Ads by Google Ads by Google

US Army Reserve tali fesili & popolega matua - fale a’o fanafana


O le taimi ua ta'utino ai e Commander Jon Lee, e matua le mafai ona ati mai se pulufana e fana i totonu o le fale'atoa lava ua mae'a fausia, ae silisili ona fa'atoluina le malosi ole puipui lea ua mae'a tausia i le itu tonu e fana aga'i i ai fana i totonu o lea fale. Ma ua pasia atoatoa e le feterale ma le USArmy lea fausaga ua tula'i nei i Amerika Samoa. E 100% lona tulaga anagata ua i ai. [ata: Leua Aiono Frost]

O Commander Jon Lee ua tali atu i le matua lea i lana fesili, "AIsea ua le usita'ia ai e le USArmy Reserve le tulafono o le 1,000 futu e tatau ona mamao ese ai so'o se nofoaga fa'apea mai le falea'oga o a'o'oga ai le fanau. Fa'atasi ai ma le 1,000futu le mamao o le tagata e umia le fana mai fanau aoga? [ata: Leua Aiono Frost]

Na to'atele nisi o matua, sui faipule o itumalo ma matai fo'i, o nisi o Fitafita Tuai a le Malo tele, faia'oga ma fanau a'oga sa o'o ane i le fonotaga lona fa na fa'atulaga e le USArmy Reserve e talanoa ma fetufa'i ai lagona e tusa o le latou fale fou, e fa'atula'ia ai le unite fa'apitoa mo le aoga o tomai  fanafana a le Army Reserve.

 

Ma e mafai foi ona fa’aoaga lea fale fou e aoao ai fanafana a le  Matagaluega Puipuiga o le Saogalemu Lautele ma le Matagaluega o le Puipuiga o le Saogalemu Fa’alotoifale.

 

Ona ua to'atele matua ua popole i nei ituaiga fale e a'otauina ai le fanafana ae o lo'o tulata i Tafuna High School ma le South Pacific Academy, o lea na faia ai se fonotaga a le Army Reserve ma le atunu’u i le aso Gafua.

 

Sa mua'i fa'aalia atoa e le Au Ofisa sa tofusao i le fausaga o lea fale mo A'oga Fanafana a le Militeri, e aofia ai Commander Jon Lee, o ia sa auai i le taumafaiga ina ia o'o mai lea ituaiga aoga i Amerika Samoa. O Joseph Yokoyam G7 9MSC o ia na te pasia atoatoa le lelei o le fausaga o le unite atoa o ia fale ina ia malupuipuia.

 

Mai le amataga lava sa faia mea uma e tusa o ala o le tulafono a le teritori ma le Malo Tele. Na mua'i talosaga le Army Reserve i le eleele o loo avanoa e tulata i le Malae Vaalele i tala atu o le latou nofoaga ua mae'a fausia, “Peitai sa le pasia e le Malo lena eleele mo i matou, ma ua toe se'e mai ai i le nofoaga tuai ma pasia lelei mai e le PNRS, faatasi ai ma le ituaiga galuega e fa'atino i totonu o lenei fale."

 

"E ese mai lena ituaiga o suesuega ua pasia lelei, ua fa'apea fo'i ona tu'uina i le vasega o le ASEPA mo le latou suesuega i le fausaga o le fale, ma le tulaga mautu o le malupuipuia o le si'omaga o fausia ai i le soifua o le fanau a'oga fa'atasi ai ma le siomaga lava ia,” o le tala faaauau mai lea a Lee.

 

Aisea ua fausia ai lenei fale fa'apitoa e a'otau ai fitafita ina ia sa'o ma agatonu le fana? Ona o se tasi lea o tomai o lo'o malaga fa'apitoa i fafo tatou fanau i le Militeri.

 

I atugaluga sa fa'aalia e matua, sa saunoa Lee, "E leai ma so'u fa'atu'iese i o outou fanoga, ae va'ai, e o'o ia i matou e faia fo'i matou aiga, a o'o ina latalata ni mea fa'alefetaui ma le saogalemu, e matua sisi fo'i lo'u fu'a ma alu i le atoa e fa'afesiligia na tulaga uma. Peita'i, ua matou iloa lena fo'i lagona i matua, o lea e fai atu ai, e le mafai ona matou fausia se nofoaga e lamatia ai le soifua o fanau a'oga ae le'i uia ala o le tulafono.”

 

O iina loa sa fa'ailoa ane ai loa e se tasi o tina lona fanoga, ma ia fa'apea ai, “ua mae'a fa'ailoa mai i le aiaiga fa'aletulafono a le feterale, e tatau ona tausia nei ituaiga o nofoaga e tusa ma le 1,000futu le mamao mai falea'oga. Ua le usita'ia fo'i e lenei poloketi lea vala o le tulafono a le feterale. Ua i ai fo'i ma le aiaiga tau le umia o fana o so'o se ituaiga, e tatau fo'i ona tusa ma le 1,000futu le mamao o se tasi e umia se fana mai le nofoaga o lo'o fa'atu ai se a'oga. O le a ou tolaulauina atu mo le tou silafia, o le ala lea o lo'o sau e finau la'u mau lea i le mamalu o tou susuga."

 

I lana finauga sa ia fa'aleo mai, peita'i o le tali atu i ai, "E moni o lena le vala o le tulafono ua tusia, a'o le tulaga lea e i ai i le taimi nei, ua matua 100% le malupuipuia o se pulufana mai le sao mai i fafo mai totonu o le laina o fanafanaga i le fale lea ua mae'a fausia. Ua sautualua ona puipuia ua fausia fa'apitoa ia le ati ai pulufana o so'o se ituaiga fana ua fa'aaogaina i totonu. E le o fa'aaogaina ni fana tetele o le mea lena e fa'aigoaina ai o ‘small range’ e le fe'avea'ia mai fo'i i fafo e nisi o a'o le fana ni fana, e taofia uma lava i totonu ma e tatau fo'i ona faitauina pulufana sa fanaina po'o atoa, a le atoa, e le sau i fafo le sui sa fanafana pe a le atoa atigi pulu sa ia fa'aaogaina e tusa ma fa'amaumauga."

 

Ua fesiligia tagata uma e fa'aaogaina lea nofoaga ina ia fa'alelei tomai fanafana, pe talia so'o se tasi, ae ua fa'ailoa mai e leai. Ua na'o i latou lava ua mae'a lisia o lo'o i le militeri, ma i latou ua aofia ma fa'atulaga atu e le Matagaluega o le Puipuiga o le Saogalemu Lautele ina ia a'oa'o i lea tomai, ma isi matagaluega a le malo. Ao le'i o'o atu fo'i o ia e fa'aaoga lea nofoaga, e muamua sailia lelei lona tino, ia mautinoa lava le saogalemu o mea uma, le nofoaga, i latou e faigaluega ai, ae maise o le o a'o lana fanafana ma fafo fo'i i le tulaga o usoa tuaoi i le nofoaga atoa.

 

O le pasiga o lea nofoaga sa fa'atautaia mai fo'i e le Matagaluega o Galuega Lautele a le tatou malo, le vasega o inisinia fa'apitoa mai fafo a le Feterale ma ua agava'a e fa'aaogaina mo a'oga fanafana a le Vaega Au.

 

Ua fa'ailoa fo'i, e ui lava ina ua tamau e le tulafono le 1,000 futu le mamao mai a'oga, ae ona o le eleele fa'atulagaina mo nofoaga fa'apenei ua ititi fo'i i le tatou atunu'u, ua talia ai le talsoaga ona o le mautinoa o lona saogalemu o fanau a'oga o lo'o tulata ane i lea fale.

 

Na tula'i fo'i Lydia Faleafine-Nomura, aua o lo'o i ai fo'i o ia ina ia faia se lipoti mai lona Ofisa i le Ofisa Autu o le Initeria e tusa o lenei feso'ota'iga ma le Army Reserve ona o le Fale o Fanafanaga.

 

Ua fa'ailoa manino e Lee e i ai asiasiga ta'i kuata o le tausaga ma fai i le nofoaga, afai ua tau fa'aletonu se mea i totonu o le maota e taofia lava e le fa'aaogaina le fale lea mo ni koleniga fa'apitoa o fanafanaga.

 

O le fa'afesili i tulaga o vaila'au o'ona mai pulufana po'o le "lead" ua fa'ailoa mai, e tu'u pusa uma lava mai totonu e leai se mea e tia'ia maia i fafo o lea fale lea. E teuina fa'alelei i totonu ma fa'apusa, ona o mai fo'i lea o le vaega fa'apitoa e la'u atu ma toe fa'afo'i i Amelika e tia'i ai, e leai se "lead" po'o lapisi o'ona e fa'auia i lapisi po'o nofoaga e lafoa'i ai lapisi iinei.

 

Ina ua fesiligia le taimi e faia ai nei a'oga fanafana, ae fa'ailoa mai, ua polokalama i le taimi nei e ao ina faia i le fa'aiuga o le vaiaso, ma e i ai le fu'a lanu mumu e fa'alealea ona iloa lea o lo'o fa'aaogaina le fale mo a'oga i lena taimi.

 

O nei tomai sa mua'i fa'ata'ita'ia ma faia i se tasi o eleele i le afio'aga o Malaeloa, peita'i ua tapunia i le taimi nei.