ita’i mai lo latou fale.

A o le i auina atu Taulago i le Ofisa o Leoleo i Tafuna mo suesuega, na saili e Leoleo lona tino ma maua ai pepa iila e 2 o lo o i ai lau mariuana. Na taua e Taulago i Leoleo, o le alii mai Vaitogi lea na ia faatau mai ai pepa mariuana e 2, o ia lava lea e masani ona maua mai ai ana fualaau faasaina e fa’aaoga mo ia lava.

O le masina na te’a nei na tula’i ai Taulago i luma o le Fa’amasinoga Faaitumalo, ma ia fa’ailoa ai i le Fa’amasinoga lona mana’o e tu’u sa’o loa lana mataupu i luma o le Fa’amasinoga Maualuga e fa’atulaga ai se aso o lana faamasinoga autu.

Ua molia e le malo lenei ali’i i le moliaga e 2 o le faia o uiga mataga faasotoma faapea ai ma le moliaga e tasi o le faiaiga faamalosi ma se tama’ita’i e laititi i lalo o le tulafono, o le vaega B lea o solitulafono mamafa, lea e mafai ona fa’asala ai se tasi i le Toese mai le 5 e oo atu i le 15 tausaga le umi; faapea ai ma le moliaga o le tagofia o itutinosa o se tamaitai laititi, o le vaega D lea o solitulafono mamafa, lea e faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, pe fa’asala fo’i i faasalaga uma ia e lua.

E $35,000 le vaega tupe lea ua fa’atulaga e le Fa’amasinoga e totogi ona fa’atoa mafai lea ona tatala Taulago i tua mai le Toese i Tafuna.

Na talosaga le loia fautua a Taulago mo se avanoa e faaitiitia ai le tupe e tatala ai i tua le ua molia. Na taua e lana loia e fa’apea, o le tagi faasaga ia Taulago ua na o ni tuuaiga lava, faatoa faamaonia lava pe afai e tuuina mai se faaiuga a le Faamasinoga e faamaonia ai. 

Na tete’e malosi le loia a le malo ma ia finau i le Fa’amasinoga ina ia faatumau pea le tupe e tatala ai le ua molia i tua, ona o le matuia o lana gaioiga sa faia. Sa taua atili fo’i e le itu a le malo e fa’apea, o le tamaitai na aafia e na o le 15 tausaga, faatusatusa i le alii ua molia e 27 ona tausaga, tusa lea e 12 tausaga e va ai.

Na talia e le Fa’amasinoga le faafinauga tete’e a le malo ma faatumau ai loa le tupe e tatala ai i tua le ua molia.

Afai ae tatala i tua Taulago mai le Toese, ua poloaina o ia e le Fa’amasinoga ina ia usitai i tulafono uma a le malo, auai i soo se taimi e valaau ai lana mataupu, ma aua ne’i taumafai e tuua le atunuu pe sola ese fo’i e aunoa ma se faatonuga a le Fa’amasinoga. E le mafai ona ia toe taumafai e faafesootai molimau a le malo i soo se auala, e aofia ai ma le tama’ita’i na a’afia i lenei mataupu.

Afai la te fetaui ma le tama’ita’i na aafia poo ni molimau a le malo i soo se vaega o le atunu’u, ia alu ese mai ai ma le filemu.

Ua fautuaina fo’i e le Fa’amasinoga le ua molia ina ia aua ne’i ona toe taumafai i se isi auala e aofia ai telefoni poo le Facebook e faafesoota’i le tamaitai na a’afia.