Pago Pago - AMERIKA SAMOA

O le aso 5 o Aukuso, 2026, na agai atu leoleo, i le fale o se aiga, i Nu’uuli, ina ua maua mai ai se ripoti, i se tasi o tamaitai o le aiga, ua nofo ma fa’amata’u tagata o le aiga, i le fasiotia o i latou, ma le fa’aaogaina o se agaese.

Na ave faapagotaina ma molia ia le tamaitai o Racey Ma’ai, i le Faatupu Vevesi i nofoaga tuma’oti (sauaga i totonu o le aiga), o se vaega ‘I’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe, e le silia ma le $300; po o faasalaga uma e lua.

Na lokaina ia le na molia, e aunoa ma se tinoitupe fa’atulagaina, mo le toe tatalaina i tua, a’o fa’agasolo lona faamasinoga.

E tusa ai ma fa’amaumauga a le faamasinoga, ina ua taunu’u leoleo, i le fale o le aiga na tupu ai le faalavelave, sa o latou lagonaina ia le vevesi mai o totonu o le fale.

Sa ulufale atu leoleo, i le fale ma na fa’ailoa mai iai e le aiga, ia le mea o iai ia le na molia.  Na agai atu loa iai leoleo, ma lokaina mai o ia, ma tu’u i totonu o le taavale leoleo.

Na ta’ua e leoleo i totonu o le latou ripoti, ia le fa’afitauli o Racey (le na molia), i le taimi sa taumafai ai leoleo e lokaina mai o ia, ma lona palauvale i leoleo.

Ina ua mae’a ona tu’u ia le na molia, i totonu o le taavale leoleo, sa liliu atu loa sui malu o le malo, e fa’atalanoa le aiga.

Ma e tusa ai ma le faamatalaga a le uso, a le na molia, na amata mai le latou mataupu, i lena taeao, ina ua palauvale Racey (le na molia), i le latou tina.  Ma sa taumafai le tama o le aiga, e fa’afilemu le mataupu, ae peitai, sa le usita’i Racey (le na molia), i faatonuga a lona tama, e fa’aaloalo i lona tina, ma fa’aauau ai ona ‘e’e atu i isi tagata o le aiga.

I le aoauli o lea aso, na toe tupu ai leisi faalavelave, ina ua manava atu le tuagane a matua a Racey (le na molia), ma ona maua faamatalaga, i le faalavelave na tupu.  Ina ua fesiligia e le tuagane matua ia Racey (le na molia), e tusa ai ma lana mea sa faia i lea taeao.  Ae oso le ita o le na molia, ma amata ona toe ‘e’e ma leotele i tagata o lona aiga.

O iina lea sa fa’alala ai e le na molia, ia lona fasiotia o lona uso, tuagane ma le latou tama, ma le fa’aaogaina o se agaese e fasioti ai latou.  Ma vala’au ai loa e le aiga, ia leoleo.

Na fa’ailoa atu e le tuagane ma le uso a le na molia, i leoleo, e faapea, e le o se taimi muamua lea ua fa’aalia ai ni uiga faapea, e le na molia.

Ina ua aveina e leoleo ia le na molia, i le ofisa a leoleo, ma fa’atalanoaina, sa faamatala e Racey (le na molia), e faapea, na mafua ona ita, ona ua manava atu lona tuagane, ma fa’aleagaina lona filemu, e ala i le fesiligia o ia, i le faalavelave na tupu i le taeao.

Ma na ta’ua foi e Racey (le na molia), ia le fa’ao’olima o lona tuagane ia te ia.  

E ui ina sa fa’amaonia e le na molia, ia lona lafoina o ni faamatalaga tau fa’amata’u, peitai, sa ia ta’ua, ua na’o ni faamatalaga taufa’afefe, ae e na te le faia.

O le aso 6 o Aukuso, na o’o atu ai lenei mataupu, i luma o le faamasinoga.