Ulua’i tamaitai fitafita Samoa ua faamau lona suafa i totonu o le ‘Quartermaster Hall of Fame’
Pago Pago - AMERIKA SAMOA
O le aso 6 o Me, 2024, sa faataunuuina ai se sauniga taua i Chesterfield, Virginia, e aloaia ai se tasi o lupe fa’alele a Amerika Samoa, ua litaea mai i se tasi o vaega’au a le Malo Tele, le Ami, ina ua avea o ia ma ulua’i fitafita tamaitai Samoa, e fa’amauina lona suafa i totonu o le ‘Quartermaster Hall of Fame”, e aloaia ai lana tautua matavela i totonu o le militeri, i le silia ma le fasefulu (40) tausaga.
O CW4 (Chief Warrant Officer Four) Bean-Jamias, Hope Leatuvai, ua faamauina nei i tala faasolopito a le Ami, e tusa ai ma lenei tulaga maualuga i totonu o lenei vaega’au, ua ia ausia.
I sana imeli na lafoina mai i le Samoa News, sa ia fa’aalia ai le faamanuiaina o ia ma o le viiga ma le faamanu e a le Atua lea, mo lona alofa mutimutivale, a’o ia tautua i totonu o le militeri. Sa ta’ua e CW4 Jamias-Bean, e ui i le umi o lenei faigamalaga ae peitai, sa le’i tu’ulafoa’ia o ia e le Atua, lea ia i’u manuia ai ana taumafaiga uma.
Ma o se faamoemoega maualuga i lenei Vetereni, o le avea lea o lenei tulaga ua ia ausia ma se fa’alototele po o se u’unaiga i ni isi o tamaitai Samoa, o lo’o fia ulufale atu i totonu o le militeri, ina ia saili mo mea sili atu ae le gata i lea, ia tausisi i taitaiga a le Atua.
O CW4 Jamias-Bean, o le lona fitu (7) o se fanau e to’a sefulu ma le lua (12) a le susuga ia Leonardo Jamias ma le faletua ia Ma’ave Saei Jamias. E to’afitu (7) ni ona uso (ua maliu le to’atasi) ma ni tuagane se to’afa (4).
O le tina a le aiga, e malaga mai i Fitiuta, Manu’a, ae ina ua 23 ona tausaga, sa ia faimalaga atu ma faamautu i Honolulu, Hawaii, lea na feiloai ai ma se alii mai Filipaina.
O CW4 Bean-Jamias sa fanau mai i le tausaga e 1957, ae o Iuni 27, 1975 na ulufale atu ai CW4 Bean-Jamias i totonu o le Vaega’au a le Ami mo Tamaitai (WAC), i le mae’a lea o aso e 20 talu ona ia fa’au’u mai i le aoga maualuga a Farrington, i Honolulu Hawaii.
Sa amataina mai le tautua a CW4 Bean-Jamias i totonu o le Ami, o se PFC (Private First Class), ma soso’o ai ma lona ausia o le tulaga o le SFC (Sergeant First Class), ma aga’i atu ai lava i luga o se ‘Warrant Officer’, ina ua atoa le 12 tausaga o lana tautua, ma faai’u ai lava i le tofi maualuga o le CW4 (Chief Warrant Officer Four)
E tele nisi o fa’ailoga sa faapea ona faamanuiaina ai CW4 Bean-Jamias faapea ma tofi maualuluga sa ia ausia.
Sa le mafai ona faagaloina e CW4 Bean-Jamias ia le amataga o lana tautua, i le avea ai o ia o se tamaitai talavou Samoa, i lona to’ai ulufale atu i totonu o se faalapotopotoga e faatumulia i alii.
Ae sa ia manatuaina a’oa’oga mai i totonu o lona aiga, aemaise lava o le faaSamoa, ma sa fa’afaigofie ai le suiga tele ua o’o i lona olaga. Na fa’asoa mai CW4 Bean-Jamias ia lona manatuina o fautuaga a si ona tina sa fa’asoa atu ia te ia ma ona uso, lea sa faamamafaina ai le galue malosi, faamaoni ma le filifili e fai le mea tonu ma le sa’o.
Na fa’asoa mai CW4 Bean-Jamias i le faamanuiaina o ia, ona o se tina e mata’u i le Atua.
I le fa’agasologa o lana tautua, sa mafai ona malaga atu ai o ia i atunu’u e pei o Kolea, Siamani ma Hawaii faapea ma le tele o nofoaga faalemiliteri ma fa’ai’uina mai ai i Fort Belvoir, i Virginia, lea sa avea ai o ia ma faufautua o le MACOM Logistics ma fa’auluuluga o le Vaega Su’esu’e CIC (Criminal Investigations Command).
I le toe tagataga’i i lona soifuaga i totonu o le militeri, i le avea o ia ma taitai ma tulaga uma sa mafai ona ia ausia, ua faamaonia ai lona galue malosi ma lona tu’uto i lana tautoga.
Sa amataina mai le soifuaga faaleaoaoga a CW4 Bean-Jamias i le aoga tulaga muamua a Kalihi-Uka, i Honolulu, Hawaii ona soso’o ai lea ma le aoga maualuga a Farrington lea sa ia fa’au’u mai ai i le 1975.
I lona tomanatunatu i lona olaga talavou sa fa’asoa mai ai CW4 Bean-Jamias, le leai o sana sini sa faatuina mo lona lumanai, ae peitai, i sona talitonuga, sa le’i tu’ulafoa’iina o ia e le Atua. Ma na tauala mai i lona tina ia le a’ao alofa o le Atua, e ala i le aoaoina sa’o o ia, i totonu o le latou aiga.
Ae sa iai lava taimi na sese ai ana faaiuga fai, peitai, i le iai o sona tuagane matua sa mafai ona fesoasoani i le toe fa’asa’osa’oina o ona ala talavou.
Sa faamatala e CW4 Bean-Jamias se taimi na sola ese ai mai i le a’oga, i lona talavou ma le sasaina o ia e lona tuagane aemaise ai o upu faala’ei’au a lona tuagane mo ia, sa ia le toe faagaloina seia o’o mai lava i lona matua.
O iina na suia ai le sa a le tamaitai ma ia taumafai atili ai i lana a’oga, lea na mafai ai ona ia ulufale atu i le Iunivesite a le Hawaii Pacific ma ia ausia ai lona fa’ailoga o le AA ma le BA, ona fa’aauau ai lava lea i le Iunivesite a Central Michigan, lea sa ia maua ai lona ‘Master of Science’.
Ina ua fesiligia o ia i le mafua’aga na ia ulufale ai i le militeri, sa tali lenei tina, o se avanoa e mafai ona tautua ai mo lona atunu’u ae le gata i lea, e fesoasoani ai i lona aiga. Ma sa ia maua ai foi se avanoa e a’oa’oina ai se taleni ma faimalaga atu i atunu’u ese.
E to’afa nisi tei o CW4 Bean-Jamias sa ulufale atu foi i le Ami. E pei o le susuga i le Lt. Col Mapu S. Jamias ma Lt. Col. Leonard S. Jamias, faapea ma SFC-E7 (Sergeant First Class E7 Travor Tuiolosega ma ua litaea uma i latou mai i le Ami. Ma lona uso o Darlene A. Verburg lea sa tautua mo le tolu tausaga.
Ina ua litaea mai ia CW4 Bean-Jamias mai i le militeri, sa fa’aauau pea ona galue mo le malo, i nisi foi o ofisa ma matagaluega. Ma ia fa’avaeina ai le polokalama o le MWOAC (Mobility Warrant Officer Advanced Course).
Sa faaleoina e CW4 Bean-Jamias lona agaga fa’afetai i si ona tina, e le gata i le fanauina o ia, ae o le faafaileleina ma le aoaoina o ia i lona tuputupu a’e, ma avea ai ma tamaitai/tina, ua iai nei. Sa ta’ua e CW4 Bean-Jamias, mai lava i lona itiiti, sa aoaoina o ia e si ona tina ina ia ave le viiga i le Atua i tulaga uma o le olaga ma o le a ia fa’ae’eina oe.
O se tasi o faaupuga Samoa e fiafia ai tele lenei ta’ita’i’au, o le faaupuga faapea, “E iloa le tama ma le teine a’oa’oina i lana tu, o lana nofo, o lana savali ma lana tautala.”
O lo’o fa’amautu nei CW4 Bean-Jamias ma si ona toalua o Danny Bean i Chester, Virginia ma si a la fanau e to’alima (to’afa tamaitai ma se alii e to’atasi), ma fanau a fanau e to’afitu.