Ads by Google Ads by Google

Tu’uaia se tamaitai i le fasioti tagata ona o le maliu o lana uo teine


[ata: SN]
ausage@samoanews.com

Pago Pago, AMERIKA SAMOA

 

O le vaiaso na te’a nei na taofia faapagota ai e Leoleo se tamaitai ma molia i le moliaga o le fasioti tagata faamoemoeina, e mafua mai i le faalavelave lea na maua ai e Leoleo le tino maliu o lana uo tamaitai i totonu o le potu o le fale mautotogi lea na la nonofo ai i Pago Pago.

 

Ina ua fesiligia e Leoleo le tamaitai ua molia ia Silei Sakalia e tusa ai o lenei mataupu, sa ia taua ai e faapea, ua leva ona ia mafaufau e faaoo le oti i lana uo tamaitai ae o le taeao o le aso Gafua o le vaiaso na te’a nei na faatoa ia faataunuuina ai loa lana fuafuaga ua leva ona i lona mafaufua.

 

O le vaiaso lava foi na te’a nei na tula’i ai le tamaitai ua molia ia Sakalia i luma o le Fa’amasinoga Faaitumalo mo lana ulua’i tula’i. O le ali’i Loia Fautua ia Michael White o lo o tula’i mo ia i lenei mataupu.

 

Ua molia e le malo ia Sakalia i le moliaga e tasi o le fasioti tagata i le tulaga muamua, o le vaega A o solitulafono mamafa, lea e mafai ona faasala ai se tasi i le Toese i le oti, poo le faasala foi mo le olaga atoa e aunoa ma le avanoa e palola mai ai i tua, pe faasala foi i le faasalaga faa falepuipui lea e amata mai i le 10 tausaga ae le silia i le 30 tausaga.

 

Talu ai le tulaga matuia o le mataupu e pei ona tu’uaia ai Sakalia, ua finagalo ai le afioga i le tamaitai Faamasino ia Gwen Tauiliili-Langkilde e taofia pea o ia i le Toese e aunoa ma se tupe e tatala ai o ia i tua.

 

O le taeao nei lea ua faatulaga e toe valaau ai le mataupu a Sakalia i luma o le Fa’amasinoga Faaitumalo, mo le faatulagaina o se aso e faia ai loa lana ulua’i iloiloga autu.

 

TAGI A LE MALO

 

O le afiafi o le aso Gafua, Oketopa 11, 2021 pe tusa o le itula e 4:00 na faafesootai ai e le tamaitai o Silei Sakalia i le Ofisa o Leoleo e tusa ai o le faalavelave ua tula’i mai i lana uo tamaitai, lea o loo maliu i totonu o le potu o le fale o loo la nonofo ai i Pago Pago.

 

Na faailoa e Sakalia i le Leoleo na taliina mai le Telefoni, o lea ua ia manatu e logo aloaia le Ofisa o Leoleo e tusa ai ma le tino maliu o lana uo tamaitai o loo taatia ai i totonu o le fale, ua tele itula talu ona maliu o ia.

 

E toatele Leoleo Suesue na tali atu i le valaau ma latou maua atu ai le atalii o le tagata e ana le Fale Mautotogi lea o loo mautotogi ai Sakalia i Pago Pago, ma talosaga ai loa mo se avanoa e ulufale ai i le potu o loo mautotogi ai Sakalia.

 

Na tatala e Leoleo Suesue le potu e ala i le fa’aaoga o le key na tuu atu i ai e Sakalia ma latou molimauina ai se Tina pe a ma le 50 tausaga o loo taatia mai i totonu o le potu. Na aga’i atu Leoleo ma taumafai e saili se uaua ola o lenei tina peita’i e le’i mafai ona maua.

 

O lona tino ua maluluina ma ua amata fo’i ona malo lona tino, e foliga mai ua leva ona maliu o ia. 

 

Na taunuu le Vaega a le EMS ma auina atu loa le tino o lenei Tina i le Falema’i o le LBJ i Faga’alu mo suesuega. Na taua e le Foma’i na gafa ma le faia o le siaki faapitoa mo le tino o le tina, e foliga mai ua silia i le 6 itula talu ona maliu lenei tina ao auina atu loa lona tino i le falema’i mo le faia o se saki.

 

O le taimi lava foi lea na faailoa aloaia ai e le Fomai, le maliu o le tina na aafia ina ua taunuu atu lona tino i le Falema’i i Faga’alu.

 

A o lei auina atu Sakalia i le Ofisa o Leoleo, na siaki e Leoleo lona tino poo i ai se aupega poo ni fualaau faasaina. E leai se mea na maua i le tino o Sakalia. O le taeao na sosoo ai, Oketopa 12, 2021 na faatoa maua ai loa le avanoa e fesiligia ai e Leoleo ia Sakalia e tusa ai o lenei mataupu. 

 

Na muamua faailoa e Leoleo aia tatau o le ua molia mo lona silafia. Na faaalia e Sakalia lona malamalama i ona aia tatau, ma na malie foi o ia e faaagafua ona aia tatau ae ua ia manatu e tuuina atu sana faamatalaga i Leoleo Suesue e tusa ai o lenei mataupu matuia.

 

Na taua e Sakalia i Leoleo Suesue e faapea, ua leva ona ia mafaufau e fasioti lana uo tamaitai. Na te lei faailoaina i Leoleo le mafua’aga na oso ai nei manatu ia te ia, pau lana faamatalaga, sa ia mafaufau e faaoo le maliu i lana uo tamaitai, ma ia filifilia ai loa le aso Gafua o le vaiaso na te’a nei e faataunuu ai lana fuafuaga.

 

Pe tusa o le itula e 5:00 i le vaveao, na ala a’e ai i luga ma ia vaaia lana uo tamaitai o loo moe pea lava o ia. Sa ia nofo ma mafaufau poo le taimi lelei lea mo ia e faataunuu ai lana fuafuaga ua malie i ai.

 

Ao nofonofo i luga o le nofoa sa ia vaaia lana uo tamaitai o loo taoto pea lava e lei tu i luga mai lona moega. Na umi se taimi o nofo ma vaavaai atu i le taoto mai o lana uo tamaitai, seia oo loa i lona tu atu i luga ma faataunuu loa lana fuafuaga.

 

Sa ia taua i Leoleo Suesue le leai o se faaletonu i le la mafutaga ua tele masina. E ui lava fo’i e i ai ni nai faaletonu i isi taimi, ae o le tele lava o taimi e mautu ma lelei le la mafutaga. Na te le iloa le mafuaaga ua te’i ai lava ua ese ona lagona e faatatau i lana uo.

 

I le taeao na tulai mai ai le faalavelave, na ia savali atu ai loa ma tago lima lua i le ua o lana uo tamaitai ao taoto o ia ma titina loa lona ua. Na vaaia e Sakalia le tafiti solo o lana uo tamaitai e foliga mai o loo fia maua se ea e manava ai ae o ona lima o loo taumafai e aveese ona lima, peitai’ sa matua malosi lava lona mau lima lua i lona ua o lana uo ma faaauau pea ona titina.

 

Na taua e Sakalia i Leoleo lona musu e faamamulu ese ona lima mai le ua o lana uo tamaitai, ae sa faaauau ai pea ona mau ai ma titina pea seia oo i lona vaai atu, ua le toe gaioi o ia, ma ua ese foi le lanu o ona foliga.

 

Sa ia taua i Leoleo Suesue le tu’u atoa o lona malosi e tatao ai i lalo lana uo tamaitai ona o lona mana’o ia aua nei toe ola mai. 

 

Na fesili Leoleo Suesue ia Sakalia pe i ai lava se mafua’aga na ala ai ona ia faatinoina lenei solitulafono, na tali le ua molia, ua pau lava o lona le fiafia i lana uo tamaitai i le la mafuaga.

 

O le toatele o uo ma aiga o le tamaitai ua maliu na matua faateia i latou i le tula’i mai o lenei faalavelave.

 

O tusitusiga i luga o auala o fesootaiga faaonapo nei (Facebook) na faailoa ai e uo ma aiga o le tamaitai ua maliu le ituaiga tagata e i ai o ia.

 

O le tamaitai ua maliu e faigaluega i le kamupani i’a. Na taua e ana uo e faapea, o lenei tamaitai, o se tagata e agamalu ma lau fofoga fiafia i le tele o taimi. E loto alofa ma tausaafia i soo se taimi.

 

Na taua e le fanau a lenei tamaitai le faateia o i latou i le tala e faatatau i le maliu o lo latou Tina. O le latou faankunauga uma, ia faamalie le tulafono ma faia se faaiuga talafeagai i le tagata na ia faaoo le oti o lo latou Tina.