VAETAMAINA ONA O LE MATIVA
Sa ou ola mai I se aiga maualalo lava, le tamaoaiga ma ni matua pologa ma le matitiva. E iai lo’u uso masaga, e matua o ia, a’o a’u e laititi. Sa vaetamaina a’u e le uso o lo’u Tina ma lona toalua sa Faifeau I le motu o Salafai. Tusa lea ma le 2 o o’u masina, talu ai ona e leai se la fanau. Alu aso o le olaga ua atoa lo’u 5 tausaga e momoli lava a’u e lo’u tama faifeau i Taeao uma I le aoga ma toe piki mai pe a tuua le aoga.
Sa ou ola I se olaga fiafia ma le tele o faamanuiaga i totonu o si o matou aiga, na o le to’a 3 lava i matou. O le 10 o o’u tausaga sa maua atu ai le tala I le matagaluega a le Ekalesia o le a Faamalolo manumalo le Faifeau ma le faletua ona ua matutua toe mama’i.
Sa ou tu malosi e tausi nai o’u matua, ma o iina sa faamuta ai ma la’u aoga ae ou nofo e tausi i la’ua ma toe taui atu lo la’ua agalelei ma alofa I le la tausiga o a’u. I le 15 o o’u tausaga na maliu ai si o’u tama (Faifeau) ae sa faaauau pea lo’u tausi I si o’u Tina.
Sa faafetai mai si o’u Tina ma faamanuia mai ia te a’u e tusa o le matou nonofo ai, o le 16 o o’u tausaga ae maliu si o’u Tina, ou te faafetai i ni matua faaleagaga sa la tausia ma a’oa’oina a’u .
O aso uma lava ou te usu lava e ave la teu fugalaau i la tuugamau. Alu aso sau aso. Ma i se tasi o aso, sa faate’ia a’u ina ua o mai le uso (uncle) o lo’u tama e ave a’u e fai ma ona afafine ona na o tama le la fanau. Sa ese se vaaiga i lea foi nofoaga,aua ua suia se olaga fou I se olaga Tuai o le faatu I le umukuka i aso uma, e le masani ai.
O lo’u aiga lona lua, o le ulugalii ma le la fanau tama e to’alua laititi. O la’u galuega masani la i taeao uma o le momoli o nei alii e toalua i le aoga i taeao uma ma toe piki mai pe a tuua le aoga. Aemaise o le namuasua I le umukuka i aso uma. O tagamea koeikiki o’o ile fa’alo ole fale le faulala’i.
Sa fesili lo’u mafaufau, po o fea ua mou iai lo’u fiafia sa iai. O le inu ti fuamoa ma le cereal i taeao uma, o se faalifu talo falai i’a ma se supo moa I le aoauli, ae a le tali mai le afiafi I se umu ulu, faiai fe’e ma se oka alogo ma se kipoki Koko Samoa vevela o le afiafi.
O fafaga ia a aiga o le Aulotu i aso uma, felanulanua’i o mau kuka eseese aua le tausiga ole Faafegaiga, a’o lenei ua o’u iai nei I se olaga pu mo’omo’o na o le saka ma le ki laumoli I le aso atoa .
Se tasi aso sa o ai o’u matua e mata mata i taaloga a le la fanau I le aoga, ae fai mai le faatonuga ou te alu ma se taga po o se paelo e eli mai ni pipi e faaaoga ai le faalifu ulu sa fai. Na ou usitai ma ou la’a ile Sami ile vevela ole la. Ou te taunuu atu o la e sua le tai, ona ou saofa’i lea i lalo o le laau ma faalogo I le malu o le savili e faatali ai le pe o le tai, ou te alu e aumai gi aliao ma gi faisua aua le afiafi.
Ou te leiloa le taimi na ou moe ai i lalo ole laau ma mata mata i taaloga tamaiti o loo taeele I le sami. Ou te toe te’i a’e ua toe sua le tai ae ua alu a’e foi le la I lona nofoaga I le afiafi. Ua ou nofo tata a’e I luga, ua ou le mautonu I la’u taga o le a fai. Ae ou vaaia loa se tamaloa ma sona atalii o loo sii mai lo la paopao i uta. Sa ou valaau atu iai, “Tautai A’e”, ae faapea mai “O fea o le a alu ai ma lau paelo?a’ Sa ou ata ma faapea atu, “Oi na ou sau ou te eli pipi, ae ou sau o’u moe e faakali ai le pe ole tai.”
Sa ata le tamaloa ma fai mai, “Sau e avatu tama’i ia e faaaoga ai lau paelo o lea ua sua le tai.” Se e pei o le emo o le uila le sosoo o le faafetai I luga o le isi faafetai. Na ou alu ma le fiafia I le matou fale ua maua le ai o le moe i lalo le laau .
O lo’u vaivai ma lo’u lelava ua galo uma ina ua maua mai i’a ole matou meaai o le afiafi, o la’u gaioi ile vavaluina o le popo e fai ai le sua i’a, pei e uila mea uma. E taunuu mai le matou fale, pei e sisiva ile lololo o le sua i’a ma le faalifu ulu.
Ua mae’a le meaai o le afiafi, ua taotooto fiafia lava le tagata I lona pa’u sisi, ua loia I le faalifu ma le sua I’a. Ae ua amata la’u galuega masani o le afiafi, o le tapenaina o le umukuka ma fufulu ipu ia ma sauna loa mo malologa o le po, aua fo’I le usupo I le taeao, e toe amata foi le tigaina masani.
Ae faate’ia le matou fale, ina ua afe mai se pikiapu o o mai ai se ulugalii ma se la tama teine pei uma lava o a’u le matua. Sa ou toe tamo’e atu ua toe feula le afi ma sauna e toe tunu le vaivevela aua malo ua afea lo matou fale. Ae o’u faalogo atu ua valaau mai le uso o lo’u tama ia te a’u, ou te alu atu.
Na ou saofai atu I lalo I le pito I tua, ae o le taimi lea, ua ou vaaia le maligi o loimata o le fafine lea na o mai I le pikiapu, ae ua le taofi le solo o fofoga o lona toalua I le solosolo. Ua faanunumi lo’u muaulua po o le a lenei me aua tupu. Sa ou tepa atu I le uso o lo’u tama, ae faateia a’u I lo’u vaai atu, o la fo’I e tagi ma ia.
Na fesili mai le uso o lo’u tama ia te a’u, “O e iloa tagata nei?” Sa ou tali atu, “E leai.”
Na faapea mai le uso o lo’u tama, “O ou matua moni ia. Ma o si ou uso masaga le tamaitai lena.”
Sa ou nofo i lalo ma ou faalogo atu i le savali a le ulugalii, na o atu e piki a’u matou te o e saini le la pepa lotto na manumalo I le $100,000 ae le mafai ona piki ona o lo’u igoa lea na la tusia i luga o le la pepa lea na malo.
O lena po sa le’I lelei sa’u moe. Sa tuai ona o’o ma I le taeao na soso’o ae se’I toe o mai o’u matua e avatu a’u matou te o. O o’u lagona, e le ona o le tupe, ae o lo’u fiafia ua le mafaatusalia le mea e gata mai ai ona ua ou toe faatasia ma nai o’u matua moni aemaise o si o’u uso masaga.
O le taeao na soso’o ai, sa ou faamavae atu ai I le uso o si o’u tama ma lo’u Aunty ma nai o’u tuagane laity ae matou o ma o’u matua moni. Ina ua ou mauaina le faamanuiaga I le tinoitupe mai le Lotto, sa ou toe fo’I ane ma le $50,000 ma momoli ai la’u faafetai I le uso o lo’u tama I lona tausiga o a’u.
O lea ua matou faatasi ma nai o’u matua moni ma si o’u uso masaga, ma ua fa’aaogaina se vaegatupe sa mauaina, e totogi ai le fa’aauauina o la’u aoga.
THE END