Ads by Google Ads by Google

Tu’uaia se ali’i i lona faia o uiga mataga i se tamaitai talavou


[ata: SN]
ausage@samoanews.com

Pago Pago, AMERIKA SAMOA

 

O lea faatoa tasi le masina talu ona mae’a le tuuina atu o le faaiuga a le Fa’amasinoga Maualuga faasaga i ni ali’i se to’alua i lo la faia o uiga mataga i fanau tamaitai e talavou i lalo o le tulafono, ao lea fo’i ua toe alia’e mai le isi mataupu e pei ona molia ai se isi ali’i i lona faia o uiga mataga i se tamaiti aoga e 15 tausaga le matua. 

 

O le itu e sili ona matuia ai lenei mataupu, o le taimi na pu’e faapagota ai e Leoleo le ali’i o Lagofaatasi Sema, poo Lago Sema fo’i e pei ona iloa ai o ia e le to’atele, ae maua ai fualaau faasaina.

 

O le masina na te’a nei na pu’e fa’apagota ai e Leoleo le susuga a Sema ma molia ai loa o ia e le malo i moliaga eseesega.

 

O ia moliaga eseese e aofia ai le umia faasolitulafono o le vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 20 tausaga, pe faasala foi i le salatupe e oo atu i le $20,000, faapea ai ma isi moliaga mamafa e aofia ai le moliaga mamafa e tasi o lona tagofia lea o itutinosa o se teneititi e laititi i lalo o le tulafono, atoa ai ma moliaga mama e 2 o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti.

 

Na teena e Sema moliaga ina ua tula’i i luma o le fa’amasinoga fa’aitumalo i le masina na te’a nei. I lona teena ai o moliaga faasaga ia te ia, na talosagaina ai loa e lana loia fautua ia Ryan Anderson ina ia faatulaga loa se aso e faia ai le ulua’i iloiloga o lenei mataupu.

 

O le aso Tofi o le vaiaso fou i le itula e 10:30 i le taeaoi lea ua fa’atulaga e faia ai le ulua’i iloiloga o le mataupu a Anesi i luma o le afioga i le ali’i Fa’amasino ia Elvis P. Patea, e sailia ai pe lava mau a le malo e lagolagoina ai le faia o se solitulafono.

 

E $10,000 le tupe lea ua fa’atulaga e totogi ona fa’atoa mafai lea ona tatala Sema i tua mai le toese i Tafuna. E ui na finau malosi Anderson i le fa’amasinoga ina ia fa’aitiitia le tupe e tatala ai Anesi i tua, pe tatala fo’i o ia e aunoa ma se tupe e totogi, ae na lagolagoina e le fa’amasinoga le fa’afinauga a le loia mo le malo, susuga Robert Morrison III, ina ia taofia pea o ia i le toese se’i vagana ua totogi le $10,000.

 

Na taua e Anderson e fa’apea, o le ulua’i taimi lenei ua molia ai e le malo ia Sema i se solitulafono, e leai fo’i ni solitulafono na ta’usala pe na molia muamua ai o ia i tausaga ua mavae. 

 

Sa ia finau e fa’apea, afai e tatala i tua Sema, e le sola ese o ia ma le atunu’u, ae o le a la galulue fa’atasi ina ia mautinoa e auai o ia i soo se taimi e valaau ai lana mataupu. Na finau atili fo’i Anderson e fa’apea, e ui i tu’uaiga fa’asaga ia Sema, ae o le mea moni e ao ona silafia e le fa’amasinoga, e le o ia o se tagata leaga e ono lamatia ai le saogalemu o tagata lautele pe afai ae tatala o ia i tua.

 

Na finau malosi le loia a le malo ina ia fa’atumau le tupe ua mae’a ona fa’atulaga e le fa’amasinoga e tatala ai i tua le ua molia, ona o puipuiga lava mo le saogalemu o fanau teine a le atunu’u. Na ia taua atili e fa’apea, e ui o le ulua’i taimi lenei ua tu’uaia ai Sema i se solitulafono, ae foliga mai i le siosiomaga o le mataupu e pei ona tula’i mai, e fai lava si matuia o gaioiga sa faia e le ua molia. 

 

Na fa’ailoa e le loia a le malo i le fa’amasinoga e faapea, e le tatau ona tatalaina i tua le ua molia e aunoa ma se tupe e totogi, e pei ona finau mai i ai lana loia. Afai fo’i e tatala o ia i tua, e tatau ona mautinoa e le sola ese o ia ma le atunu’u.

 

O tuutuuga ua tuuina atu e tatala ai Sema i tua, o le faasa lea ona ia taumafai e faafesootai le teineititi na a’afia i soo se auala, auai i soo se taimi e valaau ai lana mataupu, ma ia tuuina atu lona tusi folau e taofi e le malo. Ua fautuaina fo’i o ia e aua ne’i ona taumafai e tuua le atunuu e aunoa ma se fa’atanaga a le fa’amasinoga.

 

TAGI A LE MALO FA’ASAGA I LE UA MOLIA

 

O lenei mataupu na tofu atu i le Ofisa o Leoleo i Tafuna i le taeao o le aso 10 o Mati, 2021, ina ua talosagaina e le Tina o le teineitiiti na a’afia se fesoasoani a Leoleo, fa’asaga i  ni uiga mataga sa taumafai le ua molia e faia i lana tama e 15 tausaga le matua.

 

Na taua e le Tina i Leoleo e fa’apea, e ui latou te aiga ma Sema, ae ua pei lava o ia o se totino o le latou aiga, e mafana fo’i le mafutaga a Sema ma le Tama o le teineitiiti na a’afia.

 

Na aga’i atu Leoleo i le fale o le aiga na aumai le Tina ma lana tama teine na a’afia, ma aga’i atu loa i le Ofisa o Leoleo mo le fa’atalatalanoaina o lenei mataupu. E le auai le Tama o le tama’ita’i na a’afia i le suesueina o lenei mataupu, ona sa faigaluega o ia i le taeao lea.

 

Na taua e le teineititi na a’afia i Leoleo e fa’apea, na fa’ateia o ia ao taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o loo fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o loo tootuli i luma o lona ulu ma tago atu i lona tafatafa.

 

Na musumusu atu le ua molia i le teineititi na a’afia ma fai atu i ai, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma al ese loa.

 

Na taua atili e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa ma le manatu ina ia fa’amalie ai lagona tu’inanau o le tino.

 

Na taua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua mae’a, sa ia aga’i atu ai loa i totonu o le latou fale, ae na matua fa’ateia o ia ina ua ia vaaia le ua molia o loo tootuli i luma o le moega a lona tuafafine. 

 

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o loo saili le uaea e fafaga ai le ma’a o lana telefoni.

 

Na taua e le ali’i lea i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu. 

 

O le mae’a ai ona fesiligia e Leoleo o le teineititi na a’afia ma lona Tina, na aga’i atu ai loa e saili le ua molia, ma latou maua atu ai lana pasi o loo tu i le maketi i Fagatogo, ma pu’e fa’apagota mai ai loa o ia.

 

A o le i auina atu Sema i le Ofisa o Leoleo mo le fesiligia e uiga i lenei mataupu, na saili e Leoleo lona tino mo ni aupega poo ni fualaau faasaina. I totonu o le taga o le ofuvae a Sema sa faia, na maua ai e Leoleo se paipa tioata o loo i ai vaega o le pauta paepae i totonu. Na faia se suiga faapitoa i le pauta paepae na maua ia Sema ma faamaonia ai, o vaega ia o le pauta faasaina o le aisa.

 

Ina ua fesiligia e Leoleo ia Sema e tusa ai o lenei mataupu, sa ia teena malosi ai lona tagofia o itutinosa o le tama’ita’i o lo o tu’uaia na a’afia i lenei mataupu. Na taua e Sema e fa’apea, na malie le tama’ita’i e alu atu i totonu o lona potu i le po la te talanoa ai, peita’i, ina ua taunuu i totonu o le potu, sa toe liliu ai lona mafaufau ma ia manatu ai, e le tatau ona ia faia ni uiga mataga i lenei tama’ita’i.

 

O lo o taofia pea Sema i le Toese i Tafuna e faatali ai le isi ana iloiloga lea ua faatulaga mo le vaiaso fou, ina ua le mafai ona ia totogi le tupe ua faatulaga e tatala ai o ia i tua mai le Toese i Tafuna.