Ads by Google Ads by Google

Tu’uaia se Tina i lona le usitaia o Tulafono tau i Fualaau Faasaina


[ata: SN]
ausage@samoanews.com

Pago Pago, AMERIKA SAMOA

 

Ua taofia nei e le malo ma molia i le Tulafono se Tina e 31 tausaga le matua, i lona le usitaia lea o Tulafono tau i Fualaau Faasaina i le teritori, ina ua maua ia te ia vaega o fualaau faasaina i le taimi na saili ai e Leoleo se ta’avale na latou taofia i le soona alu saoasaoa i luga o le allele.

 

O le masina na te’a nei na fa’ataunuu ai le uluai iloiloga o lenei mataupu i luma o le afioga i le Tamaitai Faamasino ia Gwen Tauiliili-Langkilde, mo le iloiloina lea o mau a le malo, pe lava ma totoe e lagolago ai le solitulafono, ae pe mafai foi ona faamaonia o le ua molia o lo o tu’uaia i le fa’atinoina o lea solitulafono.

 

O le mae’a ai o le ulua’i iloiloga sa faia, na faamalieina ai le finagalo o le Fa’amasinoga, ua lava ma totoe mau sa folasia e le malo e tofu atu ai lenei mataupu i luma o le Fa’amasinoga Maualuga. 

 

O le vaiaso la na te’a nei na tula’i ai Fualaau Feagai i luma o le Fa’amasinoga Maualuga, ma ia teena ai tu’uaiga fa’asaga ia te ia. O le aso 14 o Novema o le tausaga nei lea ua fa’atulaga e toe valaau ai lana mataupu.

 

Ua toe taofia nei o ia i le Toese i Tafuna, se’i vagana ua totogi le $15,000 ua fa’atulaga e le Fa’amasinoga ona fa’atoa mafai lea ona tatala o ia i tua, e fa’atali ai taualumaga o lana mataupu lea ua fa’agasolo nei i luma o le Fa’amasinoga Maualuga.

 

Ua molia nei e le malo ia Feagai i moliaga mamafa e 2, o le umia fa’asolitulafono o vaega o le pauta fa’asaina o le aisa; faapea ai ma le moliaga o le umia faasolitulafono o vaega o le laau fa’asaina o le mariuana, o ni solitulafono mamafa e mafai ona fa’asala ai se tasi i le toese mai le 5 e oo atu i le 10 tausaga, pe fa’asala fo’i i le salatupe e amata mai i le $5,000 e oo atu i le $20,000, pe faasala fo’i i fa’asalaga uma ia e lua.

 

E to’atasi le molimau na valaau e le malo i le taimi o le ulua’i iloiloga i le vaiaso na te’a nei, o le susuga lea i le ali’i Leoleo Suesue ia Motu Tafaovale.

 

Na taua e le molimau a le malo i lana fa’amatalaga tauto e fa’apea, o le vaveao o le aso 2 o Aokuso, 2021 ao tiute ni ali’i Leoleo se to’alua i luga o le alatele i Vaitogi, na la vaaia ai se ta’avale pikiapu o aga’i atu i luga o le alatele i se saoasaoa uiga ese e le tusa ai ma tulafono.

 

E to’alua tagata na vaaia e Leoleo o lo o malaga atu i totonu o le ta’avale. Na faaola moli faailoilo o le ta’avale Leoleo sa tietie ai ali’i Leoleo nei e to’alua ma aga’i atu loa e taofi le pikiapu e pei ona taua.

 

O i latou e to’alua sa i totonu o le ta’avale, e aofia ai se ali’i sa faafoeina le ta’avale, ma se tama’ita’i sa nofo i le nofoa o le pasese, lea na mulimuli ane faamaonia lona suafa, o ia lea o Feagai, o le ua molia i lenei mataupu.

 

Ina ua faailoa atu e Feagai lona igoa i Leoleo, sa faigofie lava ona manatua e Leoleo, o ia lea o le uo teine a le ali’i o lo o tau sailia nei e Leoleo, e mafua mai i se mataupu tau solitulafono na tula’i mai i Kokoland i ni nai masina e le i mamao atu, lea o lo o tu’uaia i lona faia lea o uiga mataga i se tama’ita’i e talavou i lalo o le tulafono.

 

A o aga’i atu Leoleo e talanoa i le ave ta’avale o le taavale pikiapu e pei ona taua, na vaaia e Leoleo ni minoi solo o le tagata o loo nofo i le nofoa o le pasese, e foliga mai o lo o ia taumafai e nana se mea i lalo o lona nofoa.

 

Ina ua fesiligia le ave ta’avale mo lona laisene, sa ia fa’ailoa i Leoleo, o lona laisene ave ta’avale na mae’a lona aoga i le 3 tausaga talu ai. Talu ai e lei i ai se laisene ave ta’avale o le ali’i sa faafoeina le ta’avale, o le mafua’aga lea na taofia ai loa i laua uma i lalo o le vaavaaiga a Leoleo, ma taofia atu ai fo’i ma le ta’avale.

 

I le mae’a ai ona fesiligia e Leoleo o i laua nei e to’alua, na toe tatala ai loa i tua le ave ta’avale, ina ua mae’a ona tuuina atu i ai ni pepa molia i lona le usitaia lea o tulafono tau ta’avale afi i luga o le alatele, se’i vagana ai Feagai na taofia i le Toese i Tafuna, ina ua maua i ai fualaau fa’asaina.

 

Na taua e le molimau a le malo e fa’apea, i le taimi na fesiligia ai Feagai, sa ia faailoa ai i Leoleo, o loo ia te ia vaega o fualaau faasaina, e le gata i totonu o lana ato ae faapea fo’i i totonu o le ta’avale sa la malaga mai ai ma le ave taavale.

 

Ina ua tatala e Leoleo le ato a Feagai, sa maua ai i totonu ni tama’i pepa iila se 3 o lo o i ai vaega o le pauta pa’epa’e. Sa toe saili le isi itu o le ato ma maua ai ni paipa tioata se 2 e fa’aaoga e ula ai le aisa. I totonu o paipa tioata ia e 2, o lo o i ai vaega o le pauta pa’epa’e.

 

Na malie Feagai latou te aga’i atu ma Leoleo e saili totonu o le ta’avale mo fualaau fa’asaina o lo o i ai. I lalo o le nofoaga o le ave ta’avale sa nofo ai Feagai, na maua ai e Leoleo se tama’i pepa iila o lo o i ai sikaleti e 3 ua uma ona taai. 

 

Na faia se suega i le pauta pa’epa’e na maua i totonu o pepa iila ma paipa tioata e 2 ma fa’amaonia ai, o vaega ia o le pauta faasaina o le aisa. Sa faia fo’i se suega i lau mamago sa i totonu o sikaleti e 3 na maua i totonu o le ta’avale ma fa’amaonia ai, o lau mamago ia o le laau o le mariuana.

 

Ina ua fesiligia e Leoleo ia Feagai e fa’atatau i fualaau fa’asaina sa maua ia te ia, na ia ta’utino ai, o ia e ana uma fualaau fa’asaina sa maua i totonu o lana ato ma lalo o le nofoa sa nofo ai. Sa ia taua atili i Leoleo e faapea, o fualaau fa’asaina nei sa ia fa’atauina mai i se tagata o lo o ia tulei ma faatauina atu fualaau fa’asaina mai le nofoaga e taua o “Le Filifili”, o se nofoaga i le va o Iliili ma Vaitogi.

 

Ina ua fesili Leoleo ia Feagai poo ai le igoa o le tagata na ia faatau mai ai fualaau fa’asaina, na musu Feagai e fa’ailoa i Leoleo le igoa o le tagata lea. Sa ia faailoa i Leoleo, “E le mafai ona ou faailoaina atu le igoa o lea tagata.”

 

Na taua atili e Feagai i Leoleo e fa’apea, pe tusa o le 4 masina talu ai na amata ai ona ia tagofia fualaau fa’asaina. O le aso na la auai atu ai ma lana uo tama i le pati o se faaipoipoga sa faia mo se tasi o a laua uo, na tuu atu ai e lana uo tama le paipa o lo o i ai le aisa ia te ia na te ulaina.

 

Talu mai lava lena aso, na amata mai ai lava ona ia fiafia e fa’aaoga fualaau fa’asaina, seia oo lava i lona alu ma fa’atau mai ana fualaau fa’asaina mai le tagata lea o loo ia tulei ma faatau atu fualaau fa’asaina, mo le faamoemoe e fa’aaoga mo ia lava.

 

Na fesili le loia a Feagai i le molimau a le malo, pe na ia faia le suega i pauta ma mariuana sa maua ia Feagai, na tali le molimau, e leai.

 

I faafinauga faai’u a Loia, na finau ai loa le loia a le itu tetee ina ia solofua le tagi fa’asaga ia Feagai, ona e ese le Leoleo na faia le suega o fualaau faasaina sa maua i le ua molia, ese le Leoleo lea o lo o molimau mo le itu a le malo.

 

E ui i le tetee malosi o le itu tete’e i le tagi a le malo, na faamalieina le Fa’amasinoga i le lava lea ma totoe o mau na folasia e le malo e lagolago ai le latou tagi fa’asaga ia Feagai.