O lenei le vaitau, o le alofa atu, ia foa'i atu, ma ua talafeagai ona fa'afetaia ai galuega alofa ua faia e nisi mo oe i le tausaga atoa, po'o se taimi lava e tasi, i lenei vaitau.

O le aso To'ona'i nei o le a fa'atino ai le foa'i a le "ALOFA FOA'I FUA " mo aiga ua mae'a fa'atualga e i latou e ao ina faia i ai nei foa'i, aua ua latou fa'amaonia, o lo'o i ai aiga, e mana'omia le fesoasoani i lenei vaitau o lo'o laiti le fanau, e to'atasi fo'i se sui o le aiga o lo'o faigaluega mo le tausiga atoa o i latou uma, fa'atasi ai ma le totogia o pili o tautua lautele mo le suavai taumafa fa'apea le eletise.

Ua i ai foi sui fa'apitoa ua fa'amoemoe i ai le Alofa foa'i Fua ina ia avea ma latou tagata tausaili e faamautuina maia le mana'omia i aiga eseese, o i latou nei e fesoasoani muamua i ai i latou a'o le'i tatalaina lenei le avanoa i le mamalu lautele o le atunu'u o lo'o fia maimoa ma filifili ni mea o latou mana'omia i o latou aiga.

Ua fa'atulaga o lea foa'i e afua mai le itula e 8:00 i le taeao se'ia pa'ia le itula e 2:00 i le afiafi o le aso To'ona'i.

O se fa'amatalaga e tusa o le "Alofa Foa'i Fua" sa amatalia mai e le tama'ita'i talavou o Aioletuna Sunia, i le tausaga e 2015. Ua atoa nei le tolu tausaga o aoga lenei sosaiete, i le tele o aiga.

"O se manatu na o'o mai i lo'u sui fa'atauva'a, aua e va'aia lava le anoanoa'i o lavalava e le'i taitai ona mae'a le aoga, ae ua fa'ale manatu i ai le aiga ma ua fa'aaoga e tia'i ma susunu, ae o nei lavalava o lo'o fou lava. Pau o le mea na oso a'e, fa'amama lelei ma fa'amanogi, gaugau ma fatufatu ma fa'apusa lelei, ae saili aiga e aoga i ai i le fanau iti ma fa'asolo ane i fanau talavou e fa'aaoga tatau i ai. E le toe tigaina fo'i nai matua e fa'atau nisi la'ei mo le tupulaga talavou lea e fetaui i ai nei lavalava."

O le amataga lena ona oso a'e se manatu ina ia fa'atuina se sosaiete fa'apea, e aoga mo tupulaga talavou e fa'aaoga tatau i ai lo matou taimi e faia ai le galuega lea o le fa'amama, fatufatu ma fa'avasega lelei, ona fa'atigipusa lea ma fa'ailoga lelei aua nisi o aiga e matauina, e mana'omia le fesoasoani tau lavalava.

Ina ua fa'alogo i ai le Kalapu a le Liona a Pago Pago, sa fa'afiafiaina i latou e avea ma matou pa'aga. Soso'o ane ai, ua logotala i ai le Pacific Global Citizens, na amatalia fo'i e le susuga Patrick Reid.

"Ua so'o le fau ma le fau, ua logoa le tala, ma ua galulue fa'atasi talavou i ala e mafai ona fa'aaoga ai taimi avanoa o le tupulaga, ina ia galulue i se 'auga e sili ona aoga i nisi o aiga o lo'o i ai le mana'omia i le fatuaiga tausi. Lea ua so'otau'au ai nei le Alofa Foa'i Fua, le Kalapu a le Liona ma le Pacific Global Citizens ina ia fa'aauau galuega lelei mo nisi,” o se fa'amatalaga lea a Aioletuna Sunia, e galue i le Matagaluega o Fefa'ataua'iga a le malo.

I le tausaga na amatalia ai e tusa ma le 75 aiga na fesoasoani i ai le "Alofa Foa'i Fua" peita'i i le tausaga nei, ua fa'ateleina, ma ua mafai ona tali atu i latou aua ua lava fo'i le oloa ua la'u ane i o latou nofoaga e fa'amautu i ai, Le Ofisa o le Liona i Paka Liona, ma ua mae'a tapena fa'alelei ai mo le taua'aoina atu.

O mea'ai ma mea e tapena ai tausami, ua fa'aagaaga lea e le Alofa Foa'i Fua ina ia taua'aoina atu i le nofoaga o lo'o tausia fa'apitoa ai fanau ua a'afia i soligatulafono a'o le'i mae'a le pule a matua ia i latou, fa'apea fo'i ma le nofoaga fa'apitoa o lo'o tausia ai tina ma fanau ua a'afia i sauaga i totonu o latou lotoifale.

O ai e fa'atinoa uma nei galuega mo le Alofa Foa'i Fua? O le vasega o i latou o lo'o ofo mai lo latou taimi e fa'aalu e fa'atino ai nei galuega alofa. Ua mafai fo'i ona e vala'au Aioletuna ma fa'amau lou suafa mo sau tautua fa'apena fa'atasi ai ma le Alofa Foa'i Fua, po'o le Pacific Global Citizens.

Ona o lo'o talia lava fo'i foa'i o so'o se ituaiga e fia faia mai, mo le fa'amoemoe e fa'aauala atu ai i aiga uma o lo'o ua i ai le mana'omia i latou fatuaiga tausi, e sailia fo'i le tama'ita'i o Aioletuna po'o le susuga Patrick Reid e fia fa'ataunu'u ane lea foa'i, po'o le ave sa'o lava fo'i i le Ofisa o le Kalapu a le Liona i le Paka Liona i Tafuna.

O le Pacific Global Citizens, o se fa'atasiga lea a le fanau tupulaga talavou, ua latou loto ina ia faia galuega lelei, ma suia o latou olaga i le fa'atinoga lea o se tautua e leai se taui po'o se totogi. O le avea ai ma se sitiseni tausia tulafono a le tatou atunu'u ae maise o tulafono a le Atua, o se talavou amio lelei lea.

"E leai se isi galuega ua sili ona fia fa'atautaia e i latou nei, nai le galuega ua i o matou lima e ao ina fa'ataunu'u mo aiga o lo'o i ai le mana'omia i o latou lotoifale. Ua fa'afetaia fa'atasi e i matou uma le avanoa ua matou maua mo ni galuega lelei e fa'atino ai. O lo'o ola fiafia le fanau talavou i le Pacific Global Citizens e fa'atino uma galuega tapenapena mo le foa'i lea e fa'atino nei i le aso To'ona'i o lenei vaiaso,” o Aioletuna lea.

O nisi o ala ua fesoasoani ai le PGC i fanau talavou ua avea ma latou totino, o ala ia tau le aoaoga, ua taumafai i latou ina ia fesoasoani i mea'aoga ae maise o tima'iga i le fanau talavou, ia fa'aaoga tatau o latou taimi avanoa e faia ai latou mea'aoga, fa'atino poloketi e maua ai le atamai, fesoasoani i le aiga i galuega fa'atino i le lotoifale, ae maise ave sou lua i le tolu itula e te faia ai galuega lelei mo nisi.

"O la'u va'aiga i le lumana'i,  o le ‘Alofa Foa’i Fua, e le tu'ua lenei galuega, e faifai pea aua e le o misia lava se tausaga ma le fa'aopoopo o le lisi o aiga o lo'o mana'omia foa'i nei, o lona uiga, e le o mae'a le auaunaga, e fa'aauau lava! O lea fo'i ua avea a'u ma se Liona, e galue lava fo'i lenei Liona ia gauai mai nisi e foa'i,” o se tala lea a Aioletuna.