Pago Pago - AMERIKA SAMOA

E 55 tausaga le matua o se Tama mai Futiga ua taofia nei i le Toese i Tafuna, ona o tu’uaiga i le faaoolima ma le umia faasolitulafono o fualaau faasaina, e mafua mai i le faalavelave lea na tula’i mai i le masina na te’a nei, ina ua ia faaoo ni manu’a tuga i le ulu ma le tino o se isi ali’i.

Ae ina ua pu’e faapagota o ia e Leoleo, na maua i ai vaega o fualaau faasaina i lona tino.

O le susuga a Viliamu Taulafo na ta’usala e le Faamasinoga Maualuga i le 2014 i le moliaga o le faaoolima i le tulaga lua, ma nofovaavaaia ai o ia mo le 5 tausaga.

O le masina na te’a nei na tula’i ai Taulafo i luma o le Fa’amasinoga Fa’aitumalo mo lana ulua’i iloiloga. 

Ua molia nei Taulafo i moliaga mamafa e 2 o le faaoolima i le tulaga lua, atoa ai ma le fa’aleaga meatotino i le tulaga muamua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua; faapea ai ma moliaga mama e 2 o le faaoolima i le tulaga tolu, atoa ai ma lona faia o ni gaioiga e ono lamatia ai le saogalemu o fanau laiti, o le vaega A lea solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000, poo le fa’asala fo’i i fa’asalaga uma ia e lua; faatasi ai ma le moliaga mama o le umia faasolitulafono o vaega o le pauta faasaina o le aisa, o se solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000.

E $15,000 le tupe lea ua fa’atulaga e le Fa’amasinoga e totogi ona fa’atoa mafai lea ona tatala ia Taulafo i tua mai le toese i Tafuna.

Afai ae mafai ona ia totogi lea vaega tupe, ua fautuaina o ia ina ia fesoota’i vava lalata ma lana loia, e le mafai fo’i ona ia tuua pe taumafai e tuua le atunu’u, ma ia tuuina atu lona tusi folau e taofi e le loia a le malo, se’i vagana ua mae’a lana mataupu ona fa’atoa mafai lea ona toe tuuina atu lona tusi folau ia te ia.

E le matai fo’i ona ia taumafai i soo se auala e fa’afesoota’i molimau a le malo, e aofia ai ma i latou o lo o a’afia i lenei mataupu i soo se auala. Afai latou te fetaui ma i latou nei i soo se nofoaga, o lona tiute o le alu ese mai ai.

Na teena e le Faamasinoga le talosaga a le itu tete’e ina ia fa’aitiitia le tupe e tatala ai Vaega i le $3,000.

Na taua e le Loia Fautua a le ua molia e fa’apea, o Taulafo o se ali’i e galue malosi mo le tausiga o lona aiga, e le o i ai fo’i se tulaga e ono masalomia ai o ia i le sola ese mai le atunu’u, aua o lo o tapunia malaga a va’alele ona o puipuia o le faama’i. E to’aono lana fanau, na fananau uma i Amerika Samoa, o lona to’alua fo’i o se tagatanu’u o Amerika Samoa.

Na ia taua atili e fa’apea, afai e fa’atulaga le tupe e tatala ai le ua molia i le $3,000, o le a mafai ona ia totogiina lea vaega tupe, ma mafai ai loa ona toe tatala o ia i tua e fa’aauau ona galue e tausi ai lona aiga.

Na tetee malosi le loia a le malo i le talosaga a le itu tete’e. Na taua e le Loia a le malo e fa’apea, o le tupe e pei ona fa’atulaga e le Fa’amasinoga, ua talafeagai lelei ma le mamafa o tu’uaiga fa’asaga i le ua molia. O lo o popole fo’i lona aiga ina ne’i toe tula’i mai se isi fa’alavelave matuia pe afai ae toe tatala atu le ua molia i tua.

I le mae’a ai ona fa’afofoga o le Fa’amasinoga i fa’afinauga a itu e lua, na teena ai loa e le Faamasinoga le talosaga a le iu tete’e, ma faatumauina ai loa le tupe e tatala ai Toelupe i tua i le aofaiga e $15,000.

O le vaiaso fou lea ua fa’atulaga e tula’i ai le ua molia i luma o le Fa’amasinoga mo lana ulua’i iloiloga.

TAGI A LE MALO

O le masina na te’a nei i le po o le aso 18 o Mati o le tausaga nei na talosagaina ai e se Tina le fesoasoani a Leoleo, e mafua mai i lona to’alua lea ua manu’a tigaia na faaoolima i ai lona lava tausoga i le taimi o se inugapia.

E to’atele Leoleo na aga’i atu i lea valaau, ma mafai ai loa ona latou fa’atalatalanoaina molimau sa i ai e tusa ai o le fa’alavelave.

Na taua e le Tina sa ia logoina Leoleo i Leoleo Suesue e faapea, na faateia o ia ina ua vili atu se tasi o uo a lona to’alua ma ta’u atu ia te ia, o lona to’alua lea ua auina atu i le falema’i, ua manu’a lona ulu ma lona tino ina ua faaoolima i ai Taulafo i le taimi o le inugapia sa faia.

E le i mafai e Leoleo ona fa’atalatalanoa le ali’i na a’afia i le po na tula’i mai ai le fa’alavelave, ae na fa’atoa mafai ona fesiligia o ia e tusa ai o le mea sa tupu i le afiafi o le aso Toona’i na sosoo ai.

Na taua e le ali’i na a’afia e fa’apea, na faateia o ia ina ua valaau atu Taulafo i lona igoa, ae o le taimi lea faatoa uma ai lava le latou faiga lotu ma lana fanau i le afiafi, ma valaaulia o ia i le pati o le aso fanau a se tasi o a latou uo, lea e faia i le fale o se tasi o ali’i e le mamao ese lava mai lona fale.

Pe tusa o le itula e 9:00 i le po lava lea, ua vaaia fo’i le onana o tagata o le pati, na taua ai loa e le ali’i na a’afia le faateia o ia ina ua talanoa atu Taulafo ia te ia i ni mataupu e fa’atatau i le latou aiga. I lana fa’alogo le talanoa a Taulafo, e foliga mai o se mea sa ia taumafai e fafau, ina ia maua se avanoa latou te inupia faatasi ai ae se’i sasa’a atu lona le fiafia o loo i ai e fa’atatau ia te ia.

Sa fesili atu Taulafo ia te ia pe aisea na le logoina ai o ia i le fa’alavelave lea na la lafoina ai ma lona to’alua le tupe mo le maliu o le latou uncle i Samoa, ae na tali atu i ai le na a’afia, sa i ai lona manatu ua uma ona logo o ia e tusa ai o lea fa’amoemoe.

A o faagasolo pea le talanoaga, na taua e le na aafia le faateia o ia ina ua tu’i e Taulafo ona foliga ma pau ai i lalo, ona aapa atuloa lea o Taulafo i le fasi uamea sa nonoa ai i luga laau a lona to’alua o lo o tu i luma o le pa laau ma se’i mai ae ta ai lona ulu ma manu’a ai.

Na mae’a lea, ona savali atu loa lea o Taulafo i le pito o loo paka ai lana ta’avale ma amata loa ona sasa tioata o lana ta’avale ma nuti lili’i uma ai. Na taua e le ali’i na manu’a e fa’apea, o iina na gata ai loa lona toe iloaina o se mea, ina ua matapogia i le tuga o le manu’a sa a’afia ai lona ulu.

O aiga tuai na latou molimauina le fa’alavelave na laga ane ma fesoasoani, ma auina atu ai loa le na a’afia i le falema’i mo togafitiga.

Na taua e le atali’i o le na a’afia i Leoleo e fa’apea, ao sasa e Taulafo tioata o le latou ta’avale, sa alu ane ma fesili i ai, pe aisea ua ia faia ai ni uiga leaga i lona Tama ma toe faaleaga le latou ta’avale. E leai se tali a le ua molia, se’i vagana ai lona faliu ane ma po le gutu o le tama a lona tuafafine ma fai i ai e aua e te tautala i le mea e le oo i ai lou iloa.

Na fiu Leoleo e saili le ua molia i le po na tula’i mai ai le fa’alavelave, ae o le aoauli o le aso Sa na sosoo ai, na mafai ai loa ona pu’e fa’apagota e Leoleo le ua molia mai le fale o lana uo i Futiga, ma auina atu ai loa o ia i le Ofisa mo suesuega.

Ina ua fesiligia e Leoleo le ua molia, sa ia ioeina ai tu’uaiga uma lava fa’asaga ia te ia, e pei o lona faaoolima i lona tausoga, fa’aleagaina o le ta’avale, atoa ai ma lona faaoolima i le atali’i o le ali’i na manu’a.

Na taua atili e le ua molia i Leoleo e fa’apea, na tiga lona loto ina ua taumafai o le ua molia ma lona uncle e faalafi ia te ia fuafuaga a le latou aiga o lo o faia i Samoa. Na faamaonia e Leoleo le ‘ona o le ua molia i le taimi na ia faatinoina ai le solitulafono.

Ina ua saili e Leoleo le tino o le ua molia, na latou maua i ai se paipa tioata o loo i ai vaega o le pauta faasaina o le aisa. Ina ua fesiligia le ua molia e uiga i le paipa tioata ma vaega o le pauta o le aisa na maua ai, na tali le ua molia, o le paipa na ia maua i le auala, ona ia tago lea ma piki i luga ma tu’u i totonu o lana taga.