Ads by Google Ads by Google

Amata aloaia le aoga fa’a Leoleo lona 25 mo le umi 6 masina


Ni isi o tama’ita’i o lo o auai i le aoga fa’aleoleo lona 25 lea na tatalaina i le ofisa tutotonu o Fitafita tuai i Tafuna i le taeao ananafi. [ata AF]

Le taimi na amata aloaia le aoga fa’aleoleo lona 25 i le taeao ananafi i le nofoaga autu o le ofisa o Fitafita tuai i Tafuna. [l-r] Sui Komesina o Leoleo, afioga Falana’ipupu Comdr. Ta’ase Lavata’i, afioga Kovana le tumau ia Lemanu Peleti Mauga, Ta’ita’i o le Sauniga, ma le isi sui komesina o Leoleo ia Vaimaga Maiava. [ata AF]

Ni isi o sui o le aoga fa’aleoleo lona 25 lea na tatalaina i le aso ananafi i le ofisa autu o Fitafita tuai i Tafuna. [ata AF]
ausage@samoanews.com

E 6 masina le umi o le Aoga Fa’aleoleo a le Matagaluga o le Puipuiga o le Saogalemu Lautele lea na tatala aloaia i le taeao ananafi, mo le a’otauina lea o ali’i ma tama’ita’i e to’a 40 ua ausia togi e avea ai i latou ma Leoleo fou mo le malo i le lumana’i.

 

O lo o auai i lenei aoga sui mai isi Ofisa o le malo e pei o sui mai le Ofisa o Tiute, sui mai le Matagaluega o le Puipuiga o le Saogalemu Fa’alotoifale, o se ali’i Masela se to’atasi mai le Fa’amasinoga Maualuga a Amerika Samoa. atoa ai ma sui e to’atolu mai le Marine Patrol, o se tasi lea o lala o le Ofisa o Leoleo a le malo.

 

O le afioga i le Kovana le tumau ia Lemanu Palepoi Peleti Mauga na fai ma sui o le malo i le tatala aloaiaina o lenei aoga fa’apitoa, lea o loo fa’agasolo i le nofoaga autu o le Ofisa o Fitafita tuai i Tafuna, lea na amata aloaia i le asia lea o le tula’i fa’aaloalo a sui o le vasega e le afioga a Lemanu.

 

Na fa’amamafa e le ta’ita’i o le sauniga le taua o le fa’aaoga tatau o taleni ma meaalofa na aumaia e le Atua, e fesoasoani ai i le fa’alauteleina o le tomai ma le silafia e fa’atino ai tautua ma auaunaga i le atunu’u.

 

O le saunoaga autu o le aso na saunoa i ai le afioga a Lemanu, lea na ia fa’aaluina ai se taimi umi e apoapoa’i ma fautua ai ia i latou ua auai i lenei vasega, ina ia fa’aaoga tatau le taimi ma le avanoa ua tu’uina atu e avea ai i latou ma malu o le malo, ma ia manatua, o le latou galuega o le tausia lea o le filemu o tagata uma ae le o le fa’atupu o le vevesi.

 

“O la outou galuega o le puipuia lea o le soifua ma le ola o le atunu’u, tusa lava poo le a le galuega e tofia oe e te galuea ai pe afai ae mae’a ona fa’auuina oe, poo le ave ta’avale, ave uila afi, galue i le Vaega o Leoleo o loo puipuia le saogalemu i luga o le alatele, pe galue fo’i i le Ofisa, aua ne’i galo ia te oe, o oe o le Leoleo, soo se galuega e te fa’atinoina e atagia mai ai lou tulaga fa’aleoleo”, o se vaega lea o le saunoaga a Lemanu.

 

“E foliga e faigofie le galuega fa’aleoleo ae lamatia ai lo outou soifua. O outou o malu o le malo, e malu ai le atunu’u ia te outou. O oe e te fa’aolaina tagata uma, e tua i ai le tagata mafatia, e sulufa’i i ai le tagata ua ia fia maua se fesoasoani, o le tiute ua to’atele i latou ua leva ona galulue mai ai i le galuega ua masani ai”.

 

“A fa’atino la outou galuega, aua le fa’ailoga tagata, tusa lava poo a ituaiga tagata tou te tau atu i ai i le taimi e fa’atino ai le galuega, poo se Saina, Kolea, Filipaina, Fiti ma isi uma lava ituaiga tagata o loo nonofo i totonu o Amerika Samoa, o la outou galuega o le puipui o le latou saogalemu”.

 

“Aua le fa’auuina loa oe ua avea ma Leoleo ona e taumafai loa lea e fa’aali lou malosi. Tusa lava poo oe e te matua malosi lava, e mafai fo’i ona e siia u’amea si’isi’i uma lava, o la outou galuega o le tausi o le filemu i le atunu’u, ia lava lo outou onosa’i ma ia fa’amoemoe i le Atua le fa’atinoina o le galuega, aua e le o se galuega e faigofie”.

 

“Afai e valaau mai le atunu’u mo se fesoasoani, ae e oo atu i le nofoaga o loo tula’i mai ai le vevesi o lou aiga o loo tula’i mai ai le fa’afitauli, poo lou uso, tuafafine poo ai lava ni isi o lou aiga, aua e te fa’aitu’au, aua e te manatu fa’apitoa, a ia fa’atino le galuega ma le fa’amaoni, le galuega na e tauto e fa’atino ma lou loto atoa”.

 

“O lou malosi fa’aleoleo pe afai ae fa’apaleina oe ua mae’a ona fa’atulaga mai e le tulafono, e le gata i totonu o le Ofisa o Leoleo lou malosi, ae mafai ona oo i fafo atu o le Ofisa, fafo atu o lou aiga, ma fafo atu o Amerika Samoa”.

 

I le tulaga o le soifua maloloina, na fa’atula’i e le afioga a Lemanu se lu’i i sui o le vasega fa’aleoleo ina ia toaga e fa’amalosi tino ina ia fa’a faigofie ai ona fa’atino le galuega.

 

“E mana’omia lou fa’amalosi tino i taimi uma ina ia maua ai le malosi e fa’atino ai le galuega, aua afai e sola le pagota, ia lava lou malosi e tuliloa ai, ae afai e sola le pagota poo se tamaititi laititi ae leai se malosi o ia te oe, pau le la’asaga e te faia o lou oso i totonu o le ta’avale leoleo e tuli ai le pagota ua sola, ae a oso loa le pagota i le va o fale o aiga, ona le mafai loa lea o lau ta’avale ona alu i ai”.

 

O se tasi o vaega taua na lu’itau ai e Lemanu ali’i ma tama’ita’i o le vasega fa’aleoleo, o le faia lea o le galuega ma le amiotonu, usita’i i le tulafono ma aua le fa’ailoga tagata.

 

“Aua e te taliaina ni taui e fa’aalatua atu ia te oe e se tagata, pe e te manatu fo’i e fa’amuamua au uo, aua o le taimi lava e te talia ai taui e ui fa’aalatua atu, e le mafai ona e toe fa’amaoni i le fa’amalosia o le tulafono, ae o le a e taliaina loa taui nei ona o lou mana’o i ai, tusa lava pe e te mativa, e ola aitalafu tupe, o la’u fautuaga, aua e te taliaina tupe mai tagata”.

 

I le fa’aiuga o lana saunoaga, na ia fa’amalosia ai sui o le vasega ina ia fa’amuamua le alofa, ava fatafata ma le fa’aaloalo i le atunu’u.

 

Na taua e le Komesina o Leoleo, tofa Lei Sonny Thompson i luma o le Fono Faitulafono i le lua vaiaso talu ai e fa’apea, o le aoga fa’aleoleo fou lenei ua fuafuaina mo lenei tausaga, o le a mafai ai ona foia se tasi o fa’afitauli o loo tula’i mai i le matagaluega, o le le lava lea o ali’i ma tama’ita’i leoleo e fa’atinoina le galuega.