Ads by Google Ads by Google

Vaiaso fa'apitoa mo tausima'i & faia’oga uma i le atunu'u


O Faia’oga a Pavaiai Elementary ua le laeia le toinga, ae tumau pea le taua o i latou, ua fa’ailoa mai fo’i, o i latou o tina, sili ona fa’apea atu mo i latou, Manuia le aso o Tina. [ata: Leua Aiono Frost]

O se va’aiga i nisi o tausima’i a le Matagaluega o le Soifua Maloloina ua latou fiafia fa’atasi i le fonotaga a i latou na usuia vave lava i le taeao ananafi ma fa’amalosia ai le latou toniga o le aso Lulu, Piniki le mitiafu, e fa’ailoa ai lo latou “galulue faatasi e tausia lelei le soifua Maloloina o Tagata uma o le lalolagi.” [ata: Leua Aiono Frost]

O lenei vaiaso ua fasi lua ai manuia, ua fa’apito augafa i ai le aso fa’amoemoe o tamaitai ma alii faiaoga fa’apea foi ma le vasega o Tausima’i i le atunuu.

 

Ua iloga mai ua le mafai ona fa’apotopoto le to’atele aua ua fa’atulafonoina i le fa’asa, peita’i ua le taofia ai le latou fa’apotopoto i nai o latou nofoaga o faigaluega ai ma latou fa’ataua le vaiaso atoa ua atofa mo i latou.

 

E mautinoa ua misia e faia’oga le mafutaga ma fanau a’oga i o latou potu a’oga, e ui ina ua matua maloloina o latou mafaufau i le faigata o le tau a’oa’oina o fanau i aso ta’itasi, ae ua sili ona ootia i latou, aua ua motusia le mafutaga ma le fanau i potu a’oga.

 

“Pe o le a lava le faigata o fanau, o aga lava ia o fanau, ua pei ita o se tina ua  matua to’atele lata fanau, ae ua maua le onosa’i ma le fa’apalepale, ae la’ei i le alofa, e faia ai le galuega, ma ua ootia le agaga, ua oo mai i lenei vaiaso fa’apitoa augafa mo i matou, ae ua misia le mafutaga ma fanau. O le tala moni, a leai tamaiti e aoa’o i lenei vaitaimi, ua matua misia lava le mafutaga, ua faia fo’i le galuega ae ua le atoatoa ona e tatau ona kiliva sao le aoaoga i le fanau, ae ua taumafai i nei ala e fou i le fanau ae toe fou fo’i ia i matou,” o se tala lea a le tina faia’oga ua fai si umi fo’i o lana tautua.

 

Ua fa’aitiiti lava fa’amanatuga o le aso o Tausima’i ua leai se sauniga lotu sa tatala ai le latou vaiaso ua fa’aitiitia mea uma ma ua na’o na faia lava o latou fa’amanatuga laiti i potu talavai taitasi o faigaluega ai le vaega latou.

 

Ua leai fo’i ni latou taaloga sa masani ona fetaui ai i le Paka i Faga’alu aua ua taofia fo’i le toe fa’aaogaina o Paka ma Malae Ta’alo i lenei vaitau.

 

Peitai pe tusa lava o le a le faigata o lenei tausaga, ae le mafai ona solofua ai le taualoa pea o le auaunaga fa’a-Tausima’i i le atunuu. Ua i ai fa’amanuiaga mai le Faipule i Uosigitone ua fa’auia mai i ala o Nusipepa ma Feso’otaiga Tau Upega Tafa’ilagi, le Facebook ina ia oo le fa’amanuiaga i so’o se tausima’i tautua i le atunuu ae maise i latou ua malolo manumalo mai le auaunaga.

 

“Ua fa’aosofia lagona lelei pe a va’aia le sagisagi o tamaitai ma ali’i tausima’i i le tatou falema’i tele i Faga’alu, e le fa’avaivai i le galuega ae ua atili ai ona tinou ma fa’amaoni i le tausiga o e gasegase o le atunuu. Fa’afetai e le o moe le tofa, ae ua matua fa’amalosia,” o se tala lea a Ramona Tuiasosopo.

 

Ua atoa le 78 tausaga mo lenei tina, ae o lo’o fiafia lava e usu i le galuega ma fai le tiute e pei ona faia mai a’o talavou. “A’o tumau pea le pule alofa a le Atua ma foa’i mai ai le malosi ia te a’u, e gafatia e lo’u fo’i sui fa’atauva’a ona tula’i ma alu e fai le tiute ua tofia ai,” o sana tala ata lea ma le fiafia.

 

O le fa’atina fo’i o le Sosaiete a Tausma’i i Amerika Samoa, Tofiga Tufele Li’amatua, o ia lea o le peresetene o le Asosi a Tausima’i, ma ua atoa fo’i le 53 tausaga o lana tautua fa’atausima’i i le atunuu, sa fa’aalia e Ramona Tuiasosopo sana fa’afetai tle i le tula’i mai fo’i a lea tina e fa’amaopoopo mea uma tau tausima’i i le latou galuega, “O ia o se ta’ita’i matua fetaui ma le faiva, ou te misia tele o ia i le galuega, ma ua avea lenei avanoa e molita’i atu ai matou alofa’aga ma le agaga alofa tele ia te ia, aua o lo’o nafa ma togafitiga i lenei vaitau o le soifua. Ia vave ona toe fa’afo’i le malosi, ae fo’i mai e toe fa’aauau le galuega fa’atasi ma i matou uma.”

 

Ua fa’apea fo’i ona fa’aoo atu le fa’amanuiaga o Tuiasosopo i le vasega o Tausima’i uma lava sa galulue punoua’i mai le tele o tausaga i lenei faiva, e le tuumamaina pe tuu i lalo le taua o la outou fo’i galuega sa tatou asa ai le gasu o le taeao i le fa’afailele o le soifua ma’ale’ale o le atunuu, fa’afetai mo la outou tautua, ia outou manuia ma maua le taui mai le Atua i galuega lelei sa faia.”

 

“I latou o galulue pea, ia fa’aauau le galuega ma tuu i luga le lamepa mumu pea, o le tausia lelei o le soifua o le mamalu o tagata uma e sulufa’i mai e mana’omia le fesoasoani i le tatou Maota Gasegase ma isi nofoaga uma ua tatou maua le avanoa e galulue mai ai. Fa’amalo le galulue.” O toe tima’i lea a Tuiasosopo i le vasega o tausima’i uma.

 

I le vasega o Faia’oga ua fa’aaogaina ai e le fanau a’oga le ala o feso’ota’iga i Upega Tafailagi ma le Facebook e avatu ai latou fa’amanuiaga ma fa’amalo i o latou faia’oga. E ui ina ua motusia le latou sootaga i le potu a’oga, ma o se mafutaga e se fo’i lo latou naunau i ai, ae ua latou fa’afetaia lo latou fa’asoa mai o le atamai lautele ia i latou.

 

Ua le natia i lalo le lamepa susulu pea o le malamalama, e ui ina faigata ala ua faia ai, ae ua iloga le faia’oga e naunau i le a’oa’oina o fanau, ua faia pea e i latou o latou tiute masani ona fesootai ma fanau a’oga, fa’avasega latou galuega e faia i aiga, togi ma toe soso’o mai lesona i le isi vaiaso o soso’o mai.

 

Ua fa’afetai mai fo’i le tamaita’i Faatonu sili o A’oga, Dr Ruth Matagi Tofiga i le vasega o faia’oga i lo latou mataala i ala eseese ua mafai ona latou fa’aauau a’i a’oa’oga a le fanau, ua latou feso’ota’i ai ma i latou, ae silisili ai o ala ua mafai ona latou fa’amanuiaina ai le latou vaiaso atoa.

 

“Fa’afetai ia te outou faia’oga, i lo outou sogasoga ma le taumafaiga ina ia feso’ota’i pea ma fanau a’oga, taumafai ala uma e fa’amalamalama atili ai mataupu ma galuega o tuuina atu ia i latou, ae silisili lava, o lo’o outou usita’ia o le pulega i le taumafai atu ina ia maua lea avanoa mo le aoaoga o le fanau a’o motusia ai le mafutaga i potu a’oga. Ua outou fa’aalia lo outou tuutoina i le galuega fa’afaiaoga, ua silisili ona aoga ia te outou lenei vaiaso, ina ua outou faia mea sili ia aoaoina ai le fanau a le atunuu. Ia fa’amalo le fai o le faiva, ia fa’amanuia fo’i le Atua i a outou galuega lelei.”

 

“Ia manuia lo outou vaiaso fa’apitoa Faia’oga uma o Tutuila ma Manu’a.” O se tala lea mai le tamaita’i fa’atonu sili o a’oga i le mamalu o faia’oga i le atunuu.