Ads by Google Ads by Google

E LE O OE O SE SULI MONI

Vaega 53

 

Na pei e valea le fafine faiaoga o Lucy i le tala lea ua fa’ailoa ane e le Foma’i Meauli lea o loo togafitiina Ianeta, i le gaioiga e ao ona faia ina ia fa’asaoina ai le ola o le teineititi pologa mai le siama leaga ma le mata’utia lea ua a’afia ai lona tino. Na vaaia e auauna e to’alua foliga le mautonu o Lucy ina ua mae’a ona la talanoa ma le Foma’i, o lea na la fesili ai loa poo lelei mea uma ma le gasegase o Ianeta, ae na tali Lucy, “E i ai le fa’aletonu ua tula’i mai ia Ianeta, ua maua o ia i se gasegase tuga ma le mata’utia e faigata ona togafiti i le falema’i, ae i ai le vai o loo maua i totonu o le malo o tagata pologa lea sa nofo ai, pau lena o le fofo e mafai ona toe fa’afo’isia ai lona malosi, ae o le fesili tele lea ua tula’i mai, o ai o le a alu e saili mai lenei vai, a o ai fo’i e nofo e tausi Ianeta”. Na ona mae’a lava ona talanoa atu o Ianeta i ana auauna, ona savali atu loa lea o le fafine ua saofa’i i luga o le nofoa ma tu’u ona lima i lona ulu ma punou ai lava mo se taimi umi, ae o ali’i auauna e to’alua i le taimi lea, ua na o le tilotilo o le isi i le tasi ua le iloa se gaioiga o le a faia.

 

“Lucy”, o le talanoa atu lea a le isi auauna ma savali atu ua saofa’i o tafatafa o le fafine faiaoga, “Ua ou iloa lou mafatia i le tulaga lea ua i ai, e le gata i le tulaga ua oo i ai Meki, ae o lea fo’i ua tulaga fa’aletonu mai le gasegase o Ianeta, ae o le tonu lenei, o le a lua nonofo atu iinei i le falema’i ma lo’u uso a auauna lenei e tausi le gasegase o Ianeta, ae o le a ou alu e saili mai le vai e togafiti ai lona gasegase, afai ou te toe fo’i mai, lona uiga ua tulaga manuia Ianeta ma ua tatou maua fo’i le tala fiafia, ae afai ou te le toe fo’i mai, lona uiga ua ou oti ai lava i la’u sailiga”, o le talanoa atu lea a le isi auauna ona ia fusi mai lea ia Lucy fa’atasi ai ma le isi ona uso a auauna, ona ia faliu loa lea ma savali ese atu ma le falema’i, ae o Lucy i le taimi lea, ua pei o timuga ona loimata i le mafatia o lona loto i le savali ese atu o se tasi o ana auauna i fafo ma le falema’i, ailoga o le a toe fo’i mai. Se’i o tatou toe liliu atu lava i le tulaga lea ua oo i ai le talanoaga a Meki ma le ali’i pologa lea na sola mai. O le malama ane ai o le taeao o le aso fou na sosoo ai, na faia ai loa le tonu a le to’alua lea o le a la savalia le isi itu o le auvae maua o loo la i ai mo le sau tailiina o se auala la te oo ai i le isi itu o le malo, ma aua ai ne’i faigofie ona maua i laua e fitafita a le Tupu saua o Eteuati II lea o loo pisi solo i le vaomatua o le malo i le tau sailiina o i laua. O se solaaga umi ma le fita, ua lagona e le tamaloa o Meki le galala i le fiainu ma le fia’ai, peita’i o le ali’i pologa lenei, e pei lava o se mea fua ia te ia le solaaga o loo alu, e leai lava ma sona foliga vaivai, se’i vagana ai lona popole ina ne’i maua i laua e fitafita a le tupu.

 

“Se’i o ta mapu te isi ane lava i lalo o le laau tele lea, ua ou lagona lo’u vaivai ma ua sau fo’i le ta ta gase o lo’u tino”, o le augani atu lea a Meki i le ali’i pologa lea o loo la sosola, ma faia ai loa le tonu o le a la malolo i lalo o le laau mo sina taimi. “Ua ou lagona ua oo mai lava le vaivai i lo’u tino, ua tele aso o sau le solaaga e le o maua lava se vaiinu poo sina meaai, ae ou te fa’afetai atu ia te oe lo’u uso i lou agalelei ia te a’u, ina ua e tatala ma fa’asa’oloto ia te a’u, ae paga lea, ailoga a taunu’u lo’u fa’amoemoe i lo’u toe fia vaai atu i lo’u aiga, ona ua ou iloa ua le o toe lava so’u malosi e fa’aauau ai le ta solaaga, ae ta mapu te isi ia i lalo o lenei laau atonu e toe maua ai se isi fa’asiliga malosi mo a’u”, o le augani ane lea a Meki i le ali’i pologa, peita’i sa le’i fa’avaivai ai le ali’i pologa lenei i lona fa’amalosi atu ia Meki ina ia onosa’i lona vaivai, e le o toe umi ae o la taunu’u i le isi itu o le mauga. “E tasi lava le mafua’aga na ala ai ona ou fa’asa’oloto ia te oe, ina ia mafai ona e toe fo’i atu i lou aiga, nai lo lou nofo ai i totonu o le la nofoaga pologa ma le le maua ai o se filemu”.