Ads by Google Ads by Google

Ata Fa’asolo “Washington Heights” fa’atino Kolisi Tu’ufa’atasi


O se va’aiga i le tasi o pisinisi na fa’atatautaia i le a’ai o Niu Ioka i le vaia’ai na fa’atino aga’i i ai le ata fa’asolo sa fa’atino e le fanau a’pga ASCC. O le vaega lea o le ata, sa talatalafulu uma ai mea e tutu i le vaia’ai, o le faleteuulu o tina. [ata: Leua Aiono Frost]

O se vaaiga i le ‘au siva a le Kolisi, le vasega o lo’o tau’avea mataupu fa’asamoa i tu ma agaifanua a le tatou atunu’u. Matagofie a latou siva mauluulu na fa’atino, ae tatala mea uma i le ili le foafoa. [ata: Leua Aiono Frost]

Ua iloga le matagofie o le fa’atinoga, ae maise o le taleni o le toe fa’atinoina o tala tusia mai le vaitausaga 1990, na tusia e Quiara Alegria Hudes mai Dominican Republic, mo se fa’atinoga i Broadway i Niu Ioka.

 

O pese na fa’atino ai le ata sa  tusia e Lin-Manuel Miranda ina ia fa’ailo ai le autu ma le agaga tonu o lea fa’atinoga. O le ata fa’asolo sa faatino e fanau aoga i le Fine Arts Department a le Kolisi Tu’ufaatasi ma sa faia i afiafi o le aso Lua ma le aso Lulu.

 

O le nuu o tagata o lo’o aofia i le ata o Dominican Republic, e aofia ai le Bahamas, ma o lo’o to’atele fo’i o latou aiga e naunau ina ia gasolo a latou fanau e saili manuia i Amerika.

 

“O le fa’atinoga, e tele se taimi e ao ina a’oina ai pese, fati ma upu fo’i ina ia le sasi, ae maise o le fa’atinoga o tagata e talafeagai ma le agaga o le tala tusia ua fa’aata fa’asolo nei,” o se tala lea a le sui fa’amaumau a le Kolisi Tu’ufa’atasi, Jim Kneubuhl.

 

O le tala lenei, sa tusia e Miranda a’o fa’ato’a lua tausaga o taumafai i ana a’oa’oga i le Iunivesite i Niu Ioka, ma e tele na’ua lu’iga sa feagai ai ma ia, ina ia mafai ona ia tau’avea ana a’oa’oga fa’atasi ma galuega e lua sa ia faigaluega ai ina ia mafai ona totogia lona pili a’oga.

 

Peita’i, sa le toe mafaia e tusa ai ma le tala, ona fa’atonuina lea o ia e toe fo’i i lona nu’u, o se mea e fa masina o taumafai o ia e tausaili se ala e mafai ai ona ia fa’ailoa atu i nai ona matua o lo’o taumafai ona fa’aauau pea le pisinisi ta’avale la’u pasese ina ia totogia ai le a’oga a Miranda.

 

Na matua maua lava le a’ano o le tala i le fa’atinoga! Ua masani fo’i le fanau a Samoa i nei ituaiga lu’iga, aua e ola ai fo’i i tatou ma a tatou fanau i le naunauta’iga lea, ia i’u lelei a’oga a le fanau, a’o i tatou Matua, sa le gafatia ona maua avanoa lelei fa’apena a’o tatou a’o’oga mai.

 

Matagofie le fa’atinoga a le Ulugali’i e ona le alo sa alu i le a’oga, ae ua le mafai nei ona ua le lava le tupe e totogi ai le aoga.

 

O le matua oso lava o le fe’afe’a o le lo’omatua, ina ua va’aia ua si’isi’i le leo o le tama o le aiga. Matagofie lea vaaiga, aua ua iloga mai, e le o faigofie le tapua’iga, sa fa’anaunau i le manuia e maua mai pe a i’u le a’oga a le teine na saili manuia i le Kolisi.Ua toe tepa le tama i le ala sa saili ai e lona tama le tupe, ina ia mafai ona tu’ua e ia lo latou aiga i Dominican Republic mo Amerika, ma lana fo’i tautoga e le toe fo’i atu se’iloga ua matua mautu ma manuia ana taumafaiga.

 

Na tu fo’i le tina i ona uiga masani, fa’alogo uma i ai le aiga mo se fautuaga i se mea e fai ma vaifofo mo le mataupu lenei ua alia’i mai. Na faigata le fa’ai’uga a le tama, ae avatu fo’i na matua le fiafia i ai le tina o le aiga, ae maise le alo o le a masii e a’oga.

 

“Tapunia le pisinisi e fa’atau atu, ae totogia ai le a’oga a lona afafine.”

 

Na fa’auilavea fo’i le alofa i le ala o le tama’ita’i, ona ua toe alofa lava i se tasi sa latou tutupu fa’atasi ane i le latou vaia’ai, peita’i, sa loto i la’ua uma e fa’amuamua le alofa i aiga, ma ia sailia muamua le tusi pasi mo ni agava’a e maua ai galuega lelei aua o le lumana’i o ia, ma lona aiga, ae maise o le aiga potopoto.

 

O le isi itu o le ata, o le tausoga o le tama o le tama’ita’i na alu i le Kolisi, i ai si ona alo e to’atasi, peita’i e fa’atautaia le la’ua faleoloa mo Taumafa Paleni, e maua ai fo’i le ipu kofe o le taeao. E to’atasi lava fo’i si ana tama, ae na fa’atau lana pepa i le se’i, o le fa’ai’uga lava o le ata, sa malo ai lana pepa i le fa’ailoga sili na maualuga, ma sa manatu i la’ua e o ese mai Niu Ioka pe a maua se la’ua manuia mai lea lulu.

 

E ui ina sa i ai le faleseleulu o le isi tama’ita’i i le latou a’ai, ae na tapunia ona ua leai ni tupe e totogia ai le lisi. O i latou uma nei sa ola fesoota’i mai uma i le latou vaia’ai. Ina ua maliu fa’afuase’i lea tina matua, ae tu’ua na’o si ana tama ma le fa’ailoga tupe o le lulu. Na tu’u e masii ese lea taule’ale’a mai le latou vaia’ai, ae oo lava i lona toe taimi, na toe liua le vaiosina i lona loto ma toe nofo ma fesoasoani i lona vaia’ai e toe fa’amatagofie ma fa’aolaola pisinisi na tautuaina mai i latou i le autova’a atu o matua, ma laiti fo’i o latou olaga.

 

O lea se ‘auga o le tala sa fa’atino, ae o le fa’atinoga lava latou, ua agava’a tatou fanau mo taleni o le avea ma tagata e autu i ai ata tifaga.  Na matua tumu le po lona lua o le fa’aaliga o lea lava ata fa’asolo na fa’atino e le fanau, ma ua fa’alauiloa mai fo’i o latou faia’oga i vaega ta’itasi sa fesoasoani ma fa’atonutonu i fa’atinoga uma, atoa ai ma musika sa fa’aaoga mo le fa’atinoga.

 

O le fa’atonu o le ata o Kuki M. Tuiasosopo ma lona Sui Fa’atonu o Dr Sybil Johnson. O le fausia o le nofoaga mo le pueina o le ata fa’asolo ma sa fa’atino ai uma e le fanau vaega o le latou fa’atinoga “Heights” sa fausia ma vali atoa e le vasega a le Fine Arts ma fa’atonu e le tama’ita’i faia’oga o le Arts i le Kolisi, Regina Meredith Fitiao. O pese uma sa fesoasoani e usuina mai lea e le aufaipese a le Kolisi i le ta’ita’iga a Loretta Leagatonu Pua’auli ma le So’oupu o lenei poloketi po’o le fa’atinoga atoa, o le susuga Peo Magro Faia’oga o le Musika.