Ua ufitia nei Amerika Samoa i le ao pogisa, ona o le tuua o le malo e le afioga i le ali’i Senatoa mai le Itumalo o Manu’a, le afioga i le Le na Muaiao ia Galea’i M. Tu’ufuli i le maota gasegase i St. Rose Hospital i Hayward i Kalefonia ina ua 81 tausaga o lona soifua.

O lenei tala fa’avauvau na mafai ona fa’amaonia mai e se tasi o alo o le afioga i le ali’i Senatoa, le susuga a Maverick Galea’i i se fa’atalatalanoaga mai lona aiga i Hayward i Kalefonia.

O le itula e 11:11 i le taeao o le aso Lulu o le vaiaso nei na fa’amanava filemu ai e le Atua galuega a le afioga i le ali’i Senatoa, a o siomia o ia e lona aiga e aofia ai ona alo ma fanau o lana fanau.

E pei ona taua e Maverick i le Samoa News, o le afioga a Galea’i na malaga atu i Kalefonia mo lana talavai masani, aemaise ai o lona auai atu lea i le Falelauasiga o si ona tuafafine matua.

Na taua e Maverick e fa’apea, o Galea’i, o se Tama ua atoa uma i ai agava’a eseese. O se tagata e lelei i le fuafuaina o ni polokalame mo le aiga. O se Tama e loto maualalo, e anoanoa’i ana taleni ma meaalofa, ae o se Tama fo’i e tulaga ese le maualuga o lona mafaufau toe a’oa’oina lelei.

E talitonu le Samoa News, ua mae’a ona logoina Ta’ita’i o le atunu’u e aofia ai le afioga i le ali’i Kovana ia Lolo Matalasi Moliga, o Ta’ita’i o le Fono Faitulafono i le tuua ai o le malo e le afioga a Galea’i.

E tuumalo le afioga a Galea’i o loo ia nofoia le nofoa mo lona itumalo o Manu’a #1 i le Maota Maualuga a le Senate mo le 2 o nofoaiga e ta’i 4 tausaga le umi, lea e fa’amoemoe e mae’a i le aso 3 o Ianuari, 2021.

O ia e to’alua i ai Senatoa o loo fai ma sui o le itumalo o Manu’a #1 i totonu o le maota maualuga a le Senate.

O se tasi lenei o Ta’ita’i iloga i soo se taimi e fesaga’i ai ma le au fa’asalalau, e le gata e sauni i soo se taimi e tu’uina atu tali o fesili, ae o se tasi fo’i o Ta’ita’i e le fefe e fa’asoa ona lagona e fa’atatau i ni mataupu ma’ale’ale e alia’e mai i le atunu’u.

Sa tautua fo’i o ia i le tele o tulaga i totonu o le faigamalo a Amerika Samoa, e aofia ai le Kovana Itumalo mo le itumalo o Manu’a, atoa ai ma le tele o Komiti Fa’afoe sa galue ai o ia. Sa avea fo’i o ia ma Komesina o le Matagaluega o Leoleo i nofoaiga ua mavae.

I le fa’amanatuina o le aso o Tagata Matutua i le atunu’u i le 2017, na tauaaoina ai e le afioga a Galea’i se Faailoga Taualoa e avea ai o ia o se tagata matua ua tele tausaga o lana auaunaga i le malo. O lea Faailoga Taualoa na saunia lea e le afioga i le ali’i Kovana.

I le sauniga na tauaao aloaia atu ai le Faailoga Taualoa a le afioga a Galea’i, sa taua ai i fa’amaumauga e fa’apea, o le tausaga e 1960 na amata ai lana tautua o se Leoleo a le malo. Sa tautua fo’i o ia i le tele o vaega eseese o le malo.

Sa avea o ia ma Faiaoga mo le Kolisi Tuufa’atasi mai le 1976 e oo atu i le 1982. Sa galue fo’i o ia o se Faufautua Faapitoa i le 1985 mo le afioga a A.P Lutali ao avea ma Kovana. Sa avea fo’i o ia ma Komesina o Leoleo i le 1985 e oo atu i le 1992.

E momoli au fa’amaisega i le paia o aiga ona o le valaau paia a le Atua i le afioga a Galea’i.

I se pepa o fa’amatalaga na tuuina mai e le afioga i le Faipule mai le Laumua i Uosigitone, le Tofa Aumua Amata, sa ia taua ai le tele o tausaga o tautua le afioga a Galea’i mo tagata ma le malo o Amerika Samoa.

“O le afioga i le ali’i Senatoa ia Galea’i sa ia tautua mo tagata ma le atunu’u o Amerika Samoa mo le tele o tausaga, e le gata i le Fono Faitulafono ae fa’apea ai fo’i ma isi ana auaunaga. Ou te manatua Galea’i a o avea a’u ma talavou i totonu o si o tatou atunu’u nei. O se tasi sa fai ma fa’ata’ita’iga lelei mo le to’atele o tagata, o lana auaunaga e matua ou fa’aaloalogiaina lava. O le a tele e suiga o le Fono Faitulafono ina ua valaau le Atua ia Galea’i. O se Ta’ita’i e tulaga ese ana faaiuga fai mo le manuia o le Teritori,” o se vaega lea o le saunoaga a Aumua.