Ads by Google Ads by Google

Elinor Lutu-McMoore, Pule Ofisa Va’ai Tau Amerika Samoa


Le tamaitai’i Amerika Samoa, Elinor Lutu-McMoore ua avea nei ma Pule o le Ofisa Va’ai Tau i le teritori. [ata: Leua Aiono Frost]

Ua fa'ailoa aloa'ia e le susuga Tom Evans o le National Weather Service Pacific Region i Honolulu, Hawaii, ua tofia fa'apitoa nei le tama'ita'i o Elinor Lutu-McMoore e avea ma Pule o le Ofisa o Va'ai Tau i Amerika Samoa nei, ma ua suia mai ai le tofa Mase Akapo Akapo lea sa ia tau'avea mai lea tofi i tausaga e tele.

 

O lea se fa'aeaga ua mua'i maua e se tama'ita'i Samoa i lea tofiga, ma ua iloga lava fo'i le tula'i mai o lea tama'ita'i i lona tiute fa'ata'ita'i ina ua ia tau'avea mai le va'aiga atoa o le Ofisa Va'ai Tau talu mai le tausaga ua mavae, ina ua fa'amavae aloa'ia ai le tofa Mase mai le tofi.

 

O Lutu-McMoore sa soifua a'e i Utulei, a'oa'oina i le teritori, ma fa'au'u mai le a'oga maualuga a Samoa i le tausaga 1996.

 

Na ulufale i le Kolisi Tu'ufa'atasi ma sa avea o se tasi o le vasega fa'aiuaso muamua lava ua amata ai ona faia fa'au'uga ia Tesema 1997 a le tatou Kolisi, ma o ia sa togisilia i lea vasega fa'aiuaso.

 

Ina ua mae'a ana a'oa'oga i fafo sa amatalia lona soifua faigaluega i Ofisa o le Malo Tele i lana 'au'aunaga i le Ofisa o le Sui i Uosigitone, le tofa Faleomavaega Eni mai le 2001, lea na soso'o mai loa ma lona tautua o se tasi o Technician i le Ofisa Va'ai Tau i Amerika Samoa nei i le tasuaga e 2005.

 

O le tausaga e 2008 na fa'aauau ai lana tautua lava lea i le National Weather Service Pacific Region ma a'oga loa ia mafai ona avea ma tagata Va'ai Tau i Hawaii. O lea avanoa sa ia maua, e a'oga ma faigaluega lava i le taimi e tasi.

 

Ina ua mae'a lana a'oga ua maua tusi pasi ona fa'asolo ane ai lava lea e faigaluega i Honolulu se'ia o'o i le tausaga e 2013, ona fa'ato'a toe si'itia mai lea o lana galuega iinei ma fa'aauau ai pea lana auaunaga. O le fa ai lenei o tausaga, ae ua fa'aeaina o ia e avea ma Pule o le Ofisa Va'ai Tau a le Malo Tele i le tatou nei teritori.

 

"O se avanoa ua ou maua, e muamua fa'afetaia le agalelei o le Atua i le tagata e taumafai e fa'atino ona tiute, ma galulue fa'amaoni ma le isi vaega uma o le aufaigaluega ina ia fa'atino tiute. Aua e le faigofie lenei galuega, pe afai e te le faigaluega so'otau'au ma isi uma o tou faigaluega fa'atasi. O le fa'afetai ma le vi'iga e fo'i i le Atua, ae tumau pea le fa'atauva'a ma le ola taumafai o le tagata e fia fai manuia,” o se tala lea a Lutu-McMoore.

 

"Lona lua o le fa'afetai, e fa'asino lea i le matou aufaigaluega uma lava iinei, ma le Ofisa Ulu i Hawaii, aua a le matou galulue fa'atasi, e le mafai ona faia lenei galuega, aua o ai ea e pule i le Tau a'o le Atua e to'atasi. E taumafai le tagata na te iloa le finagalo o le Atua ma uiga o le Tau, e le mafai se'i vagana lava ua matou auaufa'atasi ma lagolago le fa'atinoga o le galuega, ona tonu lea o se auaunaga."

 

Na fa'afetaia fo'i e ia le galulue fa'atasi mai a le uso a tuaoi, Samoa Tuto'atasi, "Aua e tatou te lutia fa'atasi lava i le tele o fa'alavelave fa'anatura fa'afuase'ia e aofia ai afa ma matagi malolosi, galulolo ma mafui'e, o mea e o'o mai ma tatou tau fai ofo ai i le mata'utia o le Atua foafoa. Fa'afetai i le fa'asoa mai fo'i, ma le talia fo'i o sa matou taumafai atu e ala i uiga eseese o le tau."

 

O lana toe fa'afetai i nai ona matua, lona tama o Afoa Moega Lutu ma le tina Etenauga ma lona 'au uso ma tuagane, "Aua e tetele lava Pesega, ae matua i le oo, po'o fea lava e tausili i ai, ae tua lava i nai matua ma le aiga e fesoasoani mai. Fa'afetai fautua, fa'amalosi ma le alofa."

 

E ese mai lea sa ia manatua le sili ona latalata ane lana fesoasoani ia te ia, "Lo'u to'alua David McMoore ma si a ma fanau, Byron, Darius, Daniel ma Kireina-Netanayah. E matele ina faigaluega i le po atoa, pe a o'o lava ina louloua le tau ma tulaga fa'aletonu mai, e ao ina i ai i le Ofisa e matau ma va'ai, pe tua ma ni a se tala e avatu i le atunu'u. Fa'afetai i lou loto fesoasoani ma lou taua'u ae maise lou onosa'i e fa'amoemoe i ai lenei tina faigaluega."

 

Mo le lumana'i o le galuega, sa ia fa'ailoa ai, "E leai lava se mana'oga tupito ia te a'u, e ese mai fo'i i nisi sa tau'avea lenei tofi i le taimi ua te'a, e ao lava ina mataala fa'atasi i matou uma o faigaluega fa'atasi, galulue fa'atasi ina ia sa'o ma agatonu le auaunaga ao le'i fa'alauiloa atu i le atunu'u. Ia le nofo popole fo'i le atunu'u i taimi uma, ae ia mau fa'atuatuaina le auaunaga. O le matou galulue fa'atasi lava e laualuga i manatu i so'o se taimi, ma o le fa'afetai fo'i lea e fia fa'ailoa lava, o le matou aufaigaluega ia tasi lo matou loto i le galuega!"

 

"E fa'afetaia fo'i le pulega a le Ofisa Ulu i Hawaii o le matou Matagaluega o Va'ai Tau i le Pasefika, aua o lo'o va'ai atu, e fa'asolo mai lava e i latou tagata na soifua a'e i lo tatou malo, e avea ma fa'auluuluga i le tatou Ofisa o Vaai Tau iinei."

 

Na mafai fo'i ona maua se avanoa o le tama'ita'i o Christinna Lutu-Sanchez, e fa'auia mai ai lana fa'amalo i laina o feso'ota'iga a le Upega Tafa'ilagi Facebook ma sa ia fa'apea mai, "Fa'amalo ma fa'afetai i le Atua i ana fa'amanuiaga mo oe le uso pele, tau ina ia e iloa lelei, o lena tofi e avea ma au auaunaga sili i ou tagata ma lou malo, ae maise si ou aiga. Matou te auau fa'atasi ma le tama o le aiga ma le fanau, e molita'i atu  ma le mitamita fa'amanuiaga mo lou tofi fou ua e umia nei. E tatau i le tagata faigaluega fa'amaoni, ona pale i le tofi o le Pule! Aua ne'i galo ia te oe, le lagolagosua a lau aufaigaluega o lo'o outou galulue fa'atasi, o i latou na o lo'o fesoasoani malosi mo oe i taimi uma i la outou galuega faifa'atasi."