E na o le to’a 7 tagatanu’u na taofia e Leoleo i le fa’aiuga o le vaiaso na te’a nei e aofia ai ma le aso malolo na soso’o ma le aso o le Lotu a Tamaiti, e mafua mai ona o tu’uaiga e aofia ai le tagofia o le ava malosi fa’apea ai ma le fa’atupu vevesi i nofoaga faitele.

E pei ona taua i fa’amaumauga a le fa’amasinoga, o ni isi o i latou nei na taofia e Leoleo i le po o le aso Faraile o le vaiaso na te’a nei, Oketopa 07, 2016, ma fa’asolo mai ai lava seia o o mai i le vaveao o le aso ananafi, Oketopa 11, a o lumana’i ai le tutula’i uma o i latou nei i luma o le fa’amasinoga i le taeao lava ananafi.

O le to’a 5 o i latou na taofia e Leoleo o lo o tu’uaia i le moliaga mama o le fa’atupu vevesi i nofoaga faitele, ae o le isi to’alua o lo o tu’uaia i le moliaga o le fa’atupu vevesi i nofoaga faitele fa’apea ai ma le fa’ao’olima i le tulaga tolu.

O ali’i e to’alua o lo o tu’uaia i le fa’ao’olima i le tulaga tolu ma le fa’atupu vevesi i nofoaga faitele, na mafua mai ina ua fasi e le isi ali’i lona to’alua i le fa’aiuga o le vaiaso, ae o le isi ali’i o se ali’i fagota i se tasi o va’a fagota, lea na taofia ina ua ia fa’ao’olima i le isi fo’i ali’i la te faigaluega fa’atasi i luga o le va’a fagota.

O le mataupu fa’asaga i le ali’i mai se tasi o va’a fagota na alia’e mai i le po o le aso To’ona’i na te’a nei i Satala, ina ua logo e se molimau le Ofisa o Leoleo mo se fesoasoani, ina ua molimauina ni ali’i mai se va’a fagota o lo o pisapisao ma fufusu i luma o le fale kalapu o  le Karaoke Bars i Satala.

Na aga’i atu Leoleo ma latou maua atu ai le molimau, lea sa ia fa’asino i Leoleo le tulimanu o le fale o lo o tu mai ai le ali’i fagota o lo o masalomia na manu’a ina ua fa’ao’olima i ai le isi ali’i fagota, ma ina ua fesiligia e Leoleo le ali’i na manu’a fa’apea ai ma isi ali’i fagogota sa latou i ai i le taimi lea, na manino ai, o le isi ali’i fagota e igoa ia Van Tulim, lea ua molia nei, o ia lea na ia tu’iina foliga o le ali’i na manu’a, e mafua mai i se laua lava feeseeseaiga i le taimi o le latou inuga pia sa faia.

Na teena e le ali’i o Tulim moliaga mama e lua ua tuuaia ai o ia e le malo, ma ua tatalaina nei o ia i tua e fa’atali ai le isi ana iloiloga lea ua fa’atulaga e faia i le isi lua vaiaso, i lalo o poloaiga e ao ona ia usita’i i ai.

O ni isi o ia poloaiga e aofia ai le fa’asa ona ia toe fa’atupuina se vevesi i le va o ia ma le isi ali’i sa la vevesi, fa’asa fo’i ona ia toe soli se tulafono pe toe tagofia fo’i le ‘ava malosi, a ia avea o ia ma tagatanu’u lelei e tausisi i tulafono uma a le malo.

O le ali’i lea o lo o tu’uaia i lona fa’ao’olima i lona to’alua, ua tatalaina nei o ia i tua e fa’atali ai le aso lea ua fa’atulaga e toe valaau ai lana mataupu.

O se taugaupu lava i le va o le ulugali’i i le afiafi o le aso Faraile na te’a nei, na i’u ina fai fai tetele i luga ma logo ai loa e aiga tuaoi le Ofisa o Leoleo i Tafuna, ina ua alaga leotele le fafine i lona fia maua o se fesoasoani, ina ua fasi e lona to’alua.

Na taua e le fafine i leoleo le ta tu’i e lona to’alua o ona foliga, futi lona ulu toe una’i o ia i lalo, a o ia taumafai e fafaga lana fanau i luga o le laulau ‘ai.

O le to’atele o i latou na taofia i le fa’aiuga o le vaiaso, ua toe tatalaina uma i latou i tua e fa’atali ai taimi ma aso ia ua fa’atulaga e toe valaau ai a latou mataupu i luma o le fa’amasinoga.

O tuutuuga masani lava a le fa’amasinoga mo soo se tasi e molia i moliaga mama e aofia ai le fa’atupu vevesi i nofoaga faitele ma le fa’ao’olima, o le fa’asa lea ona ia toe tagofia le ‘ava malosi, fa’asa ona soli se tulafono, a ia avea i latou ma tagatanu’u lelei e tausisi ma usita’i i tuafono uma a le malo.