Ads by Google Ads by Google

E LE O OE O SE SULI MONI

Vaega 115

 

A o fa’agasolo galuega a Leoleonana i le fesiligiaina lea o le fafine o Mekala e fa’atatau i le fafine meauli ma lana fanau o lo o nonofo i lona fanua, ae fa’afuase’i loa ona tatagi le telefoni a le Ofisa. “Fa’amolemole pe maua atu lava le Ta’ita’i Leoleo”, o le talanoa ane lea a le Tamaloa i luga o le telefoni. “Faamalulu atu i lau susuga, e le o avanoa le Ta’ita’i Leoleo i le taimi nei, o lo o i ai o ia i le fa’atalatalanoaina o se tasi o mataupu taua lava i le taimi nei. Pe i ai se feau taua e fa’ailoa i ai”. O le tali ane lea a le taa’ita’i ofisa sa ia taliina le telefoni. “Fa’amolemole lava, e matua taua le mataupu o loo o’u fia maua ai le Ta’ita’i Leoleo. Fa’ailoa atu i ai, o le Pulesili lenei o le Falema’i tele a le malo, e i ai se mataupu taua e tatau ona silafia e la outou ofisa ma faia vave loa i ai se suesuega”. Na ona taia lava o le fa’alogo a le tama’ita’i ofisa i le fa’amatalaga lea a le tagata o loo la talanoa i luga o le telefoni, fa’apea atu loa ma lana tali i ai, “Onosa’i mai lava se’i vaai poo avanoa le Ta’ita’i Leoleo”.

 

E ui i le pisi o le tamaloa o Meki i le fa’atalatalanoaina o le mataupu e uiga ia Mekala, ae sa ia manatu lava e fa’avanoa sona taimi e tali ai lana laina, ma o se itu na fa’ateia ai Meki ina ua tago e sii atu i luga le telefoni ma fa’ailoa atu i ai i le tagata o loo valaau atu, o ia o le Ta’ita’i Leoleonana a le malo, ae fa’apea mai le tagata i luga o le telefoni, “O a’u o le Ta’ita’i Foma’i i le falema’i tele a le malo e i ai se mataupu taua e manaomia ai la outou fesoasoani, ona o se fafine meauli ma lana fahau o loo nonofo i se tasi o aiga i le ogatotonu o le taulaga, o lo o masalomia le i ai o ni gaioiga faasolitulafono o lo o alia’e mai ai i lea aiga ..” Sa na o le fa’alologo o le tamaloa o Meki ao fa’amatala ane e le Ta’ita’i Foma’i ia te ia tulaga uma e fa’atatau i le mataupu e uiga i le fafine meauli ma lana fanau. Na ona mae’a lava o le talanoa ane a le Ta’ita’i Foma’i, fa’apea atu loa ma le tamaloa o Meki, “Lau susuga a le Ta’ita’i Foma’i, o lo o matou fa’atalatalanoaina i le taimi nei le fafine e ana le fanua ma le aiga o lo o nonofo ai le fafine meauli ma lona aiga o lo o talanoa mai ai, ae ua lelei, o le a auina atu ni isi o la’u vaega e fesiligia ma fa’atalatalanoa i latou iina i le falema’i”. Na ona mae’a lava o le telefoni, savali atu loa ma Meki i le isi ofisa o lo o i ai isi sui o lana vaega, ma faia loa le fa’atonuga i isi Leoleonana e to’alua, ina ia aga’i vave loa i le falema’i e fesiligia le mataupu e pei ona la talanoa ai ma le Ta’ita’i Foma’i.

 

Na ona mae’a lava ona faia o le fa’atonuga a le tamaloa o Meki, savali atu loa ma tatala le faitoto’a o le potu o lo o faia ai le talanoaga a lana vaega ma le fafine o Mekala ma toe saofa’i i lona nofoa ma fa’aauau lana fa’alogologo i le talanoaga o lo o faia. Na vaaia e Meki le fesuisuia’i o fa’amatalaga a Mekala i mea eseese sa tutupu i lona aiga ma lona fanua, aemaise lava i mataupu e fa’atatau i tagata uli sa fai ma pologa i lona aiga. “O ai le aiga lea o lo o outou mafuta i le taimi nei i totonu o lou aiga”, o le fesili fiamalamalama atu lea a Meki i le fafine o Mekala. Na nofo le fafine mo ni nai sekone ona tepa a’e lea i luga ma fa’apea lana tali, “O se fafine meauli na sulu atu e fia maua se mapusaga ma lana fanau e to’atolu, ona ou talia lea ma tuu i ai le avanoa matou te nonofo ai”. O le tali lea a le fafine o Mekala.

 

“O ai uma tagata o le aiga”, o le toe fesili atu lea a Meki, ae na tali Mekala, “E na o le fafine meauli lava ma lana fanau toatolu. “E i ai se Tama o le aiga”, o le isi lea fesili a Meki, ae na koma Mekala mo ni nai sekone ona fa’apea atu lea o lana tali, “Fai mai le fafine e i ai lona to’alua ae lei oo atu lava e asi o ia ma lana fanau”. Na nofo le tamaloa o Meki mo sina taimi ona toe fa’apea atu lea o lana fesili ia Mekala, “Sa i ai se taimi na e vaai ai i le Tama o le aiga, pe e te feiloa’i atu ai fo’i”, e lei gagana Mekala i se upu, ae se’i vagana ai le lulu o lona ulu e fa’ailoa atu ai lana tali, e leai.