Ads by Google Ads by Google

To’atele atunu’u ua latou mana’omia tautua foma’i manu mai fafo


Le tama’ita’i foma’i manu ia Dr. Sierra Schneider i le taimi na fa’atinoina ai ona tiute i le faia lea o togafitiga i se tasi o meaola sa tuuina atu mo togafitiga i le latou polokalame i le aso ananafi i le malae i Fagatogo. [ata AF]
ausage@samoanews.com

E to’atele le mamalu o le atunu’u na molimauina le lolofi atu i le malae i Fagatogo i aso e 2 ua tuana’i atu, mo le fa’aaogaina lea o le tautua a se vaega o Foma’i manu fa’apitoa mai Amerika, lea o lo o galulue i se Fa’alapotopotoga e le galulue mo ni tupe fa’asili e taua o le “Animal Balance”, mo le faia o togafitiga i a latou meaola e pei o Pusi, ina ia fesoasoani ai i le fa’aitiitia lea o le faitau aofa’i o nei ituaiga meaola i le atunu’u ma le lalolagi.

 

O le aso lea ua fa’amoemoe e fa’amuta ai lea tautua i totonu o le taulaga i Fagatogo, ona se’e atu loa lea i le afioaga i Leone i le aso Faraile, sosoo ai ma le afioga i Vatia i le aso To’ona’i, mae toe fa’ai’u atu ai loa i le fale taalo a le aoga o le SPA i Tafuna i le aso Sa, a o le i toe malaga ese atu ai le au malaga mo Amerika i le po o le aso Gafua o le vaiaso fou.

 

I se fa’atalatalanoaga a le Samoa News ma le sui so’oupu o le Fa’alapotopotoga o le Animal Balanace ia Elsa Konbus, sa ia taua ai le lelei o le latou sootaga atoa ai ma le avanoa ua mafai ai ona latou galulue fa’atasi ma le Fa’alapotopotoga o le Alofa mo Meaola i Amerika Samoa nei, ina ia fesoasoani i le fa’aitiitia o le faitau aofa’i o meaola o le ituaiga o Pusi i le atunu’u.

 

“E silia i le 15 atunu’u eseese o le lalolagi ua mafai ona o o atu i ai la matou tautua e aofia ai ma Amerika Samoa, ona o se fesoasoani mai se tasi o alagatupe mai le feterale, lea o lo o mafai ai ona matou fa’atinoina tautua eseese nei mo soo se tasi e aunoa ma se totogi. O la matou tautua, o le faia lea o togafitiga ma taotoga i Pusi ina ia mautinoa e ola maloloina i latou, toe fesoasoani ai i le fa’aitiitia o le faitau aofa’i o nei ituaiga meaola i Amerika Samoa ma le lalolagi atoa”, o le saunoaga lea a Konbus.

 

Sa maitauina le to’atele o le mamalu o le atunu’u na aga’i atu ma a latou meaola i le nofoaga sa fa’atinoina ai lenei polokalame taua, mo le fa’aaogaina o tautua o lo o maua fua ai mo a latou meaola.

 

Na taua atili e Konbus e fa’apea, e fa’apitoa la latou tautua i meaola o le Pusi, ae o le vaega a le Ofisa o Fa’atoaga lea fo’i o lo o latou galulue fa’atasi i le taimi nei, o i latou ia o lo o ofoina atu la latou tautua mo isi meaola e aofia ai Ta’ifau.

 

“E silia i le 30 Pusi sa mafai ona matou pu’eina mai i nofoaga eseese, ma o ni isi o ia meaola ua mae’a ona faia i ai taotoga ma le fa’amoemoe e tatau ona o o atu i le fa’aiuga o le  polokalame i Fagatogo ua mae’a ona fa’atinoina uma taotoga o lo o mana’omia”, o le saunoaga lea a Konbus.

 

Na taua e le Tina o Asenati Tavita o Fagatogo e fa’apea, o le taua o le tautua a foma’i manu mai Amerika, ua maua ai e le to’atele o le atunu’u o lo o fiafia e tausi ma fa’a failele meaola le avanoa e fa’atino ai togafitiga mo meaola e aunoa ma se totogi.