Ads by Google Ads by Google

Amata aloaia iloiloga Fono mo le fa’amaoniaina o tofiga Kovana


Afioga i Faipule o le maota o sui i le toe amata aloaia ai o galuega masani a le maota i le taeao ananafi, i le mae’a ai lea o le malologa e 2 vaiaso sa alo atu i ai le Fono Faitulafono. Le afioga i le sui fofoga fetalai ia Fetu Fetui Jr ma Gafatasi Afalava o loo tula’i. [ata AF]

Se tasi o faipule fou a le maota o sui, afioga Vailiuama S. Leasiolagi i le taimi na tula'i ai e fa'alauiloa le iloiloga a lana komiti i le taeao ananafi. [ata AF]
ausage@samoanews.com

O le vaiaso nei lea ua fa’atulaga e amata aloaia ai iloiloga a komiti ta’itasi a maota e lua o le Fono Faitulafono, aua le fesiligia ma le fa’amaoniaina o tofiga a le afioga i le ali’i kovana ia Lolo Matalasi Moliga, mo i latou uma ua filifilia e avea ma Fa’atonusili o Matagaluega ma Ofisa eseese a le malo mo le isi 4 tausaga o loo lumana’i nei.

 

Na fa’ailoa e le ali’i kovana i luma o lana kapeneta filifilia i le aso Faraile na te’a nei, lona fa’anaunauga o loo i ai ina ia pasia uma i latou i le taimi e iloilo ma fesiligia ai e le Fono Faitulafono.

 

Sa ia fautuaina fo’i afioga i Faatonusili tofia, ina ia sauni e tu’uina atu tali lelei ma le atoatoa i luma o senatoa ma faipule i le taimi e fesiligia ai i latou, ma fa’ailoa sa’o i ai lo latou sauni e fa’atino le galuega ua tofia i latou e le kovana e galulue ai mo le malo ma le atunu’u.

 

O le itula e 8:30 i le taeao nei le iloiloga muamua a le maota o sui, e pei ona sauni ai le Komiti o Aoga a le maota e fesiligia tofiga a le kovana o le Fa’atonusili fou a le Matagaluega o Aoga ua i ai nei, le faletua ia Dr. Ruth Matagi-Tofiga, sosoo ai le iloiloga i le itula e 11:00 a le Komiti o le Sailiga o le Tamaoaiga o le malo mo le Teutupe a le malo, lea ua toe filifilia i ai ia Ueligitone Tonumaipe’a, ae fa’ai’u i le iloiloga e faia i le itula e 1:00 i le aoauli, lea o le a fesiligia ai e le Komiti o Fa’amasinoga ma Femalagaaiga le tofa Talauega Eleasalo Ale lea ua toe filifilia e avea ma Loia Sili a le malo.

 

O le itula e 8:30 i le taeao o le aso Lulu o le vaiaso nei, ua fa’amoemoe e iloilo ai e le Komiti o Fefa’atauaiga ma Alamanuia tofiga a le Kovana mo Keniseli Lafaele, lea ua toe filifilia e avea ma Fa’atonusili o le Matagaluega o Fefa’atauaiga ma Alamanuia a le malo, sosoo ai le iloiloga a le Komiti o le Paketi e faia i le itula e 11:00, lea o le a fesiligia ai tofiga mo Catherine Saelua lea ua toe filifilia e avea ma Fa’atonusili o le Ofisa o le Paketi, ae fa’ai’u i le iloiloga a le Komiti o Pulega o Uafu ma Malaeva’alele i le itula e 1:00 i le aoauli, lea o le a iloilo ai tofiga a le kovana mo Taimalelagi Dr. Claire Poumele, lea ua toe filifilia e avea ma Fa’atonusili o Pulega o Uafu ma Malaeva’alele a le malo.

 

Mo le maota maualuga a le Senate, o le itula e 8:30 o le taeao a taeao, aso Lulu, 1 Fepuari o le a amata aloaia ai a latou iloiloga ua mae’a ona fa’atulaga, lea ua fa’amoemoe e fesiligia ai e le Komiti o le Fa’agaoioiga o le malo agava’a o le tofa a Talauega Eleasalo Ale, lea ua toe filifilia e avea ma Loia Sili a le malo.

 

O le itula e 8:30 i le taeao o le aso Tofi ua fa’amoemoe e fesiligia ai e le Komiti o le Paketi a le maota maualuga, tofiga a le ali’i kovana mo Ueligitone Tonumaipe’a, lea ua toe filifilia e avea ma Teutupe a le malo, ae o le taeao o le aso Gafua o le vaiaso fou i le itula e 8:30, o le a fesiligia ai e le Komiti o Aoga ia Dr. Ruth Matagi-Tofiga, lea ua filifilia e avea ma Fa’atonusili fou mo le Matagaluega o Aoga a le malo

 

Ua i ai fo’i le fa’amoemoe e fa’a komiti aoaoga maota e lua i le taimi o iloiloga a komiti ta’itasi, ina ia fa’a faigofie ai ona malamalama afioga i senatoa ma faipule i le tele o mataupu o loo alia’e mai i matagaluega ma ofisa ta’itasi a le malo.