Ads by Google Ads by Google

Una’ia fa'atonu fou fa’ato’aga tagai faifa’ato’aga Saina

Ua matua fautuaina le ali’i fa’atonu fou o Fa’ato’aga ina ia tagai totoa lava i le tulaga o faifa’ato’aga Saina ua fa’ato’aina nei le tele o eleele i Amerika Samoa. O nisi o nei fautuaga ua fa’ailoa atu e senetoa o le maota maualuga ona o lo’o atugalu i latou i le fa’aauau pea ona fa’ato’ateleina tagatanuu o Saina o lo’o ua ulufale mai i Amerika Samoa ma avea ma faifa’ato’aga.

 

“Ua ulufale mai tagatanuu mai Saina ma fa’ato’a tatou laufanua mo fa’ato’aga, ua va’aia le fa’atau atu i le mamalu o le tatou atunu’u i autafa o alatele ma le tele o faleoloa, peita’i, ma ua latou avea fo’i tupe a le atunu’u ona o nei fefa’ataua’iga,” o se tasi lea o saunoaga sa fa’alogoina i tauaofiaga na pasia ai le tofiga a le Kovana o Sala Dr Mataese Samuelu e avea ma fa’atonu o le Matagaluega o Fa’ato’aga.

 

Ua faamalosia lava le ali’i fa’atonu e faia muamua e ia lea tiute i le taimi lava e amata ai lana galuega o le fa’atonu o Fa’ato’aga i Amerika Samoa.

 

I se manatu na fa’aalia e le ali’i fa’atonu i lona avanoa na tuuina atu e saunoa ai i lea tauaofiaga a le maota maualuga, sa ia fa’ailoa ai o lo’o lelei lava le matagaluega o Fa’ato’aga i le fa’atinoga o ana tautua, ae i ai lava nai mea laiti e ao ina fa’avasega fa’aleleia i lona fa’atautaiga lelei e tuatuaina ai le atunuu.

 

Sa fesiligia fo’i e se tasi o ali’i senatoa le ali’i fa’atonu a’o le’i fa’amaonia lona tofiga, pe mata e i ai sana fa’ato’aga. Peita’i ua fa’ailoa e Sala, e leai sana fa’ato’aga, ae o lona agaga o loo mautu lea i le aufaifa’ato’aga o le atunu’u aua o le latou manulauti, “E tua i ai le atunu’u i lona fofoga taumafa.”

 

O Sala Dr Samuelu, o se alii faia’oga, ae o lana tautua fo’i e le’i leva ona tula’i ai, o se alii faipule mai le itumalo o le ituau malosi. Peita’i sa ia fa’ailoa atu i lea vaega taua o le tatou Malo, “O le a ou taumafai e vave matauina e outou se suiga lelei i sa’u taumafaiga i lea matagaluega.”

 

Peita’i o se tasi o galuega o loo fa’aauau e lenei ta’ita’i e ese mai lona tofiga ua i ai nei, o le tuufa’atasia lea o le tusi Fa’alupega mo Tutuila, Aunuu ma Manu’a. Mo lana lea tautua, sa fesiligia ai e Senatoa Tuaolo se tulaga ua i ai lea poloketi.

 

Ua fa’ailoa mai e Sala o lea tusi ua toeititi lava mae’a ma o lo’o i ai sana malaga i Manu’a e fa’amae’a mai ai lena vaega tele o le tusi, ma o le toe vaega fo’i lea o le tusi ma taua’ao aloaia ai loa i le komiti tofia e latou te iloiloa lea galuega.

 

O lea tusi ua faatupeina lea i se alagatupe na faamatu’u mai i le Ofisa o le Insular Affairs o le Matagaluega o le Initeria.