Ads by Google Ads by Google

E le toe mana’omia se isi tulafono puipuia ai sui tauva o le palota


Le taimi na fa’ailoa ai e le Komesina o le Ofisa o Palota ia Uiagalelei Dr. Lealofi fa’amaumauga e fa’atatau i suega sa faia i sui tauva mo le palota sa faia i le tausaga na te’a nei, i le taimi na la molimau ai ma le Loia Sili ia Talauega Eleasalo Ale i se iloiloga sa faia i le maota o sui i le taeao ananafi. [ata AF]
ausage@samoanews.com

Na fa’ailoa e le Loia Sili a le malo ma le Komesina o le Ofisa o Palota a le atunu’u i luma o le maota o sui i le taeao ananafi, e le toe tau mana’omia se isi tulafono e saili ai pe agavaa se sui e tauva mo le tofi a le atunu’u i taimi o ana palotaga, o lea lava ua lava le malosi o le tulafono o loo i ai nei e fa’atino ai e le Komesina o Palota ma lona Ofisa le galuega e sailia ai le agava’a o soo se sui tauva.

 

O le taeao ananafi na fa’ataunuuina ai le iloiloga a le Komiti o Palotaga a le maota o sui, i lalo o le ta’ita’iga a le afioga i le ali’i faipule ia Sataua Dr. Mataese Samuelu, e talanoaina ai le tulafono taufaaofi lea ua i luma o le maota o sui, e faia ai suega mo sui tauva o le palota ina ia mautinoa e le i aafia i latou i tulaga tau solitulafono i taimi ua tuana’i.

 

O molimau sa valaauina mo lea iloiloga e aofia ai le loia sili ia Talauega Eleasalo Ale ma le Komesina o le Ofisa o Palota ia Uiagalelei Dr. Lealofi.

 

Na taua e Uiagalelei i luma o le maota e fa’apea, o loo lava ma totoe le malosi o le tulafono o loo i ai i le taimi nei, e fa’atino ai e lona Ofisa le galuega o le sailia lea o fa’amaumauga pe agava’a le sui tauva mo le palota a le atunu’u.

 

“I le palota tele a le atunu’u na mavae atu nei, o sui tauva uma e to’a 46 sa tauva mo nofoa i le maota o sui, e leai ma se isi o i latou e lei agava’a mo le avea ma sui tauva o le palota, sa lelei uma le taliina o fesili o loo i le pepa lenei (faailoa e Uiagalelei i luma o le maota le pepa), e leai fo’i se isi sa ia tali ioe i le fesili pe sa faamaonia se tasi i se solitulafono mamafa, i lo’u la talitonuga, ua lava ma totoe le tulafono o loo i ai nei e fa’atino ai e lo’u Ofisa le galuega, e le toe tau mana’omia ai fua se isi tulafono i tua atu o le tulafono ua i ai”, o le saunoaga lea a Uiagalelei na lagolagoina e le Loia Sili a le malo, ina ua fesiligia e le komiti o ia mo sona finagalo e uiga i lenei tulafono.

 

Na fa’apupula atili e Talauega i lana saunoaga mafua’aga e ala ai ona lavelave le tulafono lea ua i luma o le maota, atoa ai ma le malosi o le tulafono o loo i ai nei e fa’atinoina ai e le aufaigaluega a le Ofisa o Palota suega mo sui tauva ina ia agava’a i latou mo le palota.

 

O le gagana o le tulafono taufa’aofi lea ua i luma o le maota o sui, na taua e le loia sili le malosi tele, ona ua atagia mai ai le taumafai e suesue le talaaga tau solitulafono o le sui tauva, ae o se tasi lea o itu e tatau ona manino, poo ni fa’amatalaga nei e tatau ona silafia e le lautele, poo nei fa’amatalaga e tatau lava ona gata i le tagata lava ia.

 

O loo taua i le tulafono e faapea, “e aofia ai le faia o se sailiiliga mae’ae’a o le tala’aga fa’alesolitulafono” o le sui tauva.

 

Saunoa le loia sili e fa’apea, afai o le a suesue le talaaga o le sui tauva i tulaga tau solitulafono, e le gata e umi se taimi e alu ai, ae tele fo’i tupe a le malo e alu ai, ae le o iloa pe aoga nei fa’amatalaga pe leai fo’i.

 

Mo se fa’ata’ita’iga o se tagata sa nofo i se setete o Amerika mo le tele o tausaga, ao lea ua toe fo’i mai i Amerika Samoa ma ua filifili e fia tauva i le nofoa a lona itumalo, afai la ae pasia le tulafono fou lenei, e tatau i le Ofisa o Palota ona fesootai i le Fa’amasinoga poo le Ofisa o Leoleo i le setete sa nofo ai le sui tauva lenei, mo le sailiina mai o ana fa’amaumauga tau solitulafono e aofia ai solitulafono mama, solitulafono tau ta’avale, ma isi lava ituaiga solitulafono e aofia ai ma solitulafono mamafa, ae tatau fo’i ona silafia, o fa’amatalaga nei e patino lava i le tagata, e le o ni fa’amatalaga e tatau ona soona fa’ailoa.

 

Saunoa le afioga i le ali’i faipule ia Vesi Talalelei Fautanu Jr e fa’apea, o le agaga o le tulafono, ia fesoasoani i le Ofisa o Palota mai la latou galuega fa’atino, ina nei toe maua mulimuli ane se sui tauva sa faamaonia sana solitulafono, ona toe tigaina ai lea o le Ofisa o Palota e tau fa’atino le galuega.

 

Na fa’amanino atili e le afioga i le ali’i faipule ia Faimealelei Anthony Fu’e Allen sa fa’auluina le tulafono e fa’apea, sa i ai le tulaga faapena sa tula’i mai i le palota na se’i mavae atu nei, o le tagata sa aafia i solitulafono i tausaga ua mavae ae sa tausinio i le palota, ma o itu ia o loo sili ona popole i ai lona sui.

 

Saunoa le Loia Sili e fa’apea, o loo manino le tulafono, e le mafai e se tagata sa ta’usala i se solitulafono mamafa ona toe galue i totonu o le malo, peita’i o le gagana o le tulafono fou lea ua talanoaina nei, o loo fa’alaua’itele ai soo se solitulafono, ae tatau lava ona fa’apitoa mo na o solitulafono mamafa.

 

Ua toe taoto atu nei le tulafono i le komiti mo le toe faatulagaina o se isi fuafuaga e toe teuteu ai le gagana o le tulafono.