Ads by Google Ads by Google

E LE O OE O SE SULI MONI - Vaega VII

Sa na o le luelue ulu o Ianeta e fa’ailoa atu ai lona usita’i i le fa’atonuga a lona matai lea ua fai ane ia te ia, ona faliu lea ma toe fa’aauau lana savali aga’i i le tama’i fale lea ua avea nei ma ona nofoaga tumau. Na ona taunu’u lava o le teineititi i totonu o lana tama’i fale, sa ia togi lana ato aoga i luga o le nofoa laupapa e tasi o loo tu i tafatafa o le tama’i laulau lea e fai ai ana meaaoga, ona ia fa’apalasi ifo lea i luga o le moega ma taoto ai ma ona loimata e le matu. Ao taoto Ianeta ma lona loto fa’anoanoa, sa fa’afuase’i ona toe tau lona mafaufau i taimi sologa lelei o lona olaga ao latou mafuta ma lona aiga, aemaise ai lava le taimi na la nonofo to’alua ai na o laua ma lona grandfather, e le gata e sa’oloto i soo se mea i totonu o le aiga, ae na te lagonaina fo’i lona i ai i lona aiga moni. “Amuia se teineititi e pei o a’u o lo o tuua atu lana aoga ae fa’afeiloa’i fiafia mai e lona Tina, ma tu’u atu i ai lana meaai. Amuia se teineititi e pei o a’u a tuua atu lana aoga, ona fa’aalu lea o le afiafi atoa e fai ai ana meaaoga ma su’esu’e mataupu mo le isi aso, ae le alu e fai ni galuega mamafa e pei o a’u. Amuia fo’i se teineititi e pei o a’u o lo o ia lagonaina o le sa’oloto ma le ola fiafia i lona aiga, e ala i le fusia o le mafutaga i le alofa mai matua, ae le iloa mai a’u nei, e ala i le pologa, e moe i le pologa, e ‘ai pei se pologa, e savali pei o se pologa, e leai se sa’olotoga ae ola fa’anoanoa i aso uma, aua o a’u lava o le pologa”.

 

Na fa’afuase’i ona moe Ianeta ina ua ia lagona le vaivai o lona tino, ma i’u ai lava ina moe gase o ia, ae o le taimi lea o lo o nofonofo mai ai le fafine saua o Mekala i luga o le fogafalelua o lona fale ma va’ava’aia mai i le taimi e amata atu ai galuega a Ianeta mo le fa’amamaina o le fanua atoa ai ma lana togalaau. Na avea le fiu o le fafine e fa’atali le taimi e galue atu ai Ianeta ma itu na ia tu a’e ai loa i luga ma lona ita tele ma savali telea’i atu loa i le tama’i fale o lo o nofo ai le teineititi pologa. Na pei e vaai le fafine saua o Mekala i se aitu ina ua ia tatala atu le faitoto’a o le fale, ae tau atu lana vaai ia Ianeta o lo o fa’agaulua mai i luga o lona moega o loo moe, ma ona lavalava aoga e le’i tatalaina ese lava, ae o luga o le laulau, o lo o ta’atia ai lava le meaai sa ia tapenaina, o fasi falaoa e 3 ma le ipu ti. E lei toe fa’atali le fafine saua i se isi mea, ae ua savali atu nei ma tago atu i le ulu o Ianeta ua futi mai i luga ma lona leo ua avaavau atu i le teineititi pologa, “Oi, o le a lega, e fa’akali atu le galuega e ke alu e fai ae e sau e moe fa’apega. E le o gi aga ia a se pologa e fai, e le o se kaimi fo’i legei e ke moe ai, ku vave gei i luga magu ou ke le’i kago aku e gagau oe”, o le avaavau atu lea a le fafine o Mekala ia Ianeta, ona tu ai loa lea i luga o le teineititi ua sui lona ofu ae aga’i atu loa i fafo mo le tapenaina o le fanua aemaise ai o le togalaau.

 

Na pei o le emo o le mata gaioiga a le teineititi i le fa’atinoina o lana galuega, e ui i le vevela o le la ae sa ia galue malosi pea ina ia fa’amalieina lona matai e tusa ai o le fa’atonuga ua tu’uina atu ia te ia. O fafo o le pa lea o lo o si’omia ai le fanua o le aiga, o lo o i ai kalone lapisi tetele e lua e lafoa’i i ai le lapisi, ma, o taimi muamua lava na savali atu ai Ianeta e tiai le lapisi, na iloa mai ai o ia e lana faiaoga o Lucy ma lona to’alua, lea ua paka le la ta’avale e latalata ane i le vaega o lo o i ai le fale o le aiga. Na fiu le tamaloa e tauanau lona to’alua la te ia i le fale, ae na mana’o lava le fafine faiaoga o Lucy se’i paka pea lana ta’avale i luga o le alatele, ae se’i ona mata’ituina pe moni le tala a Ianeta sa fai atu ia te ia, fai mai o afiafi uma lava e fai ai ana galuega mamafa, e pei o le tapenaina o le lotoa atoa ma la’u le lapisi i luma o kalone lapisi tetele e lafoa’i ai. O le taimi lava na vaaia ai e Lucy ia Ianeta o savali ane ma le uta lapisi e tia’i i totonu o kalone, sa ia fafaguina ai loa lona to’alua ua fa’agalegale moe i totonu o le ta’avale ma ia fa’asino ia Ianeta. “Ua e vaai atu i ai, o lea la ua ou fa’amaonia i le aso lenei, e moni lava le molimau a Ianeta ia te ia, i le olaga pologa ma le saua o lo o ola ai i totonu o lona aiga”.