Pago Pago - AMERIKA SAMOA

E tusa ai ma fa’amaumauga a le malo, o le aoauli o le aso 13 o Iulai, 2024 na vala’au atu ai se tina i le Ofisa a Leoleo i Tafuna, e ripotia ai sona alo e 32 tausaga, ona o le fa’asuaava ma fa’aleagaina meatotino i totonu o le latou fale i Kokoland.

Ua molia nei le alii o Agape Faumuina i le moliaga o le Faaleagaina o meatotino, i lona tulaga e tolu (DV), o se vaega ‘B’ i solitulafono mama, e mafai ona nofosala ai i le o’o atu i le ono masina, po o se sala tupe e $500; po o faasalaga uma e lua.

E $500 se vaegatupe na fa’atulagaina e mafai ona tatalaina ai le ua molia, e faatalitali lona faamasinoga.

O lo’o ta’ua i fa’amaumauga a le malo le agai atu o leoleo i Kokoland i le nofoaga na tupu ai le faalavelave, ma va’aia ai se alii o saofai mai i le faitoto’a, ma inu sana apa pia.

Sa faapea ona fa’atalanoaina e se tasi o leoleo ia le ua molia lea na saofa’i i luma o le faitoto’a, ae agai atu leisi sui malu e fa’atalanoaina le tina loto mafatia i lona fefe i uiga fa’aalia a lona alo.

Na faamatala e le tina, na amata le inuga pia a lana tama i le aso ua te’a atu, ma fa’aauau ai lava i le aso na tupu ai le faalavelave.

Sa ta’ua foi e le tina le fa’ate’ia o ia ma amata ona popole, ina ua ia lagonaina le ‘e’e leotele a lana tama i totonu o le latou fale ma ia faaleagaina le ogaumu faapea ma se vaega o le umukuka.

Na faamatala foi e le tina, o lona alo (lea ua molia) sa fa’ato’a tatala mai i le falepuipui i le masina o Mati, o le tausaga nei, ma o lo’o nofo va’ava’aia.  

E ui i lea, sa talosagaina e le tina ia le toe lokaina o le ua molia, aua e pei ona sa faamatalaina e le tina, o le a fa’ateteleina lana amio pe a manava mai lana tama teine mai i le galuega.  Ma sa faapopoleina foi le tina i le tele o nisi o mea totino o le fale o le a faaleagaina e le ua molia, ae e na te le gafatia ona taofia le ua molia.

Na lokaina loa e leoleo ia Faumuina ma aveina atu o ia i le Ofisa a Leoleo mo le fa’aauauina o a latou suesuega.

A’o agai atu leoleo ma Faumuina i le ofisa a leoleo, sa faamatalaina ifo e Faumuina i leoleo, ua atoa le 12 o ana apa pia ua mae’a ona taumafaina, ma o lo’o nofo va’ava’aia o ia, ma sa tatalaina mai o ia mai i le falepuipui, ia Me.

Ina ua o latou taunu’u i le ofisa a leoleo, sa fa’amautuina e leoleo ia le mumu o mata o le ua molia ma le malosi o le manogi pia.