Ads by Google Ads by Google

E LE O OE O SE SULI MONI

Vaega 59

 

O le vave tele o gaioiga a le tagata meauli pologa lenei, na fa’afuase’i ai ona oso i totonu o le vaitafe ma aau loa i le isi itu vai ao pisi lava manu feai nei i le saei ina o tino o tagata maliliui ia na tauai atu e le au ali’i e to’atolu ia i lalo. E pei ona masani ai tagata uli i le auala e sopoia ai le isi itu vai, o le taimi lava e i ai faatasi uma ai Kolokokaila nei i le itu e tasi pe a fafaga, o le taimi lea e mafai ai loa ona sopoia e tagata pologa le isi itu vai ma ao mai lau o le laau e fai ai le vai, ma o le gaioiga foi lena o lea ua faia e le tagata pologa lenei, na ona oso lava i totonu o le vaitafe aau telea’i loa i le isi itu vai ma taunu’u lelei ai e aunoa ma se satia o ia e se Kolokokaila. Na ona taunu’u lava o le alii pologa i le isi itu vai, faanatinati atu loa ma lana savali i le vaega tonu o loo ola mai ai le laau, ma ia ao mai ai le vai e fa’aaoga i le gasegase o le teineititi o Ianeta, ae o loo tapua’i atu ma le toto’a Meki ma lana auauna i le isi itu vai. Na ona uma lava ona ao o le vai toe faliu mai loa ma le alii pologa lenei ma tamo’e televave mai i luga o le augutu o le vai ma le fa’amoemoe o le a toe aau aga’i i le isi itu, peita’i o le itu na fa’ateia ai o ia, ona e taunu’u mai i luga o le vaitafe, sa ia molimauina ai le leai o se mea o toe gase, ua leai fo’i se Kolokokaila e toe gaoi, ua malolo uma manu feai ina ua mae’a tali la latou sua.

 

Ua tu le tagata meauli lenei ua le iloa se isi gaioiga e toe faia, auao le mea moni, o le taimi lava e oso ai i totonu o le vaitafe ma le faamoemoe e aau i le isi itu vai, o le iuga fo’i lena o lona ola, aua o lona uiga e sae lona tino e Kolokokaila feai nei. E fai o foliga le mautonu o le alii pologa lenei ae o foliga le mautonu fo’i o Meki ma lana auauna mai le isi itu vai. “Ou te iloa ua le o toe umi se taimi o totoe mo Ianeta, ou te iloa afai tatou te vave i tai i le aai o le a mafai ona fa’asaoina lona ola, ae afai e po le aso lenei tatou te lei oo i le aai, o le a siliga tali i seu loa se lavea’i mo ia”, o le augani atu lea a le auauna a Meki, lea o loo tu mai i le isi itu vai, ae na fa’ailoa atu i ai e le tagata pologa lenei, “Pau le gaioiga lea ua ou mafaufau i ai, o le a fa’atafea atu lau o le laau i le vai, ona oulua fetagofi lea e tae i luga ma lua o loa ma oulua e fai ai le vai, afai ae manuia, ona oulua toe fo’i mai lea e saili se auala e fesoasoani ai mo a’u, ina ia mafai ai ona ou toe oo atu i le itu vai lena”. O le talanoa ane lea a le tagata pologa lenei, peita’i o Meki i le taimi lea, ua matua le mautonu lava le mafaufau o le tamaloa i se gaioiga e faia, ona ua popole lona loto i le saogaleu o le teineititi pologa o Ianeta. Ao tau fai tutu ai lava le au alii lenei ma tau mafaufau i se gaioiga o le a faia, na fa’afuase’i ona fa’apea atu le auauna a Meki, “Ua lelei, ou te iloa e leai lava se isi gaioiga e mafai ona tatou faia vave i le taimi lenei, ae o loo alu pea lava le taimi mo Ianeta, o le mea lea, nai o’u uso, o le a oso atu lo’u ola e fesoasoani ai mo Ianeta, ma ia momoli atu o’u alofaaga isi teineitiiti pologa pe afai ae toe manuia mai lona gasegase”, e fai lava tala ia a le auauna ma savali atu ua puna i totonu o le vaitafe, ma e lei magoto lelei i lalo le tino o le auauna ae vaaia le pisi solo mai o le vaitafe i le manu feai i lo latou tuli oso ane ma saei lona tino ma ‘ai, ae o le taimi fo’i lea na puna ai loa i lalo ma le alii meauli pologa ma aau vave ane i le isi itu vai o le vaitafe ma lau laau o loo uu i lona lima.

 

Na ona taunu’u saogalemu ane lava o le alii pologa lenei tapena loa ma la aupega ma le tamaloa o Meki ma la toe fo’i ane loa i le vaomatua e saili ai lo la auala e aga’i ane ai i tai i le aai, peita’i o le tamaloa o Meki i le taimi lea, e alu fua lava ae ua momomo lona loto i le alofa i lana auauna, ona o le fa’aiuga ua ia faia ina ia ofo lona ola e fesoasoani ai i le taumafaiga ina ia fa’asao le ola o le teineititi pologa o Ianeta.